வன்னி மண் வீரம் பாடிப் பாடிக் கும்மியடி

தமக்கெனத் தலைக்கொரு பிடி அரிசியடி - ஆங்கு
இரந்து வருவோர்க்கு ஒரு படிஅரிசியடி
தேடிவருவோர்க்கு மேலும் ஒரு படி அரிசியடி
வேகுமடி வன்னிமண் உலைகளிலடி
அவ்விருந்தோம்பல் புகழ் பாடிக் கும்மியடி
நல்லோர் என்றும் கெட்டதில்லை எனச் சொல்லியடி

அணையாதடி வன்னிமண்ணின் அடுப்படி நெருப்படி
குறையாதடி அவர்தம் அன்புதானடி குன்றாதடி அவர் வளமடி
வந்தோர் பசி தீர்ப்பாரடி வருவார் யாரெனப் பார்ப்பாரடி
ஈழத்து அட்சய பாத்திரமடி அந்த வன்னி வள நிலமடி
குன்றாத அவரன்பை பாடிக் கும்மியடி
நன்றாய் மீண்டும் அவர்  வாழ வேண்டியடி

முகிலடிதொடு மலையிலா ஊரடி - ஆனலும்
வற்றாத நீர் வளமடி சளையாத நெஞ்சத்து உரமடி -எதிரிக்கு
வளையா வீர மனமடி கயவர்க்கு வணங்கா மண்ணடி - அது
வன்னிமறவர் தம் மண்ணடி எம் ஈழத்தாயின் இதயமடி - அந்த
வன்னிமண் வீரம் பாடிப் பாடிக் கும்மியடி - அது
மீண்டும் வீறு கொண்டு எழும் எனச் சொல்லியடி

சிதறிய சிறுவர்தம் உடல்களடி கதறிய கன்னியர்தம் குரல்களடி
கருவிலே கருகிய உயிர்களடி பதறிய தமிழினத்து கண்ணீரடி - யாவும்
முளைக்கும் விதைகளாகுமடி வீரம் மீண்டும் தளைக்குமடி
அடங்காப்பற்று நிலமடி அந்த வன்னிமண் வினை தீர்க்குமடி
நாளை வீறு கொண்டு எழுமெனச் சொல்லியடி
வன்னி வீரர் காலைப் போற்றிக் கும்மியடி

சிரியாவில் அமெரிக்காவிற்கு பெரும் தலையிடி

ஐம்பது ஆண்டுகளாக அவசரகாலச் சட்டைத்தின் பிடியில் இருக்கும் சிரிய நாட்டின் அதிபர் பஷார் அல் அசாத்திற்கு எதிரான கிளர்ச்சியை ஆரம்பித்த பல குழுக்கள் 2011இன் இறுதிப்பகுதியில் சிரிய தேசிய சபை என்னும் பெயரில் ஒன்றிணைந்தன. இந்தக் குடை அமைப்பை லிபியா அங்கீகரிந்த்தது. 2012 நவம்பரில் சிரியப் புரட்சிக்கும் எதிர்ப்புப் படைகளுக்குமான கூட்டமைப்பு (National Coalition for Syrian Revolutionary and Opposition Forces) என்னும் இன்னுமொரு குடை அமைப்பு உருவாக்கப்பட்டது.

கட்டார் நாட்டில் உருவாக்கப்பட்ட சிரியப் புரட்சிக்கும் எதிர்ப்புப் படைகளுக்குமான கூட்டமைப்பை (National Coalition for Syrian Revolutionary and Opposition Forces) வளைகுடா கூட்டுறவுச் சபை என்னும் வளைகுடாவைச் சேர்ந்த நாடுகளின் கூட்டமைப்பும் அரபுநாடுகள் சபையும் அங்கீகரித்தன.

