Strategic Autonomy: ஐரோப்பிய நாடுகளின் கேந்திரோபாய தன்னாளுமை

  

மேற்கு ஐரோப்பா என்பது சிறிய நாடுகளின் கூட்டமாகும். அதில் பெரிய நாடாகிய ஜேர்மனியின் மக்கள் தொகை எட்டுக் கோடியாகும். அதிலும் அதிக மக்கள் தொகை கொண்ட நான்கு மாநிலங்கள் இந்தியாவில் உள்ளன. மேற்கு ஐரோப்பிய நாடுகளின் மொத்த மக்கள் தொகை 19 கோடியாகும். அது இந்தியாவின் உத்தரப் பிரதேசத்தின் மக்கள் தொகையின் குறைவானது. மேற்கு ஐரோப்பாவிற்கும் இரசியாவிற்கும் இடையில் உள்ள நாடுகளை கிழக்கு ஐரோப்பிய நாடுகளாக கருதலாம். தங்களது சிறுமை என்னும் வலிமையற்ற நிலையைத் தவிர்க்க பல ஐரோப்பிய நாடுகள் நேட்டோ என்னும் படைத்துறைக் கூட்டமைப்பிலும் ஐரோப்பிய ஒன்றியம் என்னும் பொருளாதாரம் மற்றும் அரசியல் கூட்டமைப்பிலும் இணைந்துள்ளன.

கேந்திரோபாய தன்னாளுமை

ஒரு நாடு தனது பாதுகாப்பிற்கும் உலக அரங்கில் அதனது செயற்பாட்டிற்கும் வேறு நாடுகளில் தங்கியிருக்காமல் இருப்பதை கேந்திரோபாய தன்னாளுமை (Strategic Autonomy) எனச் சொல்லலாம். ஐரோப்பிய ஒன்றியம் தனக்கு என ஒரு படையை உருவாக்க வேண்டும் என்ற கொள்கையை முன்பு பிரித்தானியா கடுமையாக எதிர்த்தது. பிரான்ஸ் அதை தீவிரமாக ஆதிரித்தது. ஐரோப்பிய ஒன்றியத்தில் இருந்து பிரித்தானியா வெளியேறிய நிலையில் மீண்டும் ஐரோப்பிய ஒன்றிய நாடுகளுக்கு என ஒரு படை வேண்டும் என பிரான்ஸ் செயற்படுகின்றது. அமெரிக்க அதிபராக டொனால்ட் டிரம்ப் இருந்த காலத்திலும் ஐரோப்பிய ஒன்றியத்திற்கு என ஒரு கேந்திரோபாய தன்னாளுமை வேண்டும் என்ற கருத்து வலுப்பெற்றிருந்தது. டிரம்ப் அமெரிக்கா ஐரோப்பாவின் பாதுகாப்பிற்காக அமெரிக்கா செலவு செய்யக் கூடாது என்ற கொள்கையுடையவர். சீனாவிலும் பார்க்க வலிமையான பொருளாதாரத்தை ஐரோப்பிய ஒன்றியம் கொண்டிருக்கின்றது. ஆனால் ஐரோப்பிய ஒன்றிய நாடுகள் படைத்துறைக்கு போதிய நிதியை ஒதுக்குவதில்லை.

ஒதுக்கப்பட்டதாக உணரும் ஐரோப்பா

மேற்கு ஐரோப்பிய நாடுகளுடன் கலந்து ஆலோசிக்காமல் அமெரிக்கா ஆப்கானிஸ்த்தானில் இருந்து வெளியேறியதும் அமெரிக்கா, ஒஸ்ரேலியா, பிரித்தானியா ஆகிய மூன்று நாடுகளும் இணைந்து AUKUS என்ற படைத்துறைக் கூட்டமைப்பை உருவாக்கியதும் மேற்கு ஐரோப்பிய நாடுகளில் தங்களது கேந்திரோபாய தன்னாளுமை (strategic autonomy) பற்றி தீவிரமாக சிந்திக்க வைத்தன. ஆப்கானிஸ்த்தானில் இருந்து வெளியேறும் முடிவை அமெரிக்கா எடுத்த போது அங்கிருந்த ஐரோப்பிய நாடுகளின் படைகளும் வெளியேறியே ஆக வேண்டும் என்ற சூழல் உருவாகியது. அப்போது கருத்து வெளியிட்ட ஐரோப்பிய ஒன்றியத்தின் வெளியுறவுத்துறை அமைச்சர் ஐரோப்பாவிற்கான பாதுகாப்பின் தேவை முன்பு எப்போதும் இல்லாத அளவு இன்று அதிகரித்திருக்கின்றது என்றார். மேலும் அவர் ஐரோப்பிய ஒன்றிய நாடுகள் ஒவ்வொன்றும் ஐயாயிரம் படையினரைக் கொண்ட துரித பதிலிறுப்பு படையணி ஒன்றை உருவாக்க வேண்டும் என்றார். ஜெர்மனியின் பாதுகாப்பு அமைச்சரும் தனது டுவிட்டர் பதிவில் அதை ஆதரித்திருந்தார். நேட்டோ படையினர் ஒரு நிபந்தனையற்ற படை விலக்கலை ஆப்கானிஸ்த்தானில் இருந்து செய்வதை தான் விரும்பவில்லை என்றார் நேட்டோவின் பொதுச் செயலர் ஜென் ஸ்ரொலென்பேர்க்.

கேந்திரோபாய தன்னாளுமையும் ஐரோப்பிய ஒன்றியமும்

ஐரோப்பிய ஒன்றியத்திடம் கேந்திரோபாய தன்னாளுமை என்பது ஒரு கொள்கை நோக்கமாக (Policy Objective) 2016-ம் ஆண்டில் இருந்து இருக்கின்றது. கொள்கை நோக்கம் என்பது கொள்கை வகுப்பாளர்கள் விரும்புகின்ற விளைவுகளாகும். (A policy objective is a desired outcome that the policy makers wish to achieve). 2016-ம் ஆண்டு ஐரோப்பிய ஒன்றியம் தனது உலகளாவிய கேந்திரோபாயத்தை வகுத்துக் கொண்டது (European Union Global Strategy). அதன் ஒரு பகுதிதான் கேந்திரோபாய தன்னாளுமையாகும்.

தனித்துவமான பிரான்ஸ்

பிரான்ஸ் தனது நாட்டின் பாதுகாப்பிற்கு அமெரிக்காவில் தங்கியிருப்பதை விரும்புவதில்லை. தனக்குத் தேவையான படைக்கலன்களைத் தானே உற்பத்தி செய்து கொள்கின்றது. பிரான்ஸ் உற்பத்தி செய்யும் போர்விமானங்கள், போர்க்கப்பல்கள், நீர்மூழ்கிக் கப்பல்கள் உலகத் தரம் வாய்ந்தவை. 2011-ம் ஆண்டு இரசியாவே பிரான்ஸிடமிருந்து இரண்டு உலங்கு வானூர்தி தாங்கிக் கப்பலை வாங்கும் ஒப்பந்தம் செய்தது. 2014-ம் ஆண்டு உக்ரேனை இரசியா ஆக்கிரமித்தமைக்கு ஆட்சேபனையாக அந்தக் கப்பல்களை இரசியாவிற்கு விற்பனை செய்வதை அமெரிக்காவின் வற்புறுத்தலின் பேரில் நிறுத்தியது. பிரான்ஸும் கிரேக்கமும் ஒன்றை ஒன்று பாதுகாக்கும் ஒப்பந்தம் செய்ததுடன் பிரான்ஸிடமிருந்து மூன்று பில்லியன் யூரோக்களுக்கு மூன்று Frigate வகைப் போர்க்கப்பல்களை கிரேக்கம் வாங்கும் ஒப்பந்தமும் கைச்சாத்திட்டன. பல ஐரோப்பிய படைத்துறை ஆய்வாளரகள் இது ஐரோப்பாவின் கேந்திரோபாய தன்னாளுமையின் முதற்படி என்கின்றனர்.

இரசியாவின் அச்சுறுத்தல்

மேற்கு ஐரோப்பிய நாடுகள் என்னும் போது ஐரோப்பிய ஒன்றிய நாடுகளும் அவற்றின் தோழமை நாடுகளான நோர்வே, பிரித்தானியா, சுவிற்சலாந்து ஆகியவையும் அடங்கும். புவியியல் அடிப்படையில் பார்க்கும் போது போலாந்து, ஹங்கேரி, லித்துவேனியா, லத்வியா, எஸ்தோனியா ஆகியவை கிழக்கு ஐரோப்பிய நாடுகளாகும். இரசியாவால் தமது பாதுகாப்பிற்கு அச்சுறுத்தல் எனக் கரிசனை கொண்ட ஐரோப்பியக் கண்டத்தில் உள்ள நாடுகள் மேற்கு ஐரோப்பிய நாடுகளையும் அமெரிக்காவையும் சார்ந்து செயற்படுகின்றன. இரசியாவைப் பொறுத்தவரை தனக்கு என ஒரு கவசப் பிராந்தியம் அவசியம் என நினைக்கின்றது. அந்த கவசப் பிராந்தியத்தில் உள்ள நாடுகளான ஜோர்ஜியா, உக்ரேன் போன்ற நாடுகள் நேட்டோ கூட்டமைப்பிலோ ஐரோப்பிய ஒன்றியத்திலோ இணைவதை கடுமையாக எதிர்க்கின்றது. இரசியா தன் கவசப் பிராந்தியமான போல்ரிக் பிரதேச நாடுகள் மூன்றும் ஏற்கனவே இரண்டிலும் இணைந்தமை இரசியாவைப் பொறுத்தவரை மிகவும் கரிசனைக்கு உள்ள ஒன்றாகும்.

லிபிய மும்மர் கடாஃபியின் கருத்து

“ஐரோப்பாவில் ஐம்பது மில்லியன் இஸ்லாமியர்கள் வாழுகின்றார்கள். இன்னும் சில பத்து ஆண்டுகளின் கத்தியின்றி இரத்தமின்றி அவர்கள் அல்லாவின் கிருபையால் ஐரோப்பாவைக் கைப்பற்றுவார்கள்” என்றால் லிபியாவின் முன்னாள் அதிபர் மும்மர் கடாஃபி. ஐரோப்பாவில் இஸ்லாமிய தீவிரவாதம் பரவாமல் இருக்க அமெரிக்க மற்றும் இஸ்ரேலிய உளவுத்துறைகளின் ஒத்துழைப்பு ஐரோப்பிய நாடுகளுக்கு தேவைப்படுகின்றது. உளவுத்துறையிலும் ஐரோப்பிய ஒன்றிய நாடுகளுக்கு கேந்திரோபாய தன்னாளுமை தேவைப்படுகின்றது.

ஐரோப்பிய ஒன்றியத்தின் நிலை உணர்ந்த போலாந்து

ஐரோப்பிய ஒன்றியத்தின் மொத்த பாதுகாப்புத்துறை உற்பத்தி $113 பில்லியன்களாகும். அமெரிக்காவின் வான்பாதுகாப்புத்துறையின் உற்பத்தி மட்டும் $697 பில்லியன்களாகும். ஐரோப்பிய ஒன்றிய நாடுகள் தமது பாதுகாப்பை உறுதிய் செய்ய இன்னும் நீண்ட தூரம் பயணிக்க வேண்டியுள்ளது. அதனால் தான் இரசியா உக்ரேனை ஆக்கிரமித்தவுடன் போலாந்து தனது நாட்டில் அமெரிக்கா படைத்தளம் அமைக்க வேண்டும் என அமெரிக்காவை வேண்டிக் கொண்டதுடன் அதற்கான செலவின் பெரும் பகுதியை தான் ஏற்றுக் கொள்வதாகவும் அறிவித்தது. ஜேர்மனியில் இருந்து தனது படையினரில் 12,000 பேரை விலக்க முடிவு செய்த அமெரிக்காவிற்கு இது நல்வாய்ப்பாகவும் அமைந்தது. அமெரிக்கா தலைமையிலான நேட்டோ நாடுகளின் பாதுகாப்பு இல்லாவிடில் இரசியாவின் கிழக்கு எல்லையில் இருக்கும் லத்வியா, லித்துவேனியா, எஸ்த்தோனியா ஆகிய மூன்று சிறிய போல்ரிக் நாடுகளையும் இரசியாவால் ஒரு சில மணித்தியாலங்களுக்குள் கைப்பற்ற முடியும். ஐரோப்பிய ஒன்றியத்தில் இருக்கும் 27 நாடுகளில் 21 நாடுகள் நேட்டோவின் உறுப்பு நாடுகளாக உள்ளன. மேலும் நான்கு நாடுகள் நேட்டோவில் இணைய விண்ணப்பித்துள்ளன. நேட்டோவில் உள்ள துருக்கி, அல்பேனியா, மொண்டிநீக்ரோ, வட மசடோனியா ஆகிய நாடுகள் ஐரோப்பிய ஒன்றியத்தில் இணைய விருப்பம் தெரிவித்துள்ளன. இரு அமைப்புகளினதும் தலைமைச் செயலகம் பிரஸல்ஸில் உள்ளன. ஐரோப்பிய ஒன்றியம் ஒரு முழுமையான அரசியல் ஒன்றியமாவதை (Political Union) அமெரிக்கா பகிரங்கமாக எதிர்க்கின்றது. ஆனால் ஐரோப்பிய ஒன்றியம் படைத்துறைக்கு அதிக செலவு செய்ய வேண்டும் என அமெரிக்கா கருதுகின்றது.