சிரியத் தேசிய சபை, சுதந்திர சிரியப்படை. ஜபத் அல் நஷ்ரா, இசுலாமிய சகோதரத்துவ அமைப்பு, மதசார்பற்ற மக்களாட்சிக்கான அமைப்பு, டமஸ்கஸ் பிரகடன அமைப்பு, சிரிய மக்களாட்சிக் கட்சி, சிரியப் புரட்சிக்கான உச்ச சபை, சிரிய உள்ளூர் ஒருங்கிணைப்புக் குழு,  மக்களாட்சி மாற்றத்திற்கான தேசிய ஒருங்கிணைப்புக் குழு, தேசிய மக்களாட்சி அணி, சிரியப்புரட்சிக்கான தேசிய ஆணையகம், சிரிய விடுதலைப்படை, சிரிய இசுலாமிய முன்னணி, சிரியத் தேசிய விடுதலை முன்னணி, விடுதலைக்கும் மாற்றத்துக்குமான முன்னணி...........இப்படி இனும் பல படைக்கலன் ஏந்திய குழுக்களும், மத அமைப்புக்களும் அரசியல் கட்சிகளும் சிரிய அதிபர் பஷார் அல் அசாத்திற்கு எதிராகச் செயற்படுகின்றன. இவற்றில் சுதந்திர சிரியப்படை ஓர் ஐக்கிய அமெரிக்காவை சார்ந்த அமைப்பாகவும் ஜபத் அல் நஷ்ரா ஓர் அல் கெய்தாவைச் சார்ந்த அமைப்பாகவும் இருக்கின்றன. இதுவே சிரிய விடுதலைக்கு பெரும் முட்டுக்கட்டையாகவும் இருக்கின்றன.

அமெரிக்காவின் தலையிடாக் கொள்கை - Pentagon’s hands-off approach
ஐக்கிய அமெரிக்கா அசாத்திற்கு எதிரான கிளர்ச்சிக்காரர்களுக்கு படைக்கலன் வழங்குவதில்லை என்ற நிலைப்பாட்டுடனும் சிரியாவில் நேரடியாக தலையிடுவதில்லை என்ற நிலைப்பாட்டுடனும் இதுவரை இருந்தது. இதை அமெரிக்கப் பாதுகாப்புத் துறை பெண்டகனின் தலையிடா அணுகுமுறை (Pentagon’s hands-off approach) என்பர். அமெரிக்கவின் இந்த தலையிடாக் கொள்கை அதன் நட்பு நாடுகளான துருக்கி, சவுதி அரேபியா, கட்டார், ஜோர்தான் ஆகிய நாடுகளை அதிருப்திக்கு உள்ளாக்கியுள்ளன.

பேராபத்தும் பேரழிவும்
சிரியப் போரில் இதுவரை எழுபதினாயிரத்திற்கு மேற்பட்டோர் இறந்து விட்டனர். பல இலட்சக் கணக்கானோர் இடப்பெயர்வுக்கு உள்ளாகியுள்ளனர். சிரிய உள்நாட்டுப் போர் இன்னும் தீவிரமடையும் நிலையில் சிரியா யாருடைய கட்டுப்பாட்டிலும் இல்லை என்றும் ஒன்றிற்கு ஒன்று முரண்பட்ட கட்டுப்பாடில்லாத பல குழுக்கள் சிரியாவில் சிரியாவை தமது கட்டுப்பாட்டுக்குள் வைத்திருக்கின்றன என்றும் ஒரு நிலை உருவாகும் போதும்; சிரியாவில் இருக்கும் தனது கடற்படைத் தளத்தை இரசியா எப்படிக் காப்பாற்றப் போகிறது என்ற கேள்வி எழும் போதும்; இஸ்ரேல் ஹிஸ்புல்லா போராளிக் குழுக்களிடம் பேரழிவு விளைவிக்கக் கூடிய படைக்க்லன்கள் போகாம தடுக்க முயலும் போதும்; ஈரான் தனது கடைசி நட்பு ஆட்சியாளர் கவிழாமல் பாதுகாக்க முற்படும் போதும்; வலுமிக்க அரச படையின் பேரழிவு விளைவிக்கக் கூடிய படைக்கலன்களை யார் எப்படிப் பாவிக்கப் போகிறார்கள் என்ற ஆபத்தான நிலை உருவாகும் போதும் மத்திய கிழக்கில் பெரும் நெருக்கடி உருவாகும். சிரியாவிற்கு அண்மையாக உள்ள பல நாடுகள் இதனால் பாதிக்கப்பட்டு உலக எரிபொருள் விநியோகமும் தடைப்படலாம்.

என்ன செய்வது?
அமெரிக்கப்பாதுகாப்புத் துறைச் செயலர் ஹஜலிடம் சிரிய நிலைமை பற்றிக் குறிப்பிட்ட ஓர் அமெரிக்க இராசதந்திரி "Everybody's scared. And nobody knows what the hell we are going to do there.". சிரியாவில் என்ன நடக்கப் போகிறது என்பது பற்றி எல்லோரும் அஞ்சுகிறார்கள். ஆனால் ஒருவருக்கும் என்னத்தைச் செய்து தொலைப்பது என்று தெரியாமல் இருக்கிறார்கள். சிரிய நிலைமை பற்றி எழுதிய அமெரிக்காவின் நிதித் துறை ஊடகமான த் வால் ஸ்-ரீட் ஜேர்ணல் Pentagon Plans for the Worst in Syria  பெனடகன் மோசமான சிரிய நிலைக்குத் தயாராகிறது எனத் தனது செய்திக்கு தலைப்பிட்டுள்ளது.