ஐரோப்பிய நாடுகளில் பிரான்ஸைத் தவிர மற்ற நாடுகள் வானில் வைத்து எரிபொருள் நிரப்பும் வல்லமை இல்லாமல் இருக்கின்றன. பிரான்ஸும் உலங்கு வானூர்திகளுக்கு மட்டுமே எரிபொருள் நிரப்பக் கூடியது. தற்காலத்துக்குரிய ஆளில்லாப் போர் விமானங்கள், ஹைப்பர் சோனிக் ஏவுகணைகள், லேசர் படைக்கலன்கள், விண்வெளிப் படையணிகள் போன்றவை ஐரோப்பிய ஒன்றிய நாடுகளிடம் இல்லை. பிரான்ஸ், நெதர்லாந்து, இத்தாலி, ஜேர்மனி, ஸ்பெயின் ஆகிய நாடுகள் வலிமையான படைகளைக் கொண்டவை. மற்ற பல ஐரோப்பிய ஒன்றிய நாடுகள் பெயரளவில் சில படைகளை வைத்திருக்கின்றன. பெல்ஜியம், போர்த்துக்கல், ஒஸ்ரியா, பல்கேரியா, ஹங்கேரி, டென்மார்க் ஆகிய நாடுகளிலும் பார்க்க இரசியாவின் வலயத்தில் உள்ள சிறிய நாடாகிய பெலரஸ் படைவலிமை மிக்கதாகக் கருதப்படுகின்றது. Nuclear Triad எனப்படும் தரை, வான் கடலடியில் இருந்து அணுப்படைகலன்களை வீசக்கூடிய நாடுகளாக இந்தியா, சீனா, இரசியா, அமெரிக்கா ஆகிய நாடுகள் இருக்கின்றன. முன்பு பிரான்ஸ் இந்த வல்லமையைப் பெற்றிருந்தது. ஐரோப்பிய ஒன்றியத்திலும் நேட்டோவிலும் இல்லாத சுவீடன் சிறந்த படைக்கலன்களை உற்பத்தி செய்கின்றது.

கிரேக்கம்

நேட்டோவின் உறுப்பு நாடான துருக்கி நேட்டோவிலும் ஐரோப்பிய ஒன்றியத்திலும் உறுப்புரிமை உள்ள நாடாகும். ஆனால் துருக்கி கிரேக்கத்திற்கு சொந்தமான கடற்பரப்பை தனது கடற்பரப்பு என உரிமை கொண்டாடுவதால் இரண்டு நாடுகளுக்கும் இடையில் முறுகல் உள்ளது. கிரேக்கம் முதலில் தனது பாதுகாப்பிற்கு சைப்பிரஸுடனும் இஸ்ரேலுடனும் ஒரு முத்தரப்பு ஒப்பந்தத்தை செய்தது. பின்னர் சைப்பிரஸுடனும் எகிப்த்துடனும் இன்னும் ஓரு முத்தரப்பு பாதுகாப்பு ஒப்பந்தத்தையும் செய்தது. இந்த ஒப்பந்தங்கள் ஐரோப்பிய ஒன்றிய நாடுகளின் கேந்திரோபாய தன்னாட்சி இல்லாமையை எடுத்துக் காட்டுகின்றது. பிரான்ஸுடன் பாதுகாப்பு ஒப்பந்தத்தை செய்வதற்கு கிரேக்கம் பிரான்ஸிடமிருந்து 24 ரஃபேல் விமானங்களையும் மூன்று போர்க்கப்பல்களையும் வாங்க வேண்டியிருந்தது.

அமெரிக்காவுடனான ஒத்துழைப்பின்றி நேட்டோ இருப்பது கடினமான ஒன்று என்றார் நேட்டோவின் பொதுச் செயலர் ஜென் ஸ்ரொலென்பேர்க்.

Pandora: வருமானவரிப் புகலிடங்கள்

 

வெளிநாடுகளில் முறைகேடாகப் பணமுதலீடு செய்து சொத்துக் குவித்தவர்களின் பட்டியலை, சர்வதேசப் புலனாய்வு பத்திரிகையாளர்கள் சேர்ந்தியம் (International Consortium of Investigative Journalists (ICIJ) `பண்டோரா பேப்பர்ஸ்' எனும் பெயரில் வெளியிட்டிருக்கிறது. உலகின் முன்னணிப் பத்திரிகை நிறுவனங்களான பிபிசி, தி கார்டியன், இந்தியாவின் `தி இந்தியன் எக்ஸ்பிரஸ்' முதலிய 150 ஊடகங்களைச் சேர்ந்த 600-க்கும் மேற்பட்ட பத்திரிகையாளர்கள் ஒன்றிணைந்து மேற்கொண்ட இந்தப் புலனாய்வில் பன்னிரண்டு மில்லியன்களுக்கும் அதிகமான திடுக்கிடும் ரகசிய ஆவணங்கள் சிக்கியிருக்கின்றன.

வருமானவரிப் புகலிடங்கள்.

ஒரு நாட்டிலோ அல்லது ஒரு நாட்டின் ஒரு பகுதியிலோ வருமானவரி குறைவானதாகவும் இரகசியம் பேணும் சட்டங்களும் இருந்தால் அது வருமானவரிப் புகலிடமாகும். அவை மட்டும் போதாது அந்த நாட்டில் ஒரு நீண்டகால அடிப்படையில் அரசியல் உறுதிப்பாடு இருப்பதும் நிதித் துறையில் அரச தலையீடு இல்லாமல் இருப்பதும் அவசியமாகும். பனாமாவில் செயற்படும் வெளிநாட்டு நிறுவனங்கள் (offshore companies ) தமது பன்னாட்டு நடவடிக்கைகளுக்கு வருமானவரி, விற்பனை வரி போன்றவற்றை பனாமா அரசுக்குச் செலுத்தத் தேவையில்லை. பனாமாவில் உள்ள நிறுவனங்களின் உரிமையாளராக உள்ள வெளிநாட்டு நிறுவனங்களின் அல்லது தனிப்பட்டவர்களின் பெயர்கள் கொடுக்கத் தேவையில்லை, தங்கள் நடவடிக்கைகள் பற்றிப் பதிவுகள் வைத்திருக்க வெண்டும் என்ற அரச கட்டுப்பாடும் இல்லை. அவர்களுடைய பதிவுகளை வெளிநாட்டு வருமான வரித் துறையினருக்கு வெளிவிட வேண்டும் என்ற கட்டுப்பாடும் இல்லை. உலக வெளிப்படைத் தன்மை உடன்படிக்கையில் பனாமா கையொப்பமிடாத படியால் அது மற்ற நாடுகளுக்கு தனது நாட்டில் முதலீடு செய்பவர்களின் நிதி நிலைமை தொடர்பான தகவல்களைப் பரிமாறிக் கொள்வதில்லை.

வருமானவரிப் புகலிடங்களின் செயற்பாடு

மிகவும் சட்ட பூர்வமானதாகவும் நியாயமானதாகவும் ஒரு நாடோ அல்லது ஒரு நாட்டின் ஒரு புகுதியோ வருமானவரிப் புகலிடமாக இருக்க முடியும். இருப்பதும் உண்டு. உதாரணத்திற்கு கிரேப்ஸ் என்னும் நிறுவனம் அமெரிக்காவில் கைப்பேசிகளை நூறு டொலர்களுக்கு உற்பத்தி செய்து அவற்றை உலகச் சந்தையில் இரு நூறு டொலர்களுக்கு விற்பனை செய்தால் கிடைக்கும் நூறு டொலர் இலாபத்திற்கு அமெரிக்காவில் வரி கட்ட வேண்டும். மாறாக அந்த கைப்பேசிகளை வருமானவரிப் புகலிட நாட்டில் பதிவு செய்துள்ள கிரேப்ஸ் சொந்தமான இன்னொரு நிறுவனத்திற்கு 101டொலர்களுக்கு விற்று இலாபமாகக் கிடைக்கும் ஒரு டொலருக்கு மட்டும் வரி செலுத்த வேண்டும். பின்னர் வருமான வரிப் புகலிட நாட்டில் இருந்து உலகெங்கும் இரு நூறு டொலர்களுக்கு விற்பனை செய்து கிடைக்கும் 99 டொலர் இலாபத்திற்கு வருமானவரி கட்டாமலோ அல்லது அமெரிக்காவிலும் பார்க்க மிகக் குறைந்த வருமான வரியையோ கட்டலாம். இவை சட்டபூர்வமான வர்த்தகமாகும். ஆனால் அமெரிக்கா இப்படி ஒரு வருமானவரிப் புகலிட நாடு இருப்பதை விரும்பாது. அது அமெரிக்காவின் வருமான வரி மூலம் திரட்டும் நிதியைக் குறைக்கின்றது. ஆனால் நடைமுறையில் ஊழல் செய்வோர்க்கும் சட்ட விரோதமாகப் பணம் சேர்ப்போர்க்கும் தஞ்சமடையும் இடமாகப் பல வருமானவரிப் புகலிடங்கள் செயற்படுகின்றன. வெளி நாட்டு நிறுவனம் ஒன்று ஒரு வருமானவரிப் புகலிட நாட்டில் பதிவு செய்யும் நிறுவனத்தை shell company என அழைப்பர். இது வர்த்தக நடவடிக்கையில் நேரடியாக ஈடுபடாமல் நிதிப் பரிமாற்றங்கள் செய்வதற்கும் அல்லது எதிர்கால திருகுதாள நடவடிக்கைகளுக்குப் பயன்படுத்த வைத்திருக்கப்படும். வருமானவரிப் புகலிடங்களிற்குப் போகும் நிதி பின்னர் உலகின் முன்னணி நிதிச் சந்தைகளான New York, London, Zurich, Geneva, Frankfurt, and,  Singapore, Hong Kong, and Dubai ஆகியவற்றைப் போய்ச் சேரும்.

பெரும் வங்கிகளின் குழந்தைகள்

பல வருமானவரிப் புகலிடங்களை உருவாக்கிய சிற்பிகள் HSBC, UBS, Credit Suisse, Citigroup, Bank of America, RBS, Barclays, Lloyds, Standard Chartered, JPMorgan Chase, Wells Fargo, Santander, Credit Agricole, ING, Deutsche Bank, BNP Paribas, Morgan Stanley, and Goldman Sachs ஆகிய முன்னணி வங்கிகள் ஆகும். 1970களில் இருந்து இந்த முன்னணி வங்கிகள் தமது பெரும் செல்வந்த வாடிக்கையாளர்களின் வருமானங்களிற்கான வரிகளில் இருந்து தப்ப உதவி செய்து பெரும் வருவாயை ஈட்டியுள்ளன. வெறும் நாணயங்களை மட்டுமல்ல தங்கம் போன்ற உலோகங்கள், ஓவியங்கள், பழைய வாகனங்கள், புகைப்படங்கள், உல்லாசப் படகுகள், எண்ணெய்க் கிணறுகள் போன்றவற்றின் வர்த்தக மூலம் வருமானங்கள்  மறைக்கப்படுவதும் உண்டு.

பினாமிகள்

வருமானவரிப் புகலிடத்தில் அரசியல்வாதிகள் முதலீடு செய்வதற்கு நம்பிக்கைக்குரிய நண்பர் அல்லது உறவினர் தேவை. அதாவது பினாமி தேவை. ஒரு அரசியல்வாதி தன் நாட்டில் கொள்ளை அடித்த பணத்தை தனது பினாமியின் பெயரில் ஒரு இரகசியம் பேணும் வருமானவரிப் புகலிட நாட்டில் முதலீடு செய்யலாம். இந்தியாவில் இருந்து ஏற்றுமதி செய்பவர்கள் வருமான வரிப் புகலிட நாடுகளில் உள்ள தமது பினாமி நிறுவனங்களுக்கு குறைந்த விலைக்கு ஏற்றுமதி செய்து பின்னர் அங்கிருந்து வேறு நாடுகளுக்கு அதிகரித்த விலைக்கு ஏற்றுமதி செய்வார்கள். இதனால் அந்தப் பினாமி நிறுவனம் பெரும் நிதியைத் திரட்டும். பின்னர் இந்த நிதி வெளிநாட்டு முதலீடு என்னும் முகமூடியுடன் இந்தியாவிற்கு வரும். அந்த முதலீட்டுக்கு வரிவிலக்கும் வழங்கப்படும்.