 ஜோர்தானில் மேலும் அமெரிக்கப்படையினர்.
சிரியக் கிளர்ச்சி ஜோர்தானில் பிரச்சனைகளை கிளறாமல் இருக்க அங்கு ஒரு தடைப் பிரதேசத்தை உருவாக்க அமெரிக்கா முயல்கிறது. விரைவில் அமெரிக்கப் படையினர் ஜோர்தானில் தரையிறங்கலாம். ஏற்கனவே ஜோர்தானில் அமெரிக்கப்படையின் வேதியியல் படைக்கலன் நிபுணர்கள் நிலை கொண்டுள்ளனர். எகிப்து சிரியப் பிராந்தியத் திடத்தன்மையை பாதுகாக்க மட்டுப்படுத்தப்பட்ட அளவிலும் நிபந்தனைக்கு உட்பட்டும் அமெரிக்காவுடன் ஒத்துழைக்க தயாராக இருப்பதாக அறிவித்துள்ளது.

இருதலைக் கொள்ளி எறும்பாக அமெரிக்கா
சிரிய உள்நாட்டுப் போரைப் பொறுத்தவரை அமெரிக்காவிற்கு இரு பெரும் ஒன்றிற்கு ஒன்று முரண்பட்ட பிரச்சனைகள் இருக்கின்றன. சிரிய ஆட்சியாளரின் வீழ்ச்சி பிராந்திய சமநிலையையும் திடநிலையையும் பெரிதும் பாதிக்கும் என்பதால் அங்கு படைரீதியாகத் தலையிட்டு முடிவை தனக்கு சாதகமாக்க வேண்டும் அல்லது தனக்கு ஆதரவான குழுக்களுக்கு படைக்கலன்கள் வழங்கி தனக்கு சாதகமான நிலையை உருவாக்க வேண்டும். அமெரிக்கா படைத்துறை ரீதியாக எந்த ஒரு நாட்டிலும் தலையிடுவதை அமெரிக்க மக்கள் விரும்பவில்லை. அதன் பொருளாதார நிலையும் அதற்கு உகந்ததாக இல்லை. அமெரிகா தனக்குச் சாதகமான கிளர்ச்சிக் குழுக்களுக்கு படைக்கலன்கள் வழங்கினால் அது அல் கெய்தாவின் கைகளிற்குப் போய்ச் சேரும் என அஞ்சுகிறது. இதை உறுதி செய்யும் முகமாக அமெரிக்க அதரவு கிளர்ச்சிக் குழுவான சுதந்திர சிரியப்படையில் இருந்து பல போராளிகள் அல் கெய்தா ஆதரவுப் போராளிக் குழுவான ஜபத் அல் நஷ்ராவிற்கு மாறியுள்ளனர். இது அமெரிக்காவிற்குப் பெரும் தலையிடி கொடுக்கும் செய்தியானது. இன்னும் ஒரு சங்கடமான நிலைமை அமெரிக்காவில் ஜோர்தானில் ஏற்பட்டுள்ளது. ஜோர்தானை சிரியக் கிளர்ச்சி பாதிக்காமல் இருக்க அங்கு அமெரிக்கப்படைகள் நிலை கொள்வது அவசியம். ஆனால் அதிக அளவில் அமெரிக்க்பப்டைகள் ஜோர்தானில் நிலை கொண்டால் அது அங்கு இசுலாமியத் தீவிரவாதம் தலை தூக்க வழிவகுக்கும். எமது மண்ணில் இசுலாமிய விரோத அமெரிக்கப்படைகளா என்று ஜோர்தானிய ஆட்சியாளர்களுக்கு எதிராக இசுலாமிய தீவிர வாதம் எழும்பலாம் என அமெரிக்கா அஞ்சுகிறது.

பணமும் பலமும் மிக்க ஜபத் அல் நஷ்ரா
அல் கெய்தா ஆதரவு இயக்கமான ஜபத் அல் நஷ்ராவிடம் நிறையப் பணமும் சிறந்த படைக்கலங்களும் இருப்பதாகச் சொல்லப்படுகிறது. அத்துடன் அதன் போராளிகள் இசுலாமிய மதப் பற்றால் உந்தப்பட்டு மிகச் சிறப்பாக போர் புரிகின்றனர். பல துணிச்சல் மிக்க தாக்குதல்களையும் தற்கொடைத் தாக்குதல்களையும் அவர்கள் செய்து வருகின்றனர். இவர்களின் தாக்குதல் அசாத்திற்கு எதிரான கிளர்ச்சியில் பல திருப்பங்களை ஏற்படுத்தியுள்ளன.

ராஜபக்சவிற்கு சீனாவில் இருந்து ஓர் அபாயச்சங்கு

மஹிந்த ராஜபக்ச சகோதரர்களுக்கு ஆலோசனை சொல்ல என்று ஒரு பெரும் கூட்டம் இருக்கிறது. இதுவரை அவர்களின் பல வெற்றிகளுக்கு அந்த ஆலோசனை சொல்லும் கூட்டம் முக்கிய பங்காற்றியிருக்கிறது. ஆனால் புவிசார் கேந்திரோபாயம் (Geo-strategic) தொடர்பாகவும் அதன் நீண்டகால அடிப்படையிலான மாற்றம் தொடர்பாகவும் ஆலோசனை சொல்வதென்பது கடினமான விடயம் என்பதை ராஜபக்ச சகோதரர்களோ அவரது ஆலோசகர்களோ உணர்ந்திருக்க வில்லை.

போர் முடிந்த பின்னர் இலங்கைக்குப் பயணம் மேற்கொண்ட ஐக்கிய நாடுகள் சபையின் பொதுச் செயலர் பான் கீ மூனுடன் கூட்டறிக்கை ஒன்றை விட்ட மஹிந்த அந்த அறிக்கையில் இலங்கையில் நடந்த போரின் போது நடந்த அத்துமீறல்கள் தொடர்பாக ஒரு நம்பகரமான விசாரணையை மேற்கொள்வதாகவும் இலங்கை இனப்பிரச்சனைக்கு இலங்கை அரசியலமைப்பின் 13வது திருத்தத்தின் கீழ் தீர்வுகாணப்படும் என்றார். பின்னர் மஹிந்த ராஜபக்ச தன்னைச் சந்திக்க வருபவர்களிடமும் தான் செல்லுமிடங்களிலும் பொறுப்புக் கூறல் தொடர்பான நம்பகரமான விசாரணை, இனப்பிரச்சனைக்குத் தீர்வு காணல் பற்றி வாக்குறுதி அளிப்பதற்கு மஹிந்த ராஜ்பக்ச தயங்குவதில்லை. சில சமயங்களில் 13இற்கு மேலே செல்வேன ன்றும் கூறியதுண்டு. பின்னர் தனது அரசியல் கூட்டங்களில் அதிகாரப் பரவலாக்கல் என்ற பேச்சுக்கே இடமில்லை, இலங்கையில் போர்க்குற்றம் ஏதுவும் நடக்கவில்லை, நான் எனது எந்த ஒரு படைவீரனையும் தண்டிக்க மாட்டேன் எனச் சூளுரைப்பதுமுண்டு.

பல மனித உரிமை அமைப்புக்களினதும் மேற்கு நாடுகளினதும் வேண்டுகோள்களையும் அழுத்தங்களையும் ஐக்கிய நாடுகள் சபையின் மனித உரிமைக்கழத்தின் தீர்மானங்களையும் இலங்கை இதுவரை வெற்றிகரமாகப் புறந்தள்ளி வருகிறது. இலங்கை சீனாவின் பக்கம் சார்ந்து போகக் கூடாது என்று மேற்கு நாடுகளும் இந்தியாவும் மஹிந்த அரசுக்கு எதிராக கவனமாக காய்களை நகர்த்துகின்றன. இந்தச் சீனத் துருப்புச் சீட்டை ராஜபக்சேக்கள் தந்திரமாகக் கையாண்டு இந்தியாவை தமது இராசதந்திரக் கைக்கூலியாகவே மாற்றி விட்டனர். ஐநா மனித உரிமைக் கழகத்தில் கொண்டுவரப்பட்ட இரண்டு தீர்மானங்களின் கடுமையை ராஜபக்சேக்கள் இந்தியாவின் மூலமாக குறைத்துவிட்டனர்.