பணச் சலவையும் வருமானவரிப் புகலிடமும்.

உலகில் அதிக அளவு வெளிநாட்டு வர்த்தக நிறுவனங்கள் பதிவு செய்த பிராந்தியமாக ஹொங் கொங் இருக்கின்றது. பிரித்தானியாவின் முடிக்குரிய பிராந்தியாமான வேர்ஜின் தீவுகள் இரண்டாம் இடத்திலும் பனாமா நாடு மூன்றாம் இடத்திலும் இருக்கின்றன. பனாமாவில் தற்போது 350,00இற்கும் அதிகமானா நிறுவனங்கள் பதிவு செய்யப் பட்டுள்ளன.  பனாமாவில் சட்ட விரோத நிதிகளை சட்டபூர்வ நிதியாக மாற்றுவதை பணச் சலவை (money laundering) செய்தல் என்பர். பனாமா புவியியல் ரீதியாக உலகின் பெருமளவு போதைப் பொருள் உற்பத்தி செய்யும் லத்தின் அமெரிக்க நாடுகளுக்கும் உலகில் முதலீட்டுக்குப் பாதுகாப்பான இடமான ஐக்கிய அமெரிக்காவிற்கும் இடையில் இருக்கின்றது. பனாமா ஊடகவியலாளர் ஒருவர் பணச் சலவை என்று வரும் போது எமது நாட்டில் நன்றாக நனைத்து துவைத்துக் காய வைத்துக் கொடுப்போம் என்றார். சிறந்த வருமானவரிப் புகலிடமும் பணச்சலவை செய்யும் இடமுமான பனாமா நிதி மோசடியாளர்களின் சொர்க்கமாகும். பனாமாவில் வருமான வரி தொடர்பாகவும் சட்டம் தொடர்பாகவும் வல்லுனர்களைக் கொண்ட பல நிறுவனங்கள் வெளிநாடுகளைச் சேர்ந்தவர்களுக்கும் நிறுவனங்களுக்கும் ஆலோசனைகளும் உதவிகளும் செய்து பிழைப்பு நடத்துகின்றன. பணச்சலவைக்கு எதிரான பன்னாட்டுக் கூட்டமைப்பான நிதி நடவடிக்கைப் பணிப் படை { Financial Action Task Force (FATF)} பனாமா நாட்டை தனது சாம்பல் நிறப்பட்டியலில் சேர்த்துள்ளது. இலகுவாக வர்த்தக நிறுவனங்களைப் பதிவு செய்தல், நடவடிக்கைப் பதிவேடுகள் தொடர்பாகக் கட்டுப்பாடுகள் இன்மை போன்றவை பனாமாவை இந்தப் பட்டியலில் வைத்திருக்கின்றது. அனாமதேய சமூக அமைப்பு (anonymous society) என வகைப்படுத்தி பனாமாவில் பெயர்கள் வெளிவிடாமல் நிறுவனங்களைப் பதிவு செய்யலாம். அப்படிப் பதிவு செய்யப் பட்ட நிறுவனங்களின் உரிமையாளர்கள், சொத்துக்கள் பற்றிய விபரம் யாருக்கும் வெளிவிடப்படமாட்டாது. பனாமாவில் பதிவு செய்யப்பட்ட நிறுவனங்கள் (Corporations) தமது கணக்குகளை சட்டப்படி ஆய்வு செய்யத் தேவையில்லை. வாருமானவரித் துறைக்கு தமது வருமானம் மற்றும் சொத்துக்கள் தொடர்பான விபரங்களைச் சமர்ப்பிக்கத் தேவையில்லை. பன்னாட்டு வர்த்தக நடவடிக்கைக்களுக்கு பனாமாவில் வரி கட்டத் தேவையில்லை.

ரோனி பிளேயர்

பிரித்தானியாவின் முன்னாள் தலைமை அமைச்சர் ரோனி பிளேயரும் அவரது துணைவியாரும் இலண்டன் நகரின் நடுப்பகுதியில் உள்ள 6.5மில்லியன் பவுண்கள் பெறுமதியான ஒரு கட்டிடத்தை வாங்கியுள்ளனர். அதை அவர்கள் பிரித்தானியாவில் வாங்கி இருந்தால் அதற்கான முத்திரைக் கட்டணமாக மூன்று இலட்சத்து பன்னிரண்டாயிரம் பவுண்களுக்கு மேல் செலவழித்திருக்க வேண்டும். அதைத் தவிர்ப்பதற்காக அந்தக் கட்டிடத்தின் உரிமையாளராக இருக்கும் நிறுவனத்தை வருமானவரிப் புகலிட நாடு ஒன்றில் வாங்கினார்கள். விற்பனையாளர்கள் பாஹ்ரேன் அரசுடன் தொடர்புள்ளவர்கள். அவர்கள் பிரித்தானியாவில் மூலதன ஆதாய வரியை தவிர்ப்பதற்காக அப்படி விற்பனை செய்ததாக செர்ரி பிளேயர் தெரிவித்துள்ளார். அக்கட்டிடத்தின் உரிமம் உள்ள நிறுவனத்துக்கு சொந்தக்காரர்களாக பிளேயார் தம்பதிகள் இப்போது இருக்கின்றார்கள். இந்த நடவடிக்கையில் எந்த ஒரு பிரித்தானியச் சட்டமும் மீறப்படவில்லை. ஆனால் அவர்கள் முத்திரைக் கட்டணத்தை தவிர்த்துள்ளார்கள்.

மூலதன ஆதாய வரி தவிர்ப்பு

பிளேயர் தம்பதிகள் செய்தது போல் பிரித்தானியாவில் உள்ள 1500 கட்டிடங்கள் விற்பனை செய்யப்பட்டு மூலதன ஆதாய வரி மற்றும் முத்திரைக் கட்டணங்கள் தவிர்க்கப்பட்டுள்ளன. கட்டார்(கத்தார்) அரச குடும்பம் பிரித்தானியாவில் £18.5 மூலதன வரியை தவிர்த்துள்ளது. ஜோர்தான் நாட்டு அரசர் பிரித்தானியாவிலும் அமெரிக்காவிலும் பல மில்லியன்கள் பெறுமதியான சொத்துக்களை புகலிட நாட்டு நிறுவனங்கள் மூலம் வாங்கியுள்ளார்.

இலஞ்சம் கொடுக்க சிறந்தவழி

ஒரு நாட்டின் அமைச்சருக்கு  இலஞ்சம் கொடுக்கும் போது அவரும் பிடிபடாமல் இலஞ்சம் கொடுப்பவரும் பிடிபடாமல் இருக்க வருமான வரிப்புகலிடம் சிறந்த வழி வகுக்கின்றது. பிரித்தானியாவில் அல்லது அமெரிக்காவில் ஆடம்பர வீட்டை வைத்திருக்கும் (பனாமா போன்ற நாடுகளில்) நிறுவனத்தை குறித்த அமைச்சர் பெயருக்கு மாற்றி விடுவார்கள்.  நைஜீரியாவின் எரிபொருள் துறை அமைச்சருக்கு இப்படி பெருமளவு இலஞ்சத்தை உலக எரிபொருள் நிறுவனங்கள் கொடுத்ததாக குற்றம் சாட்டப்படுகின்றது. உலகின் எல்லா முன்னணிச் செல்வந்தர்களுக்கும் வருமானவரிப் புகலிடம் கொடுக்கும் நாடுகளில்/பிராந்தியங்களில் பெருமளவு சொத்துக்கள் இருக்கின்றன. இஸ்ரேலைச் சேர்ந்த செல்வந்தர் ஒருவர் கொங்கோ நாட்டில் பல நூறு மில்லியன்களைத் திருடி வருமான வரிப்புகலிடங்களில் வைத்திருக்கின்றார். அவரை சட்டத்தின் முன் நிறுத்த முடியவில்லை. 

பொருளாதார தடை தவிர்ப்பு

அமெரிக்காவால் பொருளாதாரத் தடை விதிக்கப்பட்ட ஏழுக்கும் மேற்பட்ட இரசிய பெருஞ்செல்வந்தர்கள் வருமான வரிப் புகலிட நாடுகளில் தமது சொத்துக்களைத் திரட்டி வைத்திருக்கின்றனர். பணச்சலவை செய்வதற்கு அதாவது சட்ட விரோத செல்வத்தை சட்டபூர்வமான செல்வமாக மாற்றுவதற்கு சிறந்த இடம் வருமான வரிப்புகலிட நாடுகளாகும். படைக்கலன் கடத்துபவர்கள், போதைப் பொருள் விற்பனையாளர்கள், மனிதர்களைக் நாடுகளுக்கு நாடு கடத்துபவர்கள் தமது சட்ட விரோத செல்வத்தை வருமான வரிப்புகலிட நாடுகளில் வைத்திருக்கின்றனர். 

இந்தியர்கள் மட்டும் சளைத்தவர்களா?

இந்தியாவின் துடுப்பாட்ட சாதனையாளர் சச்சின் டென்டுல்கர், தொழிலதிபர்கள் கிரண் மஜூம்தார் ஷா, அனில் அம்பானி எனப்பல இந்தியர்கள் பண்டோரா பத்திரங்களில் உள்ளனர். அனில் அம்பானிக்கு சொந்தமான பல நிறுவனங்கள் வருமானவரிப் புகலிடங்களில் உள்ளன. ஆனால் அவர் ஒரு கடனாளியாக தன்னைக் காட்டி தனக்கு சொத்து ஏதும் இல்லை எனப் பிரகடனப் படுத்தியுள்ளார். பாக்கிஸ்த்தான் மட்டும் சும்மாவா? இம்ரான் கான் உட்பட பல அரசியல்வாதிகள் தொடர்பான பண்டோரா பத்திரங்கள் வெளியிடப்பட்டுள்ளன.

திருடராய்ப் பார்த்து திருந்தாவிட்டால் திருட்டை ஒழிக்க முடியாது – பட்டுக்கோட்டை கல்யாணசுந்தரனார்.  

குவாட் அமைப்பின் கூட்டறிக்கை சொல்லும் செய்தி

  

வெள்ளை மாளிகையில் குவாட் உரையாடல் நாடுகளான ஒஸ்ரேலியா, இந்தியா, ஜப்பான், ஐக்கிய அமெரிக்கா செப்டம்பர் 24-ம் திகதி கூடிக் கலந்தாலோசித்து ஒரு கூட்டறிகையை வெளிவிட்டமை வெறும் உரையாடல் மட்டும் கொண்ட ஒரு “மினக்கெட்டான் வேம்படி” தான் இந்த குவாட் என்ற நையாண்டிக்கு முற்றுப்புள்ளி வைத்துள்ளது. “உரையாடலில்” இருந்து “ஒத்துழைப்பு” என்ற நிலைக்கு குவாட் மாறியுள்ளது. ஆனாலும் “சீனா”, “படைத்துறை ஒத்துழைப்பு”, “தைவான்” ஆகிய இரண்டு பதங்களும் கூட்டறிக்கையில் காணப்படவில்லை.

குவாட் அமைப்பின் கூட்டறிக்கையை இந்த இணைப்பில் காணலாம்:

QUAD Joint Statement

குவாட் கூட்டறிக்கை

குவாட் அமைப்பின் கூட்டறிக்கையில் கொவிட்-19 என்பது 12 தடவையும் ஒத்துழைப்பு என்பது 10 தடவையும் இந்தோ-பசுபிக் என்பது ஆறு தடவையும் ஆப்கானிஸ்த்தான் என்பது 3 தடவையும் வட கொரியா என்பது ஒரு தடவையும் பயங்கரவாதம் என்பது இரண்டு தடவையும் உள்ளன. 5G என்பதப் பற்றி ஒரு பந்தியே உள்ளது. முதற் பந்தியிலேயே திறந்ததும் சுதந்திரமானதுமான இந்தோ பசுபிக் என்பது குறிப்பிடப்பட்டுள்ளது. இவற்றை வைத்துக் கொண்டு எந்தத் துறைகளில் குவாட் ஒத்துழைக்க வாய்ப்புக்கள் உள்ளன என்பதை நன்கு அறிய முடியும்.

கலங்கிய மோடிக்கு கைகொடுக்குமா குவாட்?