எத்தனை நாள் ராஜபக்சேக்களால் இந்த சீனப் பூச்சாண்டித் துருப்புச் சீட்டை வைத்து விளையாட முடியும் என்ற கேள்விக்கு விடை தேடினால் முதல் நினைவிற்கு வருவது 17-05-2011-ம் திகதி ஐக்கிய நாடுகள் சபையின் பாதுகாப்புச் சபையில் லிபியாவிற்கு எதிரான தீர்மானம் - 1973தான். இத் தீர்மானம் வாக்கெடுப்பிற்கு விட்டபோது எதிர்த்து வாக்களிப்பவர்கள் வாக்களிக்கலான் என அவைத் தலைவர் சொன்னவுடன் ஐநா பாதுகாப்புச் சபையின் ஒளிப்பதிவுக் கருவிகள் யாவும் சீனப் பிரதிநிதியை நோக்கித் திரும்பின. அவரது கை ஒற்றை விரல் மேல் நின்றபடியும் மற்ற விரல்கள் மடித்தபடியும் மேல் எழும்பும் என அனைவரும் எதிர்பார்த்தனர். ஆனால் சீனப் பிரதிநிதியின் கை மேசையிலேயே இருந்தது. விளைவு லிபியாமீது நேட்டோப்படைகளின் விமானங்களில் இருந்தும் கடற்படைக் கப்பல்களில் இருந்து குண்டு மழை பொழியப்பட்டது. இறுதியில் மும்மர் கடாஃபி கிளர்ச்சிக்காரர்களிடம் அகப்பட்டு அடித்தும் சுட்டும் கொல்லப்பட்டார். இவையாவும் நடக்கும் என்று தெரிந்தும் தனது வர்த்தக நலன்கள் புவிசார் கேந்திரோபாயங்கள் பாதிப்புக்கு உள்ளாகும் என்று தெரிந்தும் சீனா தனது இரத்து அதிகாரத்தை பாவித்து தீர்மானம்-1973ஐத்  தடுக்கவில்லை. அடுத்து சீனாவின் ஒரே ஒரு நெருங்கிய நட்பு நாடும் அதன் அயல் நாடுமான வட கொரியாவிற்கு நேற்று (07/05/2013) செய்தது இலங்கைக்கான ஓர் அபாயச் சங்காக ஒலிக்கிறது. சீன அரச வங்கியான Bank of China வட கொரியாவின் வங்கியுடனான தனது நடவடிக்கைகளை நிறுத்தியுள்ளது. அமெரிக்க அதிபர் பராம் ஒபாமா சீனா வட கொரியாவிற்குச் செய்யும் தனது நீண்டகால அடிப்படையிலான உதவிகளை நிறுத்த வேண்டும் என்ற வேண்டுகோளிற்கு ஏற்பவே இது செய்யப்பட்டது.  ஏற்கனவே பல நாட்டு வங்கிகள் வட கொரியாவுடனான தமது நடவடிக்கைக்களை நிறுத்தியுள்ள நிலையில் சீனாவைன் இந்த நகர்வு முக்கியத்துவம் வாய்ந்ததாகக் கருதப்படுகிறது. வட கொரியா தொடர்பாக சீனா பன்னாட்டுச் சமூகம் எனப்படும் மேற்கு நாடுகளுடனும் ஐக்கிய நாடுகள் சபையுடனும் ஒத்துழைக்க தாயாராக உள்ளது என்று உறுதியாகக் கூறலாம்.

வட கொரியாவை அதன் போக்கில் விட்டால் அது அமெரிக்காவைத் தாக்கக்கூடிய ஏவுகணைகளையும் அணுக்குண்டுகளையும் உருவாக்கிவிடும் என அமெரிக்கப் பாதுகாப்புத் துறை நம்புகிறது. அதனால் வட கொரியாவிற்கு எதிரான கடுமையான நடவடிக்கைகளை எடுக்க வேண்டிய நிர்ப்பந்தத்தில் அமெரிக்கா இருக்கிறது. வட கொரிய ஆட்சி கவிழ்ந்து அமெரிக்காவின் நெருங்கிய நட்பு நாடான தென் கொரியாவும் வட கொரியாவும் இணைந்து ஒரு பெரும் அமெரிக்க நாடு உருவாகுவதை சீனா விரும்பவில்லை. ஆனாலும் வட கொரியாவிற்கு எதிராக அமெரிக்கா எடுக்கும் நடவடிக்கைக்களுக்கு சீனா தடையாக இருக்க முடியாமல் இருக்கிறது. அமெரிக்காவிற்கு ஏற்றுமதி செய்யாமல் சீனாவால் இருக்க முடியாது. சீனாவிடம் கடன் வாங்காமல் அமெரிக்காவால் இருக்க முடியாது. இந்த ஒருவரில் ஒருவர் தங்கியிருக்கும் நிலையில் மாற்றம் தற்போது இல்லை.  மத்திய கிழக்கில் சீனாவுடன் இனைந்து செயற்பட அமெரிக்க தனது விருப்பத்தை தெரிவித்துள்ளது. அங்கு ஒருவருக்கு ஒருவர் முரண்பட்டுச் செயற்படாமல் இருவரும் இணைந்து மத்திய கிழக்கை சுரண்டுவது எப்படி என்று முடிவெடுக்கலாம். இதே நிலை இலங்கையிலும் ஏற்படலாம்.

சீனா உலகப் பொருளாதார பெரு வல்லரசாகவும் படைத்துறைப் பெரு வல்லரசாகவும் மாறும் என்ற எதிர்பார்ப்புடன் ராஜபக்சேக்களின் ஆலோசகர்கள் கூறிய ஆலோசனைக்கேற்ப நிறைய முட்டைகளை ஒரு கூடையில் வைத்து விட்டார்கள். ஆனால் சீனா லிபியாவைக் கைவிட்டது போலவும் வட கொரியாவைக் கைவிடுவது போலவும் ராஜபக்சேக்களுக்கு நடக்காது என்பதற்கு என்ன உத்தரவாதம்?

சீனப் பொருளாதார வளர்ச்சியின் உண்மைகளும் பொய்களும்

வேகமாக வளர்ந்து வரும் பொருளாதாரம், உலகில் இரண்டாவது பெரிய பொருளாதாரம், உலகில் அதிக எற்றுமதி செய்யும் பொருளாதாரம், உலகின் மிகப் பெரிய உருக்கு உற்பத்தி செய்யும் பொருளாதாரம், உலகில் அதிக அளவு எரிபொருள் கொள்வனவு செய்யும் பொருளாதாரம், 2050இல் உலகில் முதல்தரமாகப் போகும் பொருளாதாரம் என்றேல்லாம் சீனப் பொருளாதரத்திற்கு நல்ல பெயர் உண்டு.

சீனா தனது பொருளாதார வளர்ச்சிக்கு ஏற்ப தனது படைத் துறையையும் வளர்த்து வருவதுடன் தனக்கென்று சில நாடுகளை வளைத்துப் போடுவதிலும் முயன்று வருகிறது. மனித உரிமைப் பிரச்சனை, புவிசார் அரசியல் நிலைமை, தீவிரவாதம் போன்றவற்றிற்காக மேற்கு நாடுகள் சற்று விலகி இருக்கும் ஈரான், சிம்பாப்வே, பாலஸ்த்தீனம் போன்ற நாடுகளுடன் சீனா தனது நட்புறவை வளர்த்து வருகிறது.

பொதுவுடமைக் கொள்கையில் இருந்து விலகி முதலாளைத்துவப் பொருளாதாரத்தை நோக்கி சீனா நகர்ந்து உலக வர்த்தகத்தில் தீவிர பங்காளியாக மாறியதில் இருந்து சீனப் பொருளாதாரம் வேகமான வளர்ச்சியக் கண்டது. 1978இல் சீனாவின் மொத்த உற்பத்தி(GDP) 214பில்லியன் அமெரிக்க டாலர்களாக இருந்தது. 2012இல் அது எட்டு மடங்காகி 8.3ரில்லியன் டாலர்களானது.

சீனா தனது பொருளாதார வளர்ச்சியில் இலக்கை 8 வி்ழுக்காடாக நிர்ணயித்துள்ளது. இப்படிப்பட்ட ஓர் உயர் பொருளாதார வளர்ச்சியை தொடர்ந்து பேணாவிடில் சீனாவில் வேலையில்லாப் பிரச்சனை தலை தூக்கி அங்கு பெரும் உள்நாட்டுப் போர் நிகழும் என்று சீன ஆட்சியாளர்க்ள் அறிவர்.