2020 மே மாதம் இந்தியாவிற்கும் சீனாவிற்கும் இடையில் லடாக் பிரதேசத்தில் நடந்த மோதலின் போது இந்திய தலைமை அமைச்சர் மோடி மிகவும் கலங்கிய நிலையில் அமெரிக்க அதிபர் டொனால்ட் டிரம்பிடம் முறையிட்டார். சொல்லி அழுதாரோ தெரியவில்லை. இந்தியா குவாட் அமைப்பில் இணைவதால் சீனாவிடமிருந்து இந்தியாவை குவாட் பாதுகாக்கும் இன இந்திய மக்களை இந்தியாவின் “பொய் ஹிந்த்” யூடியூப் சனல் கும்பல்கள் தொடர்ச்சியாக நம்பவைத்துக் கொண்டிருக்கின்றன. அருணாச்சலப் பிரதேசம் போன்ற இந்தியப் பிரதேசங்களை சீனா ஆக்கிரமிப்பதற்கு போர் தொடுத்தால் இந்தியாவுடன் இணைந்து ஒஸ்ரேலியா, ஜப்பான், ஒஸ்ரேலியா ஆகிய நாடுகள் சீனாவிற்கு எதிராக போர் செய்யுமா என்பதை குவாட் அமைப்பின் தற்போதைய நிலைப்பாடு உறுதி செய்யவில்லை.

Trump: “Modi was in a bad mood”

படைத்துறை ஒத்துழைப்பு பற்றி கூட்டறிக்கையில் குறிப்பிடப்படவில்லை. குவாட் அமைப்பில் உள்ள நான்கு நாடுகளின் வெளிநாட்டு அமைச்சர்கள் பல் வேறு அரசுறவியலாளரகள், அரச தலைவர்கள் இனிவரும் காலங்களில் சந்தித்து உரையாடுவாரகள் என அறிக்கையில் குறிப்பிடப்பட்டுள்ளது. பாதுகாப்புத்துறை அமைச்சரகள், இந்தோ-பசுபிக் பிராந்திய படைத்தளபதிகள் மட்டத்தில் சந்திப்போ கலந்துரையாடலகளோ நடக்கும் என அறிக்கையில் குறிப்பிடப்படவில்லை. படைத்துறை ஒத்துழைப்பு இல்லாமல் இந்தியாவை சீனாவிடமிருந்து எந்த வகையில் குவாட் பாதுகாக்கும் என்பது கேள்விக் குறியே! கூட்டறிக்கையின் நான்காம் பத்தியில் பிராந்திய ஒருமைப்பாட்டை ஆதரிப்போம் என்ற வாசகம் காணப்படுகின்றது. இரண்டாம் பத்தி:

2. Together, we commit to promoting a free, open rules-based order, rooted in international law to advance security and prosperity and counter threats to both in the Indo-Pacific and beyond. We support the rule of law, freedom of navigation and overflight, peaceful resolution of disputes, democratic values, and territorial integrity. We commit to work together and with a range of partners. We reaffirm our strong support for ASEAN’s unity and centrality as well as the ASEAN Outlook on the Indo-Pacific. Full of potential, the Quad looks forward to the future; it seeks to uphold peace and prosperity and strengthen democratic resilience, based on universal values.

மோடி மிரட்டப்பட்டாரா என்பது பற்றிய முந்தைய பதிவை இந்த இணைப்பில் காணலாம்:

சீனாவின் மிரட்டலுக்கு மோடி அஞ்சினாரா?

2018 ஜூலை மாதம் 23-ம் திகதி Foreign Policy சஞ்சிகையில் India is the Weakest Link in Quad என்றதலைப்பில் ஒரு கட்டுரை வெளிவந்தது. அதில் குவாட் ஒரு படைத்துறைக் கூட்டமைப்பாக உருவாகும் எனவுக் கூறப்பட்டிருந்தது.

விதிகளை அடிப்படையாகக் கொண்ட பன்னாட்டு ஒழுங்கிற்கு commit என்ற பதம் பாவிக்கப்பட்டுள்ளது. பிராந்திய ஒருமைப் பாட்டிற்கு support என்ற பதம் பாவிக்கப்பட்டுள்ளது. குவாட் என்பது நேட்டோ போன்றது என்போர் இவற்றைக் கவனிக்க வேண்டும். குவாட் என்ற அமைப்பிற்கான அமைப்பு விதிகளோ அல்லது ஆய்வி வீச்சளவோ (Terms of references) இன்னும் உருவாக்கப்படவில்லை. எந்த ஒரு புரிந்துணர்வு பதிவுக்குறிப்பு (memorandum of understanding) கூடக் கைச்சாத்திடவில்லை. குவாட் என்பதை ஒரு முறைசாரா அமைப்பாகவே பன்னாட்டு அரசியல் விமர்சகர்கள் குறிப்பிடுகின்றார்கள். அந்த வகையில் நேட்டோவும் குவாட்டும் மலையும் மடுவும் போன்றவை.

குவாட்டின் இலக்கு சீனாதான்

குவாட் முழுக்க முழுக்க சீனாவை எதிர்கொள்ளத்தான் என அத்துடன் சம்பந்தப்பட்டவர்கள் பகிரங்கமாக அறிவிக்காத போதிலும் குவாட் அமைப்பு சீன ஆதிக்கத்தை சமாளிப்பதற்கு என உருவாகிக் கொண்டிருக்கின்றது. Centre for New American Security என்னும் நிறுவனத்தின் முதன்மை நிறைவேற்று அதிகாரி Richard Fontaine “நான்கு நாடுகளுக்கும் இடையில் ஒரு தீவிரமான பங்காண்மை மலர்ந்து கொண்டிருக்கின்றது என்பதை பார்க்காமல் இருப்பதற்கு நீங்கள் உங்கள் கண்களை கடுமையாக முடிக் கொள்ள வேண்டும்” என்கின்றார். 2004-ம் ஆண்டு ஏற்பட்ட சுனாமியால் இந்தோ பசுபிக் நாடுகள் பாதிப்படைந்த போது அதைச் சாட்டாக வைத்து அந்த நாடுகளுக்கு உதவி செய்யும் போர்வையில் சீனப் படைகள் செல்வதைத் தடுக்க ஒஸ்ரேலியா, இந்தியா, ஜப்பான், அமெரிக்கா ஆகிய நாடுகள் ஒத்துழைத்து அந்த நாடுகள் மீண்டு எழுவதற்கு உதவி செய்தன. அதை அடிப்படையாக வைத்து நான்கு நாடுகளும் பல வகையிலும் ஒத்துழைக்க வேண்டும் என முன்னாள் ஜப்பான் தலைமை அமைச்சர் சின்சோ அபே முன்வைத்த திட்டமே குவாட் அமைப்பை உருவாக்கும் எண்ணக் கருவிற்கு வழிவகுத்தது. ஆனால் சீனாவின் பொருளாதாரத்தைச் சார்ந்து வளர்ந்து கொண்டிருந்த ஒஸ்ரேலியாவும் சீனாவுடன் பகைமையை வளர்ப்பதைத் தவிர்க்க விரும்பிய இந்தியாவும் குவாட்டில் முழுமையாக ஈடுபடத் தயக்கம் காட்டின. இதனால் கிடப்பில் பத்து ஆண்டுகளுக்கு மேல் அத்திட்டம் வைக்கப்பட்டிருந்தது. 2017இல் சீனாவிற்கும் இந்தியாவிற்கும் இடையில் நடந்த டொக்லம் முறுகலின் பின்னர் இந்தியாவின் நிலைப்பாடு மாறியது. டொனால் டிரம்ப் குவாட் அமைப்பை உருவாக்கும் முயற்ச்சியை மீள் ஆரம்பித்தார். சீனாவின் படைத்துறை, பொருளாதாரம், தொழில்நுட்பம் ஆகிய துறைகளில் எட்டிய துரித வளர்ச்சியும் சீனாவின் பிராந்திய ஆதிக்க நகர்வுகளும் குவாட்டை மீள உருவாக்க வழிவகுத்தது.

நாளைய இந்தியா இன்றைய சீனா ஆகலாம்?

அமெரிக்கா, பிரித்தானியா, பிரான்ஸ் ஆகிய நாடுகள் மத்திய தரைக்கடலில் ஆதிக்கம் செலுத்துவது போல் சீனாவும் தென் சீனக் கடலில் தனது ஆதிக்கத்தை நிலைநாட்ட முயல்கின்றது. அதைத் தடுப்பது குவாட் அமைப்பின் நோக்கம் என்பதும் தொழில்நுட்பம், கடல்சார் சட்டம், மருத்துவம் போன்ற துறைகளில் குவாட் நிச்சயமாக ஒத்துழைக்கும். அது நேட்டோபோல் ஒரு படைத்துறை ஒத்துழைப்பு நாடாக உருவாகுவது சீனாவின் எதிர்கால நடவடிக்கைகளில் தங்கியுள்ளது. நேட்டோ போன்ற ஒரு கூட்டமைப்பை இந்தியாவுடன் உருவாக்க அமெரிக்கா விரும்பவில்லை என்பதையே AUKUS என்ற ஒஸ்ரேலியா, பிரித்தானியா அமெரிக்கா ஆகிய நாடுகளைக் கொண்ட அமைப்பு உருவாக்கப்பட்டுள்ளமை சுட்டிக் காட்டுகின்றது. நேட்டோ அமைப்பு தனது படைத்துறை தொழில்நுட்பங்களை ஒவ்வொரு நாடும் மற்ற நாடுகளுடன் பகிர்ந்து கொள்ளும். இந்தியாவுடன் ஒரு முழுமையான படைத்துறைத் தொழில்நுட்ப பகிர்வைச் செய்ய அமெரிக்கா தயங்குகின்றது. இன்று சீனாவால் அமெரிக்காவின் உலக ஆதிக்கத்திற்கு எழுந்துள்ள சவால் இன்னும் இருபது ஆண்டுகளிற்கு பின்னர் இந்தியாவால் எழுவதற்கு வாய்ய்பு உண்டு.

மலபார் போர்ப்பயிற்ச்சி

2020-ம் ஆண்டு நவம்பர் மாதம் அரபிக் கடலில் இந்தியாவுடன், ஒஸ்ரேலியா, ஜப்பான், அமெரிக்கா ஆகிய நாடுகளின் கடற்படைகள் இணைந்து நடத்திய போர்ப்பயிற்ச்சியை குவாட்டின் ஒரு பகுதியாகப் பார்க்க முடியும். ஆனால் குவாட் நாடுகள் சீனாவிற்கு எதிரான கூட்டணி நாம் என பகிரங்கமாக அறிவித்து சீனாவை உசுப்பேற்ற விரும்பவில்லை என்பதை நன்கு அறிய முடிகின்றது. அதேவேளை சீனாவை அழிக்க உருவான கூட்டணிதான் குவாட் என்பது அப்பட்டமான அபத்தம்.

குவாட் கூட்டல் (QUAD+)

குவாட் கூட்டமைப்பில் தற்போது உள்ள ஒஸ்ரேலியா, இந்தியா, ஜப்பான் மற்றும் ஐக்கிய அமெரிக்காவைத் தவிர மேலதிகமாக தென் கொரியா, நியூசிலாந்து, வியட்னாம் ஆகிய நாடுகள் இணைந்து கொள்ள விருப்பம் தெரிவித்துள்ளன. பிலிப்பைன்ஸில் ஆட்சி மாற்றம் ஏற்பட்டால் அதுவும் இணைந்து கொள்வதற்கு வாய்ப்புண்டு. புவிசார் சூழலை வைத்துப் பார்க்கும் போது ஆசிய பசுபிக் பிராந்தியத்தில் முக்கிய திருகுப்புள்ளியான மலபார் நீரிணையை ஒட்டியுள்ள மலேசியாவின் ஒத்துழைப்பு குவட்டின் நோக்கத்தை நிறைவேற்ற மிக அவசியம்.

 

GSP+ வரிச்சலுகையும் இலங்கையும்

  

1971-ம் ஆண்டு நடந்த UNITED NATIONS CONFERENCE ON TRADE AND DEVELOPMENT (UNCTAD) இன் கூட்டதில் வளர்ச்சியடைந்த நாடுகள் வளரும் நாடுகளுக்கு இறக்குமதி வரிச்சலுகை வழங்க வேண்டும் என்ற வேண்டுகோள் விடுக்கப்பட்டது. அதன் அடிப்படையில் உருவானதுதான் GSP எனச் சுருக்கமாக அழைக்கப்படும் Generalized System of Preferences அதாவது பொதுப்படுத்தப்பட்ட சலுகைகளின் முறைமை.