2012இல் சீனாவால் தனது  பொருளாதார வளர்ச்சியின் இலக்கை எட்ட முடியவில்லை. 2012இல் சீனப் பொருளாதார வளர்ச்சி  7.4 விழுக்காடு மட்டுமே. மற்ற நாடுகளுடன் ஒப்பிடுகையில் இது ஒரு நல்ல வளர்ச்சிதான். 2012இல் பொருளாதார வளர்ச்சி: இந்தியா - 4.5, ஜெர்மனி - 0.10, ஜப்பான்  - .50, பிரான்ஸ் - -0.30(தேய்வு), ஐக்கிய இராச்சியம் - 0.60, ஐக்கிய அமெரிக்கா - 1.80. 2013 முதலாம் காலாண்டிலும் சீனப் பொருளாதாரம் 8 விழுக்காடு வளர்ச்சியை அடையவில்லை. 2013 ஏப்ரல் மாதமும் சீனாவின் பொருளாதார வளர்ச்சி எதிர்பார்த்த இலக்கை அடையாது என கொள்வனவு முகாமையாளர் சுட்டெண் சுட்டிக்காட்டுகிறது.

சீனப் பொருளாதாரத்தின் பலவீனங்கள்.
1. ஏற்றுமதியிலும் வெளியாருக்கான உற்பத்தியிலும் பெரிதும் தங்கி இருக்கிறது.
சீனா தனது பொருளாதார வளர்ச்சிக்கு ஏற்றுமதியிலேயே பெரிதும் தங்கி இருக்கிறது. அதன் உள்ளூர் பொருளாதாரம் பலவீனம் அடைந்த நிலையிலேயே இருக்கிறது. சீனத் தொழிலாளர்கள் மிகக் குறைந்த ஊதியத்திற்கு உற்பத்தியாக்கும் பொருட்களை ஏற்றுமதி செய்து சீனா தனது பொருளாதாரவளர்ச்சியை எட்டுகிறது. சீனாவின் உற்பத்திப் பொருட்கள் சீனாவால் கண்டுபிடிக்கப்பட்டவையோ அல்லது உருவாக்கப்பட்டவையோ அல்ல. ஏற்கனவே வேறு நாடுகளில் கண்டிபிடிக்கப்பட்ட பொருள்களை சீனா குறைந்த செலவில் உற்பத்தி செய்கிறது. பல வெளிநாட்டு நிறுவனங்கள் தமது பொருட்களை சீனாவில் உற்பத்தி செய்கின்றன. தற்போது இத்துறையில் சீனாவிற்கு பிலிப்பைன்ஸ், வியட்னாம், பங்களாதேசம் போன்ற பல நாடுகள் போட்டியாக உருவாகி வருகின்றன. சீனாவின் தொழிலாளர்களுக்கான ஊதியம் அதிகரித்து வருவது நிலைமையை மேலும் மோசமாக்கிறது. அத்துடன் சீனத் தொழிலாளர்கள் அதிக ஊதியம் கேட்டு வருகின்றனர்.

2. ஆராய்ச்சி அபிவிருத்தி உதவித் தொகை தவறாகப் பயன்படுத்தப்ப்டுகிறது.
சீன அரசு உயர் கல்வி நிறுவங்களுக்கு ஆராய்ச்சி அபிவிருத்திக்கு வழங்கும் உதவித் தொகையை அவை தவறாகப் பயன்படுத்துகின்றன. இதனால் உலகச் சந்தையில் தனது சொந்த கண்டுபிடிப்புக்களை அறிமுகம் செய்வதில் சினா பின் தங்கி இருக்கிறது.

3. சீன அரசின் பல உள்நாட்டு முதலீடுகள் தோல்வியில் முடிவடைகின்றன.
தனது உள்நாட்டுப் பொருளாதாரத்தை வளர்க்கும் நோக்குடன் பல முதலீடுகளைச் செய்கின்றது. உலகின் மிகப்பெரிய நீர் மின் உற்பத்தி அணை, உலகின் வேகமிக்க பெரும் கணனித் தொகுதிகள், கடுகதி தொடரூந்துச் சேவை ஆகியவற்றில் சீனா வெற்றியடைந்தாலும் வேறுபல உள்ளூராட்சி அமைப்புக்களில் சீன அரசு செய்யும் பல முதலீடுகள் தோல்வியில் முடைவடைவதால் நிக்ர விளைவு தோல்வியாகவே இருக்கிறது.