GSP என்பது ஒரு தரப்பான வரிச்சலுகையாகும். இரு தரப்பு வரிச்சலுகையில் இரண்டு நாடுகளும் வரிச்சலுகை வழங்க வேண்டும். ஐரோப்பிய ஒன்றியத்தின் GSP என்னும் இறக்குமதி வரிச்சலுகையை வழங்கும் நாடுகள் ஐரோப்பிய ஒன்றியத்திற்கு எந்தவிதமான வரிச்சலுகையையும் Generalized System of Preferences வழங்க வேண்டியதில்லை.

நாடுகளின் வருமான அடிப்படையில் GSP சலுகைகள் வழங்கப்படுகின்றன. நடுத்தர வருமானமுள்ள நாடுகளுக்கு(வியட்நாம், இந்தோனேசியா) GSP சலுகையும் பாதிப்படையக்கூடிய பொருளாதாரத்தைக் கொண்டுள்ள நாடுகளுக்கு GSP+ சலுகையும் வழங்கப்படுகின்றன. இவை தவிர மிகக் குறைந்த வருமானம் உள்ள நாடுகளுக்கு (பாங்களா தேசம், ஆப்கானிஸ்த்தான்) EBA எனச் சுருக்கமாக அழைக்கப்படும் Everything but Arms (படைக்கலன்களைத் தவிர எல்லாம்) என்னும் வரிச்சலுகைகள் வழங்கப்படுகின்றன. அச்சலுகைகள் கிடைக்கும் நாடுகள் படைக்கலன்களைத் தவிர மற்ற எல்லா பொருட்களையும் இறக்குமதி வரியின்றி ஐரோப்பிய ஒன்றிய நாடுகளுக்கு ஏற்றுமதி செய்ய முடியும். சிறந்த உட்கட்டுமானங்களையும் அரச உதவிகளையும் கொண்ட சீனாவில் இருந்து செய்யப்படும் ஏற்றுமதிகளைக் குறைத்து மற்ற நாடுகளில் இருந்து ஐரோப்பிய ஒன்றியத்திற்கான ஏற்றுமதியை அதிகரிப்பதே இச் சலுகைகளின் உள் நோக்கம் எனவும் கருதப்படுகின்றது.

ஆர்மினியா, பொலிவியா, கேப் வேர்டா, கிரிகிஸ்த்தான், மங்கோலியா, பாக்கிஸ்த்தான், மங்கோலியா ஆகிய நாடுகளுக்கு GSP+ சலுகை வழங்கப்படுகின்றன. ஆப்கானிஸ்த்தான், பங்களாதேசம் உள்ளிட்ட 49 நாடுகளுக்கு EBA வரிச்சலுகை வழங்கப்படுகின்றன.

GSP என்னும் இறக்குமதி வரிச்சலுகையின் நோக்கங்கள்:

1. வளரும் நாடுகளின் ஏற்றுமதி வருமானத்தை அதிகரித்தல்

2. வறுமையைக் குறைத்தல்

2. பொருளாதார அபிவிருத்தியை ஊக்குவித்தல்

3. நல்லாட்சியை ஏற்படுத்தல்

இலங்கைக்கான GSP+ 2017 மே மாதம் வழங்கப்பட்டது. அது 2023வரை நடைமுறையில் இருக்கும். அதனால் இலங்கை $500மில்லியன் பெறுமதியான நன்மையைப் பெற்றுள்ளது.

 

GSP வரிச்சலுகையின் நிபந்தனைகள்

மனித உரிமைகள், தொழிலாளர் உரிமைகள், சூழல் போன்றவற்றில் பன்னாட்டு மரபொழுங்குகளைப்(conventions) பேணவேண்டும். ஐரோப்பிய ஒன்றியம் இதற்கென 27 பன்னாட்டு மரபொழுங்குகளைப் பட்டியலிட்டுள்ளது. இதன் உள் நோக்கம் விதிகளை அடிப்படையாகக் கொண்ட பன்னாட்டு ஒழுங்கை (Rule Based International Order) பேணுவதாகும்.

ஐரோப்பிய நாடாளுமன்றம் எடுத்த முடிவு

2021 ஜூன் மாதம் இலங்கையின் பயங்கரவாதத் தடைச் சட்டம் மனித உரிமைகளை மீறுவதாகவும் இலங்கையில் நடக்கும் மனித உரிமை மீறல்களைக் கருத்தில் கொண்டும் இலங்கைக்கான GSP+ இறக்குமதி வரிச்சலுகையை நிறுத்தும் நடவடிக்கைகளை எடுக்கக் கோரும் முடிவு ஒன்றினை ஐரோப்பிய ஒன்றியத்தின் பாராளமன்றம் எடுத்தது. அதன் அடிப்படையில் இலங்கைக்கான GSP+ இறக்குமதி வரிச்சலுகையை மீளாய்வு செய்வதற்கான ஐரோப்பிய ஒன்றியம் ஐவர் கொண்ட ஒரு குழுவை இலங்கைக்கு 2021 செப்டம்பர் 27-ம் திகதி அனுப்பியுள்ளது. அவர்கள் அங்கு ஒரு வாரம் தங்கியிருந்து இலங்கை அரச அதிபர், உற்பத்தியாளர்கள், தொழிற்சங்கப் பிரதிநிதிகள், மனித உரிமைச் செயற்பாட்டாளர்கள் போன்றோரைச் சந்திக்கின்றார்கள். பின்னர் அவரகள் தமது அறிக்கையை ஐரோப்பிய ஒன்றியத்தின் பாராளமன்றத்திற்கு சமர்பிப்பர்.  மனித உரிமைக் கண்காணிப்பகம் இலங்கைக்கான GSP+ இறக்குமதி வரிச்சலுகையை ஒரு கருவியாகப் பயன்படுத்தில் இலங்கையின் மனித உரிமை மீறல்களை தடுக்க வேண்டும் என்ற கோரிக்கையை ஐரோப்பிய ஒன்றியத்திடம் விடுத்துள்ளது.

GSP+வரிச்சலுகை ஓர் அரசுறவியல் கருவியா?

GSP+வரிச்சலுகை பெறும் துறைகளில் நான்கு இலட்சம் பேர் வேலை செய்கின்றனர். அது இலங்கையின் வேலைவாய்ப்பில் 15% ஆகும். அதில் 90% பெண்களாகும். 2010-ம் ஆண்டு மஹிந்த ராஜபக்ச அதிபராக இருந்தபோது இலங்கைக்கான GSP+வரிச்சலுகை நிறுத்தப்பட்டது. குடிசார் உரிமைகள், அரசியல் உரிமைகள், சிறுவர் உரிமைகள், சித்திரவதை ஆகியவற்றைக் கருத்தில் கொண்டு நிறுத்தப்பட்டது. ஏழு ஆண்டுகளின் பின்னர் மைத்திரிபால சிறீசேன அதிபராக இருந்த போது மீளவும் வழங்கப்பட்டது. GSP+வரிச்சலுகை ஒரு அரசுறவியல் கருவியாகப் பாவிக்கப்படுகின்றது என கருத இடமுண்டு.

Soft Equity Research என்ற நிறுவனம் இலங்கைக்கான GSP+ இறக்குமதி வரிச்சலுகை நிறுத்தப்பட்டால் ஏற்படவிருக்கும் விளைவுகள் பற்றிச் செய்த ஆய்வின் முடிவுகள்:

1. GSP+ ஏற்றுமதிச் செயற்பாட்டை அதிகரித்தது

2. GSP+ஐ இழப்பது பரந்த அளவிலான வெற்றிடத்தை ஏற்படுத்தாது.

3. ஐரோப்பிய ஒன்றியத்திற்கான வருங்கால மேலதிக ஏற்றுமதியைப் பாதிக்கலாம்.

4. சிறு உற்பத்தியாளர்களின் இலாப வரம்பைக் குறைக்கலாம்.

ஐரோப்பிய ஒன்றியம் வழங்கும் ஆகக் கூடிய GSP+வரிச்சலுகை 9.4% ஆகும். இலங்கையினுடைய ரூபாவின் பெறுமதி அண்மைக் காலங்களாக 9.4% இலும் அதிக மாக தேய்மானம் அடைந்த நிலையில் டொலரின் மதிப்பில் இலங்கையில் உற்பத்திச் செலவு குறைந்துள்ளமையால் GSP+வரிச்சலுகை நிறுத்தப்பட்டால் ஏற்படும் இழப்பு ஏற்கனவே ஈடு செய்யப்பட்டு விட்டது எனச் சொல்லலாம்.

GSP+வரிச்சலுகை நிறுத்தப்படும் போது இலங்கையின் ஏற்றுமதி பாதிக்கப்படும். ஏற்றுமதி குறையும் போது இலங்கையின் ரூபாவின் பெறுமதி குறைவடையும். அந்த வகையில் GSP+வரிச்சலுகை நிறுத்தப்படும் போது ஏற்படும் இழப்பீடு ஈடு செய்யப்படும். வெளிநாட்டு கொள்வனவாளர்களின் கொள்வனவு விலையில் பெரும் பாதிப்பு ஏற்படாது. 01/01/2019 ஒரு அமெரிக்க டொலர் ரூபா 180.66 ஆக இருந்ட்தது. 31/08/2021இல் அது ரூபா 198.98 ஆக இருக்கின்றது. இக்காலத்தில் இலங்கை ரூபாவின் பெறுமதி 9%இற்கு மேல் வீழ்ச்சியடைந்துள்ளது.

GSP+வரிச்சலுகை பெறும் இலங்கை உற்பத்தியாளர்கள் GSP+வரிச்சலுகை நிறுத்தப்படுவதையிட்டு பெரிதும் கவலையடைந்துள்ளார்கள். Marks & Spencer, Next போன்ற நிறுவனங்களுக்கு உற்பத்தி செய்யும் Boteju Industriesஇன் உரிமையாளர் Janaka Boteju GSP+வரிச்சலுகை நிறுத்தப்படுவது எமது நிறுவனத்திற்கு இறப்பு வீடு (It is like a funeral for us) போன்றது என்றார். தற்போது இலங்கை மக்கள் எதிர் கொள்ளும் நெருக்கடியை மனதில் கொண்டு உடனடியாக GSP+வரிச்சலுகை ஐரோப்பிய ஒன்றியம் நிறுத்தாமல் கால அவகாசம் வழங்க வாய்ப்புண்டு. 2008-ம் ஆண்டு இலங்கைக்கான GSP+வரிச்சலுகையை நிறுத்தும் முயற்சியை ஐரோப்பிய ஒன்றியம் முன்னெடுத்தது. அது Marks & Spencerஇன் இரகசிய நடவடிக்கைகளால் இரண்டு ஆண்டு கால அவகாசம் கொடுக்கப்பட்டது. 

GSP+வரிச்சலுகை நிறுத்தப்பட்டவுடன் இலங்கையில் உற்பத்தி செய்யும் நிறுவனங்கள் உடனடியாக தமது உற்பத்தியை தூக்கிக் கொண்டு போய் பங்களாதேசத்தில் வைத்துவிடும் என்பது போல் கருத்துத் தெரிவிப்பது சுத்த அபத்தமாகும். GSP+வரிச்சலுகை நிறுத்தினால் ஏற்படும் இழப்பை தமது உற்பத்தி செலவை கட்டுப்படுத்துவதன் மூலம் சமாளிக்கலாம். மூலப்பொருள்கள் வழங்குவோருடன் பேச்சு வார்த்தை நடத்தி அவர்களிடம் விலைக் குறைப்பைக் கேட்கலாம். ஊழியர்களின் ஊதியத்தைக் குறைக்கலாம். உற்பத்தி திறனை அபிவிருத்தி செய்யலாம். 2019 நவம்பரில் இலங்கை அரசு தனது வரி விதிப்பை குறைத்துள்ளது. 2010-ம் ஆண்டு ஐரோப்பிய ஒன்றியம் GSP+வரிச்சலுகையை நிறுத்திய போது அதில் தொடர்புடைய எத்தனை நிறுவனங்கள் இழுத்து மூடப்பட்டன?

Evergrandeயின் வீழ்ச்சி சீனாவை வீழ்த்துமா?

  

ஒரு நாட்டில் உள்ள 300 பில்லியன் டொலர் கடன் பட்ட ஒரு தனியார் நிறுவனம் நிதி நெருக்கடியைச் சந்தித்தால் அந்த நாட்டின் பொருளாதாரத்தில் அது ஒரு பூகம்பமாக அமையும். ஆனால் சீனாவில் அது நிகழப்போவதில்லை. சீன அரசு தனது நாட்டு பொருளாதாரத்தையும் தனியார் நிறுவனங்களையும் தனது இறுக்கமான கட்டுப்பாட்டில் வைத்திருக்கின்றது. Evergrande Real Estate சீனாவில் இரண்டாவது பெரிய மெய்ப்பேட்டை(Real Estate) நிறுவனமாகும். உலகிலேயே அதிக கடன் பட்டுள்ள நிறுவனம் அதுவாகும். சீனாவில் 280இற்கும் மேற்பட்ட நகரங்களில் 1,300இற்கும் அதிகமான தொடர் மாடிகளை அது உருவாக்கிக் கொண்டிருக்கின்றது. சீனாவின் பிரபல காற்பந்தாட்டுக் கழகத்தையும் அது வாங்கி வைத்துள்ளது. Evergrande Real Estate இன் உரிமையாளர் சூ ஜியாயின் $10.6பில்லியன் உடமையுள்ள செல்வந்தர்.

இரண்டு மில்லியனுக்கு மேற்பட்ட சீனர்களுக்கு பாதிப்பு

1.6 மில்லியன் சீனர்கள் Evergrandeஇடமிருந்து வீடுகளை வாங்குவதற்காக முற்பணம் செலுத்தியுள்ளனர். 80,000 சீனர்கள் அதில் முதலீடு செய்துள்ளனர். சொந்த வீடு என்பது சீன நடுத்தர வர்க்க மக்களின் பெரும் கனவாகும். Evergrandeயின் நிதி நெருக்கடியில் சீன அரசு துரிதமாகச் செயற்படாமல் நிதானமாக நிற்கின்றது. Evergrandeஇன் உரிமையாளரகள், முதலீட்டாளரகள், கடன் கொடுத்தவர்கள் உரிய பாடம் கற்கட்டும் என சீன அரசு காத்திருக்கின்றது. அதேவேளை தமது சேமிப்புக்களை முதலீடு செய்த சேமிப்பாளர்களுக்கு நம்பிக்கையூட்டும் வகையில் சீன அரசு செயற்படுகின்றது. அவர்கள் கிளர்ச்சி செய்யத் தூண்டும் அல்லது அவர்களுக்கு அவநம்பிக்கை ஏற்படுத்தும் செய்திகளை சீன அரசு தடை செய்து வருகின்றது.

Evergrande தேய்ந்த வரலாறு

2017இல் Evergrande தனது கடனில் பெருமளவை குறைக்க வேண்டிய நிலை ஏற்பட்டது. அப்போது அதன் கடன் அதன் சொத்தின் பெறுமதியில் 240%ஆக இருந்தது. அதை 70%ஆகக் குறைப்பதாக Evergrande முடிவு செய்தது. 2018இல் ஐரோப்பிய நடுவண் வங்கி Evergrande கண்காணிக்கப்பட வேண்டிய ஒரு நிறுவனம் என்றது.  2020 மார்ச்சில் தனது கடன் பளுவை ஆண்டு தோறும் $23.3 பில்லியனால் (150பில்லியன் யூவானால்) குறைப்பதாக அறிவித்தது. Evergrande தனது கட்டிட விலைகளில் 30%ஐக் குறைத்தது. 2020 ஒக்டோபரில் Evergrande ஹொங் கொங் பங்குச் சந்தையில் தனது இரண்டாம் நிலைப் பங்குகளை விற்று $555மில்லியன்களைத் திரட்டியது. 2020 நவம்பரில் மேலும் தனது பங்குகளை விற்று $1.8பில்லியனைத் திரட்டியது. 2021 ஜூன் மாதம் Fitch நிறுவனம் Evergrandeஐ B+இலிருந்து Bஆக தரம் தாழ்த்தியது. 2021 ஜூன் முதல் ஓகஸ்ட் வரை Evergrandeயின் மாதாந்த விற்பனை அரைவாசியாகக் குறைந்தது.

Evergrande பற்றிய உண்மைகளை வெளியட்டவர்க்கு தண்டனை

2012-ம் ஆண்டு அமெரிக்காவைச் சேர்ந்த பிரபல நிதிச் சந்தைப் பந்தயக்காரரான (Short Seller) Andrew Left என்பவர் Evergrande பட்டகடன்களைத் திருப்பிக் கொடுக்க முடியாது என எச்சரித்ததுடன் அது ஆறுவிதமான கணக்குப் பதிவு முறைகேடுகளைச் செய்து தனது பாரிய கடன்களை மறைக்கின்றது என்றார். ஹொங் கொங்கின் நிதிச்சந்தையை நெறிப்படுத்தும் நிறுவனமான Securities and Futures Commission (SFC) Andrew Left பொய்ச் செய்திகளைப் பரப்புகின்றார் எனக் குற்றம்ம் சாட்டி அவரிடம் இருந்து HK$1.6மில்லியனைத் தண்டப்பணமாக அறவிட்டது. Moody என்கின்ற அமெரிக்காவின் கடன்படுதிறன் தரப்படுத்தும் நிறுவனம் Evergrandeயைப் பற்றி ஆறு எச்சரிக்கைகளை விடுத்திருந்தது அதன் மீதும் ஹொங் கொங் Securities and Futures Commission  குற்றம்சுமத்தி HK$1.4மில்லியன் தண்டமாக அறவிட்டது.

கட்டிடக் குமிழி 

ஒரு நாட்டில் கட்டிடங்களுக்கான தேவை அதிகரிக்கும் போது அவற்றின் விலை அதிகரிக்கும். அதன் மூலம் இலாமீட்ட பல முதலீட்டாளர்கள் கடன்பட்டு கட்டிடங்களைக் கட்டுவாரகள், அளவிற்கு அதிகமாகக் கடன்பட்டு தேவைக்கு அதிகமான கட்டிடங்களைக் கட்டும் போது கட்டிய கட்டிடங்களை விற்பனை செய்ய முடியாத நிலை ஏற்படும். அதனால் அவற்றைக் கட்டியவர்கள் தாங்கள் பட்ட கடன்களை திருப்பிச் செலுத்த முடியாத நிலை ஏற்படும். இதனால் கடன் கொடுத்த வங்கிகள் நிதிநெருக்கடிக்கு உள்ளாகும். 2008-ம் ஆண்டு உலகப் பொருளாதாரம் பின்னடைவைச் சந்தித்த போது சீனாவையும் அது பாதித்தது. அதனால் தனது பொருளாதார வளர்ச்சி குறையாமல் இருக்க சீன அரசு தனது வங்கிகளுக்கும் மாகாண அரசுகளுக்கும் கட்டிடத்துறைக்கும் உட்கட்டுமானத் துறைக்கும் அதிக கடன் வழங்கும் படி அறிவுறுத்தியது. பல தனியார் நிறுவனங்கள் பெருமளவில் கடன் பட்டு கட்டிடங்களைக் கட்டின. தேவைக்கு அதிகமாகக் கட்டிடங்கள் கட்டப்பட்டன. அதில் Evergrande மிக அதிகமான கட்டிடங்களைக் கட்டியது. சீனாவெங்கும் பல தொடர் மாடி வீடுகளைக் கொண்ட கட்டிடங்கள் கட்டி முடிக்கப்படாமல் இருந்து நகரங்களின் அழகைக் கெடுக்கின்றன. அப்படிப்பட்ட பல கட்டிடங்கள் வெடிவைத்து தகர்கப்படுவதும் சீனாவில் நடந்தன. சீனாவின் கட்டுமானத் துறை பற்றிய பிரச்சனை பற்றி அறிய கீழே உள்ள இணைப்பில் சொடுக்கவும்

சீனாவின் கட்டுமானப் பிரச்சனை

சீனாப் பொருளாதரத்தை Evergrande பாதிக்குமா?

சீனர்கள் தமது நாட்டில் உள்ள நிறுவனங்கள் நிதி நெருக்கடியைச் சந்திக்கின்றன என்றவுடன் தமது முதலீடுகளை தமது நாட்டில் இருந்து வேறு நாடுகளுக்கு எடுத்துச் செல்ல முடியாத வகையில் சீன அரசு மூலதன வெளியேற்றத்தைக் கட்டுப்படுத்தி வைஹ்ட்திருக்கின்றது. அதனால் 1997-1998இல் ஆசிய நாடுகளில் நடந்த நிதி நெருக்கடி போல் சீனாவில் நடக்க வாய்ப்பில்லை. ஆனால் Goldman Sach என்ற அமெரிக்க நிறுவனம் சீனாவின் மெய்ப்பேட்டை(Real Estate) துறையில் ஏற்பட்டுக்கொண்டிருக்கும் வீழ்ச்சி சீனாவின் பொருளாதார வளர்ச்சியை 1.4% 4.5% வரை குறைக்கும் என எதிர்வு கூறியுள்ளது.

ஒஸ்ரேலியா பாதிக்கப்படுமா?

1980களில் இருந்து சீனா தொடர்ச்சியாக 40ஆண்டுகளுக்கு மேலாக பொருளாதார வளர்ச்சியைடையும் போது ஒஸ்ரேலியா 1992இல் இருந்து தொடர்ச்சியாக பொருளாதார வளச்சியை அடைந்து வருகின்றது. சீனாவின் கட்டுமானத்துறைக்கு தேவையான இரும்புத்தாது ஒஸ்ரேலியாவில் இருந்தே ஏற்றுமதி செய்யப்படுகின்றது. இரும்புத் தாதின் விலை 2021 மேயில் உச்சத்தைத் (ஒரு தொன் $240) தொட்டு பின்னர் கடும் வீழ்ச்சியைக் கண்டது. 2021 செப்டம்பர் 27-ம் திகதி ஒரு தொன் இரும்புத்தாதின் விலை $109. சீனா தனது உட்கட்டுமானங்களைக் கட்டுப்படுத்தி மட்டுப்படுத்தும் போது ஒஸ்ரேலியாவின் சீனாவிற்கான ஏற்றுமதி பெரிதும் பாதிக்கப்படும். ஆனால் அமெரிக்கா தனது உட்கட்டுமானங்களில் பெருமளவு செலவு செய்யவிருப்பதால் அமெரிக்காவிற்கான ஒஸ்ரேலியாவின் இரும்புத்தாது ஏற்றுமதி இன்னும் ஓரிரு ஆண்டுகளில் அதிகரிக்கும்.

•  சீனாவின் கட்டிடத்துறை நெருக்கடி உலகப் பொருளாதாரத்தைப் பாதிக்காமல் பாதுகாக்க (Ring Fence) முடியும் என்ற கருத்து பொருளியலாளர்களால் பரவலாக முன் வைக்கப்படுகின்றது.

அயர்லாந்தும் ஸ்பெயிலும் 2008இன் பின்னர் நிதி நெருக்கடிக்கு உள்ளான போது அவற்றின் கட்டிடத்துறை உற்பத்தி மொத்த தேசிய உற்பத்தியில் 29விழுக்காடாக இருந்தது. தற்போது சீனாவின் மொத்த தேசிய உற்பத்தியில் 29விழுக்காடு கட்டிடத்துறையில் இருந்து வருகின்றது. ஆனால் சீனா தனித்துவமானது. சீனா Evergrande Real Estateஇன் முதலீட்டாளர்களுக்கு மட்டுப்படுத்தப்பட்ட உதவியைச் செய்யலாம். இரண்டு மில்லியனிலும் அதிகமான சீனர்களில் அதிருப்தியை சீனா சம்பாதிக்க விரும்பாது. ஆனால் சீனக் கட்டிடத்துறை பாதிப்படைவதை சீனா தவிர்க்க விரும்பாது. சீனாவில் வெற்றிடமாக இருக்கும் கட்டிடங்களை விரைவில் நிரப்பக் கூடியவகையில் சீனப் பொருளாதாரம் வளர்வதற்கான அறிகுறிகள் இல்லை. சீனா தற்போது பொருளாதார வளர்ச்சியிலும் பார்க்க பொருளாதாரச் சீர்திருத்தத்தில் அதிக கவனம் செலுத்துகின்றது.  சீன அரசின் தற்போதைய தலையாய நோக்கம் பொதுச் செழுமை எனப்படும் எல்லோரும் எல்லாமே பெற வேண்டும் என்பதே. சீனாவின் தற்போதைய பொருளாதார நோக்கங்கள் பற்றி அறிய கீழ் உள்ள இணைப்பைச் சொடுக்கவும்:

https://www.veltharma.com/2021/09/blog-post.html

BITCOIN: சீனத் தலையிடி நுண்மிய நாணயங்களுக்கு பேரிடி

 

சீனா 2021 செப்டம்பர் 24-ம் திகதி தனது நாட்டில் பிட்கொயின் (Bitcoin) என பரவலாக அறியப்படும் நுண்மிய நாணயங்களை (Cryptocurrencies) உருவாக்குதலையும் (Mining) அதன் மூலம் கொடுப்பனவுகள் செய்வதையும் தடை செய்துள்ளது. உலகிலேயே அதிக அளவு நுண்மியநாணயங்கள் சீனாவில் உருவாக்கப்பட்டு புழக்கத்தில் இருந்தன. இதனால் சீனா விதித்த தடையின் பின்னர் நுண்மிய நாணயங்களின் பெறுமதி விழ்ச்சியடைந்துள்ளது. சீனாவின் முன்னணி மெய்ப்பேட்டை (Real Estate) நிறுவனமான Evergrande நிதி நெருக்கடியைச் சந்தித்த தலையிடிக்கு நடுவில் சீன அரசு நுண்மிய நணயங்களுக்கு தடை விதித்தது அவற்றிற்கு பேரிடியாக அமைந்துள்ளது. Evergrandeஇன் நிதி நெருக்கடியால் உலகெங்கும் பங்குச் சந்தைகள் வீழ்ச்சியடைந்தன. பொதுவாக பங்குச் சந்தைகள் வீழ்ச்சியைக் காணும் போது பிட்கொயின் உட்பட எல்லா நுண்மிய நாணயங்களும் பெறுமானச் சரிவைச் சந்தித்துள்ளன.

நுண்மிய நாணயங்களின் வரலாறு

2008-ம் ஆண்டு Satoshi Nakamoto என்ற புனைபெயரின் பின்னால் இருக்கும் ஒரு நபர் அல்லது பல நபர்கள் நுண்மிய நாணயத்திற்கான(Cryptocurrency) தமது வெள்ளை அறிக்கையைச் சமர்பித்தனர். தமது நாணயத்தின் மூலம் செய்யப்படும் கொடுப்பனவுகளுக்கு நடுத்தரகர், இடையில் கட்டணம் அறவிடுவோர் என யாரும் இருக்க மாட்டார்கள். அதனால் கட்டணமின்றி கொடுப்பனவுகளைச் செய்ய முடியும் என அவர்கள் தமது அறிக்கையில் குறிப்பிட்டனர். அவர்களே 2009இல் பிட்கொயின் (Bitcoin) எனப்படும் முதலாவது நுண்மிய நாணயத்தை அறிமுகப்படுத்தினர். அதைத் தொடர்ந்து பல நுண்மிய நாணயங்கள் உருவாக்கப்பட்டாலும் நுண்மியநாணயம் என்றால் பிட்கொயின் என்பது போன்றும் பிட்கொயின் என்றால் நுண்மிய நாணயம் என்பது போன்றும் தோற்றப்பாடு உள்ளது. நுண்மிய நாணயம் என்பது நடுவண் வங்கியில்லா நாணயமாகும். 2008-ம் ஆண்டு ஏற்பட்ட உலக நிதி நெருக்கடியின் போது டொலருக்கு ஏற்பட்ட சோதனை எல்லா உலக நாணயங்களையும் பாதித்தது. இந்த நெருக்கடியின் விளைவாகவே நுண்மியநாணயங்கள் உருவாகின.

விழுந்த டொலரும் எழுந்த நுண்மிய நாணயங்களும்

அமெரிக்க டொலரின் பெறுமதி கேள்விக்குறியான நிலையில் நுண்மியமிய நாணயங்களில் (Cryptocurrency) பெருமளவு முதலீடு செய்யப்படுகின்றது. உலகெங்கும் பல நுண்மியமிய நாணயங்கள் இருக்கின்றன. அவற்றில் முதன்மையானதும் அதிகம் பேசப்படுவதும் பிட்கொயின்(Bitcoin) ஆகும். 2020-ம் ஆண்டு பின்கொயினின் பெறுமதி 13%இற்கு மேல் அதிகரித்துள்ளது. அதேவேளை அமெரிக்க டொலர் சுட்டியின் மதிப்பு 9% வீழ்ச்சியடைந்துள்ளது.

BLOCKCHAIN என்னும் தொடர்பதிவேடுகள்

நுண்மிய நாணயங்கள் என்பது வெறும் எண்மியக் குறியீடுகள்(Digital Codes) மட்டுமே. அவை பெறுமதியுள்ள சொத்துக்கள் போல் விற்கப்படுவதும் வாங்கப்படுவதும் நடைமுறையில் உள்ளன. மற்ற சொத்துக்கள் போல் அவற்றின் பெறுமதியும் ஏறுவதும் உண்டு இறங்குவதும் உண்டு. Blockchain எனப்படும் தொடர்பதிவேட்டு தொழில்நுட்பம் மூலம் அவற்றின் கணக்குகள் பேணப்படுகின்றன. தொடர்பதிவேட்டு தொழில்நுட்பம் பாதுகாப்பையும் சுதந்திரத்தையும் அதன் பாவனையாளர்களுக்கு வழங்குகின்றது என்கின்றனர் அதை உருவாக்கியவர்கள். அந்த பதிவேடுகளைப் பராமரிக்கும் கணினித் தொகுதிகள் பெருமளவு மின்சாரத்தை பயன்படுத்துவதால் அது சூழலை மாசுபடுத்துகின்றது எனக் குற்றம் சாட்டப்படுகின்றது.

நம்பிக்கையே நாணயம்

ஊழல் செய்வோர், போதைப்பொருள் விற்பனை செய்வோர், வரிஏய்ப்புச் செய்வோர், பயங்கரவாதிகள், கப்பம் கேட்போர் போன்றவர்களுக்கு நுண்மிய நாணயம் சிறந்த புகலிடமாக அமையும் என உலகின் பல அரசுகள் அச்சம் தெரிவித்தன. நாம் அன்றாடம் பாவிக்கும் காசு எனப்படும் நாணயங்கள் நடுவண் வங்கிகளால் வெளியிடப்படுபவை. நடுவண் வங்கிகள் மீதும் அவற்றின் பின்னால் உள்ள அரசுகள் மீதும் வைத்துள்ள நம்பிக்கையே நாணயங்கள் உலகெங்கும் புழக்கத்தில் இருப்பதற்கு காரணமா அமைகின்றது. அந்த நம்பிக்கை கடந்த சில நூற்றாண்டுகளாக கட்டியெழுப்பப்பட்டவை. நுண்மிய நாணயங்கள் (Cryptocurrencies) தற்போது புழக்கத்தில் உள்ள நாணயங்களை அகற்றி அவற்றின் இடத்தை தாம் பிடிப்பதற்கு இன்னும் எவ்வளவு காலம் எடுக்கும் என்பதுதான். ஏற்கனவே இணையவெளியில் நடக்கும் ஊடுருவல்கள், ஊழல்கள், திருட்டுக்கள் போன்றவற்றால் மக்களுக்கு அதன் மீது பெரும் அவநம்பிக்கையை வளர்த்துக் கொண்டிருக்கின்றது. அதே போல் தற்போது புழக்கத்தில் உள்ள நாணயத்தாள்களைப் போலியாக அச்சிடுவதும் உண்டு. கடன் அட்டை, வங்கி அட்டை, கைப்பேசிச் செயலிகள் மூலமாகச் செய்யப்படும் கொடுப்பனவுகளுக்கு அந்த அட்டைகளையும் செயலிகளையும் வழங்கும் வங்கிகளும் நிதி நிறுவனங்களும் வர்த்தக நிறுவங்களிடமிருந்து கட்டணங்களை அறவிடும்.

பரிசோதனியில் ஈடுபட்ட JP MORGAN

JP MORGAN என்னும் நிதி நிறுவனம் Etherumஎன்னும் நுண்மிய நாணயம் பாவிக்கும் etherum technologyயை 2016-ம் ஆண்டில் இருந்து பரிசோதனைக்காக பவித்து வருகின்றது. இதற்காக அது டென்மார்க்கைச் சேர்ந்த தனியாருக்கு சொந்தமான செய்மதியையும் பாவித்துள்ளது. பாதுகாப்பன கொடுப்பனவுகளுக்காக இணையவெளிப் பதிவேடுகளையும் அது உருவாக்கியது. அந்த இணையவெளி தொடர்பதிவேடுகள் blockchain என அழைக்கப்ப்டுகின்றன. JP MORGAN அந்த தொடர்பதிவேட்டு தொழில்நுட்பத்தை Consensys என்ற நிறுவனத்திற்கு விற்பனை செய்தது.

Teslaவின் ஏற்பும் மறுப்பும் பிட்கொயினின் ஏற்றமும் இறக்கமும்

Tesla என்னும் தானியங்கி கார் உற்பத்தி நிறுவனம் ஒன்றரை பில்லியன் டொலர்களுக்கு பிட்கொயின் (Bitcoin) என்னும் நுண்மிய நாணத்தை 2021 பெப்ரவரியில் வாங்கிய பின்னர் அதன் பெறுமதி பெருமளவில் அதிகரித்தது. ஒரு அலகு பிட்கொயின் $64,000களுக்கு இணயானது. தனது கார்களை வாங்க பிட்கொயின் மூலம் கொடுப்பனவைச் செய்யலாம் எனவும் Tesla அறிவித்தது. மூன்று மாதங்கள் கழித்து Tesla தனது நிலைப்பாட்டில் இருந்து பின் வாங்கியது. Teslaஇன் பின்வாங்கலால் மற்ற நுண்மிய நாணயங்களான Ethereum, Binance Coin, Dogecoin, XRP, Litecoin ஆகிய நுண்மிய நாணயங்களின் பெறுமதியும் பெருமளவில் வீழ்ச்சியடைந்தன. Tesla உரிமையாளரின் ஒரு டுவிட்டர் பதிவு பல மில்லியன் இழப்பீட்டை ஏற்படுத்தியது.

பொய்ச்செய்தியால் எழுந்த விழுந்த Litecoin

2021-09-13 திங்கட் கிழமை Global Newswire என்ற ஓர் ஊடகம் Walmart என்ற அமெரிக்க நிறுவனம் Litecoin என்ற நுண்நாணயத்தின் மூலம் தங்கள் வாடிக்கையாளர்கள் கொடுப்பனவைச் செய்யலாம் என்ற செய்தியைத் தவறுதலாக வெளியிட்டிருந்தது. அதனால் Litecoinஇன் பெறுமதி அதிகரித்தது. பின்னர் அரை மணித்தியாலத்தில் பெறுமதி வீழ்ச்சியடைந்தது.

எல் சல்வடோரின் பரிசோதனை

அமெரிக்காவின் டொலரையே தனது நாணயமாக கடந்த இருபது ஆண்டுகளாக வைத்திருக்கும் எல் சல்வடோர் நாடு அமெரிக்க டொலருடன் பிட்கொயின் என்னும் நுண்மிய நாணயத்தையும் ஏற்றுக்கொள்ளும் சட்டத்தை நிறைவேற்றியுள்ளது. அத்துடன் அதைப் பாவிப்பவர்களுக்கு $30 ஊக்கத்தொகையையும் வழங்கியது. வெளிநாட்டு முதலீட்டாளர்கள் பிட்கொயினை வாங்கி விற்பனை செய்யும் போது ஈட்டும் இலாபத்திற்கு எல் சல்வடோரில் வருமான வரி விதிவிலக்கும் வழங்கப்பட்டுள்ளது. எல் சல்வடோரின் தேசிய வருமானத்தில் இருபது விழுக்காடு வெளிநாடுகள்ல் வாழும் எல் சல்வடோரியர்கள் அனுப்பும் பணத்தில் இருந்து பெறப்படுகின்றது. அப்படி அனுப்ப்ப்படும் பணத்திற்கு வங்கிகள் கட்டணம் அறவிடும். அவர்கள் பிட்கொயின் மூலம் அனுப்பும் போது பெருமளவு கட்டணங்களைச் சேமிக்கலாம். ஆனால் பிட்கொயினை அறிமுகப் படுத்துவதில் பல சிக்கல்கள் தோன்றின. ATM Machines மூலம் பிட்கொயின் கணக்கில் உள்ள நிதியில் இருந்து டொலர்களை பெற முடியாமல் அவை செயற்படாமல் இருந்தன. கைப்பேசிகளில் உள்ள Wallets செயலிகளுக்கு நிதி மாற்றம் செய்வதிலும் பல் சிக்கல்கள் இருந்தன. இதனால் மக்கள் ஆர்ப்பாட்டம் செய்தனர். எல் சல்வடோர் அரசு 280மில்லியன் அமெரிக்க டொலரக்ளை பிட்கொயினில் முதலீடு செய்திருந்தது.  அதை நடைமுறைப்படுத்துவதில் இருந்த சிக்கலால் பிட்கொயினின் பெறுமதி குறைந்து அரசுக்கு மூன்று மில்லியன் டொலர் இழப்பீடு ஏற்பட்டது. எல் சல்வடோரின் மக்கள் தொகையில் அரைப்பங்கிற்கும் குறைவானவர்களே இணையவெளியைப் பாவிக்கும் வசதி கொண்டவர்கள். அங்கு எடுத்த கணக்கெடுப்பின் படி 70விழுக்காடு மக்கள் பிட்கொயின் என்னும் நுண்மிய நாணயத்தின் அறிமுகத்தை எதிர்க்கின்றார்கள். எல் சல்வடோரில் முப்பது விழுக்காட்டினர் மட்டுமே வங்கிக் கணக்கு வைத்திருக்கின்றனர்.

Telsa தூக்கிப் போட்ட, எல் சல்வடோர் தூக்கி நிறுத்திய நுண்மிய நாணயத்தை சீனா மீண்டும் வீழ்த்தியுள்ளது.

Huawei Ms Meng: அசிங்கப்பட்ட நாடுகள்

 

அணுக்குண்டுகளை வைத்திருக்கும் அமெரிக்கா ஈரான் அணுக்குண்டு உற்பத்தி செய்யக் கூடாது என்று உறுதியாக நிற்கின்றது. அமெரிக்காவை அழிப்போம் இஸ்ரேலை ஒழிப்போம் என்ற கோட்பாடுடன் ஈரானிய மதவாத ஆட்சியாளர்கள் இருக்கின்றார்கள். இஸ்ரேலின் அரசுறவியல் கைக்கூலி போல அமெரிக்கா செயற்படுகின்றது. 

ஈரான் அணுக்குண்டு உற்பத்திக்கு தேவையான யுரேனியத்தைப் பதப்படுத்துவதாக இரகசியமாக அணுக்குண்டை வைத்திருக்கும் இஸ்ரேல் குற்றம் சாட்டுகின்றது. ஈரான் தனது யுரேனியப் பதப்படுத்தல் அமைதியை இலக்காகக் கொண்டது என்பதுடன் தமக்கு அணுக்குண்டு உற்பத்தி செய்யும் நோக்கம் இல்லை என்கின்றது. ஈரானின் யுரேனியம் பதப்படுத்தும் நிலையங்கள் மீது அமெரிக்காவும் இஸ்ரேலும் இணையவெளியூடாக ஊடுருவி தாக்குதல் செய்ததாக குற்றம் சாட்டப்படுகின்றது. அது மட்டுமல்ல ஈரானின் யுரேனியப் பதப்படுத்தலில் சம்பத்தப்பட்டுள்ள விஞானிகள் பலர் கொல்லப்பட்டுள்ளனர். அக் கொலகளைச் செய்தது இஸ்ரேலிய உளவுத்துறை என ஈரான் குற்றம் சாட்டுகின்றது.

ஈரானுடன் Huawei கள்ளத் தொடர்பு

ஈரானுக்கு எதிராக பல வர்த்தகத் தடைகளை அமெரிக்கா தன் நட்பு நாடுகளுடன் இணைந்தும் ஐக்கிய நாடுகள் சபையினூடாகவும் தனித்தும் மேற்கொண்டுள்ளது. வங்கிகள் மற்றும் நிதி நிறுவனங்கள் செய்யும் பன்னாட்டு கொடுப்பனவு முறைமையில் இருந்து ஈரான் தடை செய்யப்பட்டுள்ளது. ஈரான் மீதான தடைகளை மீறி சீனாவின் திறன்பேசி, கணினி மற்றும் பல இலத்திரனியல் துறையில் சிறந்து விளங்கும் Huawei நிறுவனம் செயற்பட்டதாக அமெரிக்கா குற்றம் சாட்டியது. அமெரிக்காவுடன் குற்றவாளிகளை மாற்றிக் கொள்ளும் உடன்பாடு உள்ள நாடாகிய கனடாவிற்கு Huawei  நிறுவனத்தின் நிதித்துறைக்கு பொறுப்பான Ms Meng Wanzhou சென்றபோது அவரைக் கைது செய்யும் வேண்டுதலை அமெரிக்கா கனடிய நீதித்துறையிடம் 2018-ம் ஆண்டு விடுத்தது. அதன் பேரில் அவர் கனடாவில் கைது செய்யப்பட்டார். அவரை அமெரிக்காவிற்கு கடத்தும் வழக்கு கனடாவில் மூன்று ஆண்டுகளாக நடந்து கொண்டிருக்கின்றது. மூன்று ஆண்டுகளாக Ms Meng Wanzhou கனடாவில் சிறைக் கைதி போல் தடுத்து வைக்கப்பட்டுள்ளார். கனடாவின் செயலைக் கடுமையாகக் கண்டித்த சீனா தனது நாட்டில் உள்ள இரண்டு கனடியக் குடிமகன்களை உளவு பார்த்ததாக குற்றம் சாட்டி கைது செய்து தடுத்து வைத்தது. சீனா பணயக் கைதிகளாக அவர்களை பிடித்து வைத்துள்ளது என அமெரிக்காவும் கனடாவும் குற்றம் சாட்டின. 

முந்திய சீனா சீறிய அமெரிக்கா

இலத்திரனியல் தொடர்பாடலை பல மடங்கு துரித்தப்படுத்தும் 5ஜீ அலைக்கற்றை தொழில்நுட்பத்தை உருவாக்குவதில் போட்டி போட்டுக் கொண்டு பல நாடுகளும் ஈடுபட்ட வேளையில் சீனாவின் Huawei அதில் முந்திக் கொண்டது. பல நாடுகளிற்கு அவற்றை விநியோகிக்க தொடங்கியது. சீனாவின் 5ஜீ அலைக்கற்றை உலகெங்கும் பாவிக்கப் பட்டால் உலக ஒழுங்கு குலைக்கப்படும், சீனா உலகெங்கும் உளவு பார்க்கும், சீனா உலகெங்கும் உள்ள விஞ்ஞான தொழில்நுட்ப தகவல்களையும் தொழிற்றுறை இரகசியங்களையும் திருடும், சீனா உலகில் ஆதிக்கம் செலுத்தும் என்ற குற்றச்சாட்டு அமெரிக்காவின் பாதுகாப்புத் துறையைச் சேர்ந்த பல்வேறு பிரிவுகளாலும் அதிகாரிகளாலும் தொடர்ச்சியாக முன்வைக்கப்பட்டு வருகின்றன. ஏற்கனவே ஆண்டு தோறும் அரை ரில்லியன் டொலர் பெறுமதியான தொழில்நுட்பத் தகவல் திருட்டுக்களை அமெரிக்காவில் இருந்து சீனா செய்வதாக அமெரிக்கா குற்றம் சாட்டுகின்றது. அலைக்கற்றைச் செயற்பாட்டின் மூலம் 4.7மில்லியன் வேலைவாய்ப்பும் 47பில்லியன் வருமானமும் அமெரிக்காவிற்கு கிடைக்கின்றது. சீனாவின் ஹுவாவே (ஹுவாய்) நிறுவனம் தமது தொழில்நுட்பங்களைத் திருடியதாக அமெரிக்காவின் கூகிள், கோல்கொம் ஆகிய நிறுவனங்கள் பகிரங்கக் குற்றச் சாட்டுக்களை முன்வைத்தன.

5ஜீ சீனாவை பொருளாதாரத்தில் உலகின் முதன்மை நாடாக்கும்

தற்போது பல நாடுகளிலும் பாவிக்கப்படும் 4ஜீ (நான்காம் தலைமுறை) என்பது Long Term Evolution (LTE) என்பதாகும். அது அது 3ஜீ இலும் பார்க்க பத்து மடங்கு வேகமாக தகவற் பரிமாற்றம் செய்யக் கூடியது. 5ஜீ அலைக்கற்றை 4ஜீ அலைக்கற்றையிலும் நூறு மடங்கு வேகத்தில் செயற்படக் கூடியது. 4ஜீ தொழில்நுட்பமுள்ள கைப்பேசியில் இரண்டு மணித்தியாலத் திரைப்படத்தை தரவிறக்கம் செய்ய ஏழு நிமிடங்கள் எடுக்கும். 5ஜீ தொழில்நுட்பம் உள்ள கைப்பேசிக்கு 6 செக்கன்கள் மட்டுமே எடுக்கும். கைப்பேசிகளில் மட்டுமல்ல தானாக இயங்கு மகிழூந்துகள், ஆளில்லாப் போர்விமானங்கள் போன்றவற்றிலும் 5ஜீ பாவிக்கப்படும். ஒரு நாட்டில் இருக்கும் மருத்துவர்கள் இன்னொரு நாட்டில் உள்ள நோயாளிகளைப் பரிசோதிப்பதையும் சிகிச்சை செய்வதையும் 5ஜீ தொழில்நுட்பம் மேலும் இலகுவானதாகவும் சிறப்பானதாகவும் மாற்றும். போக்குவரத்து, தொழிற்றுறை உற்பத்தி, வர்த்தகம் போர்முறைமை போன்றவற்றை இலத்திரனியல் மயப்படுத்தும் நான்காம் தொழிற்புரட்சியை 5ஜீ தொழில்நுட்பம் இலகுவாகவும் துரிதமாகவும் சாத்தியமானதாக்கும். கணினிகள் தாமகச் சிந்திந்து செயற்படும் செயற்கை நுண்ணறிவுப் பாவனைக்கும் 5ஜீ தொழில்நுட்பம் வழிவகுக்கும்.

தொழில்நுட்பப் போர்

Semi-conductors எனப்படும் குறைகடத்திகள் Huawei நிறுவனத்திற்கு மிகவும் தேவைப்படுகின்றது. அவற்றை அது அமெரிக்காவிடமிருந்தும் தைவானிடமிருந்தும் இறக்குமதி செய்கின்றது. Huawei நிறுவனத்திற்கு முட்டுக்கட்டை போடவும் சீனாவின் தொழில்நுட்ப வளர்ச்சியை தாமதப் படுத்தவும் அமெரிக்கா சீனாவிற்கு Semi-conductorsஐ ஏற்றுமதி செய்வதைத் தடை செய்து சீனாமீது ஒரு தொழில்நுட்ப போரைத் தொடுத்துள்ளது, தனது நட்பு நாடுகளையும் அத்தடையை செய்ய வைத்துள்ளது. Semi-conductorsஐ உருவாக்கும் பொறி ஒன்றை நெதர்லாந்திடமிருந்து சீனா வாங்க முயன்றபோது அமெரிக்கா அதை தடுத்தது. 

குற்றத்தை ஒத்துக்கொண்ட Ms Meng Wanzhou

Huawei நிறுவனத்தின் நிதித்துறைப் பொறுப்பாளரான Ms Meng மெய்நிகர் வெளியில் அமெரிக்க நீதிமன்ற விசாரணையில் பங்கு கொண்டு ஈரானுடன் தனது நிறுவனம் தடைகளை மீறி வர்த்தகம் செய்தமையை ஒப்புக் கொண்டதன் பேரில் அவரை கனடிய நீதிமன்றம் விடுதலை செய்தது. அதே வேளையில் சீனாவில் கைது செய்து வைக்கப்பட்டிருக்கும் இரு கனடியக் குடிமக்களையும் சீனா விடுவித்துள்ளது. அதனால் அமெரிக்கா, கனடா, சீனா ஆகியவற்றிற்கிடையிலேயான இழுபறி இப்போது முடிவுக்கு வந்துள்ளது. 

சீனா பணயக் கைதிகளைப் பிடித்தமைக்கு அமெரிக்கா அடிபணிந்து விட்டது என அமெரிக்க அதிபர் ஜோ பைடனின் எதிர்க்கட்சியான குடியரசுக் கட்சியினர் குற்றம் சுமத்துகின்றனர். முன்னாள் அதிபர் டொனால்ட் டிரம்பைப்போல் ஜோ பைடன் சீன விவகாரத்தில் இறுக்கமாக நிற்காமல் விட்டுக் கொடுக்கின்றார் எனவும் சீனா தொடர்ந்து பணயக் கைதிகளாக பிடிப்பதைச் செய்யும் எனவும் அவர்கள் குற்றம் சாட்டுகின்றனர். ஆனால் Ms Meng Wanzhouஇன் நான்கு பக்க அறிக்கை Huawei நிறுவனத்திற்கு எதிராக பல சட்ட நடவடிக்கைகளை எடுக்க வழிவகுக்கும் என்கின்றனர் ஜோ பைடனின் ஆதரவாளர்கள். சீனாவிற்கும் அமெரிக்காவிற்கு இடையில் உள்ள பல சட்ட அடிப்படையிலான இழுபறிகளைக் கையாண்ட அமெரிக்க சட்ட அறிஞரான Jerome A. Cohen இரு நாடுகளுக்கும் இடையிலான உறவைப் பாதித்துள்ள பல சிக்கல்கள் இனித் தீருவதற்கு வழிவகுக்கும் என்கின்றார்.