4. சீனா ஒரு பொருளாதார ரீதியில் பின் தங்கிய ஒரு நாடே. 
சீனாவின் மொத்தப் பொருளாதார உற்பத்தியும் அதன் வளர்ச்சியும் மற்ற நாடுகளுடன் ஒப்பிடுகையில் பெரிதாக இருக்கிறது. ஆனால் தன் நபர் வருமானம் என்று பார்க்கும் போது சீனாவின் நிலை மிகவும் மோசமானதே. தனிநபர் வருமானப் பட்டியலில்: 
ஐக்கிய அமெரிக்கா 12வது இடத்தில் $49000.
ஜேர்மனி ...................27வது இடத்தில் $38,400
ஐக்கிய இராச்சியம் 34வது இடத்தில் $36,000 
பிரான்ஸ் ..................36வது இடத்தில் $35,600
ஜப்பான் ......................37வது இடத்தில் $35,200 
சீனா.............................164வது இடத்தில் $8,500.

இதில் இந்தியாவின் நிலை மிகவும் பரிதாபகரமானது 164இடத்தில் $3700.

5. ஆளும் வளரணும் அறிவும் வளரணும்
சீனா பொருளாதாரத்தில் முன்னேறினாலும் அதன் சமுதாய மாற்றம் மக்களுக்கு நன்மை பயப்பதாக இல்லை. ஒரு நல்ல மருத்துவ வசதி பெறவோ ஒரு நல்ல கல்வியைப் பிள்ளைகளுக்குப் பெறவோ ஒரு சீனக் குடிமகன் பெரும் பணத்தை கையூட்டாகக் கொடுக்க வேண்டிய பரிதாபகரமன நிலையில் உள்ளான். சீனாவில் பல மில்லியன் அதிபதிகளை அதன் பொருளாதார வளர்ச்சி உருவாக்கினாலும் அதன சமூக நிலை மோசமாகிக் கொண்டே போகிறது.சீன அரசின் சமூக நலக் கொடுப்பனவுகள் மிகவும் குறைவானதே. பல முதியோர் ஓய்வு ஊதியம் எதுவும் இன்றித் துயரப்படுகின்றனர்.

6. பாதகமான மக்கட்தொகைக் கட்டமைப்பு
தற்போது பல மேற்கு நாடுகளைப் பாதித்துள்ள மக்கள் தொகைக் கட்டமைப்பு இப்போது சீனாவையும் பாதிக்கத் தொடங்கியுள்ளது. சீனாவில் தொடர்ந்து பல ஆண்டுகளாகச் செய்யப் பட்ட குடும்பக் கட்டுப்பாட்டுத் திட்டத்தால் தற்போது சீனாவின் மக்கள் தொகையில் இளையோரின் தொகை குறைந்து வருகிறது. முதியோரின் தொகை அதிகரித்து வருகிறது. இந்த வகையில் இந்தியா பலமிக்க நாடாக இருக்கிறது.

7. நம்ப முடியாத சீனத் தகவல்கள்
ஆட்சியாளர்கள் தமது நாட்டின் பொருளாதார வளர்ச்சியை எப்போதும் உயர்த்திக் காட்டுவதுண்டு. கிரேக்கம் ஐரோப்பிய ஒன்றியத்திலும் யூரோ நாணயக் கட்டமைப்பிலும் இணைவதற்கு பிழையான பொருளாதரப் புள்ளிவிபரத் தகவல்களை வேண்டுமென்றே தயாரித்தது என நம்பப்படுகிறது. இது யூரோ வலய நாடுகளின் தற்போதைய பொருளாதார நெருக்கடிக்கு ஒரு காரணமாக அமைந்தது. சீனாவின் பொருளாதரம் தொடர்பான புள்ளி விபரங்கள் ஆட்சியாளர்களில் செல்வாக்கை மக்கள் மத்தியில் தக்க வைப்பதற்காக திரித்துக் கூறப்படுகின்றன என்ற குற்றச் சாட்டு உண்டு. புள்ளிவிபரங்களில் செய்யப்படும் பல மோசடிகள் தொடர்பான செய்திகள் அவ்வப்போது கசிவதுண்டு.

8. உலகின் மோசமான சூழல் மாசு
சீன ஆறுகளில் மூன்றில் இரண்டு பங்கு ஆறுகள் மாசடைந்துள்ளன. காற்று மாசுச் சுட்டெண் சீனாவில் 469 ஆக இருக்கிறது. இது 301இற்கு மேல் இருப்பது ஆபத்தானது. சீன அரசின் கணிப்பின்படி சீனாவின் 113 நகரங்களில் மூன்றில் இரண்டு பங்கு நகரங்களில் காற்று மாசடைந்துள்ளது.

9. வருமானப் பங்கீட்டில் சமமின்மை
அதிக வளர்ச்சியுடைய பெரிய பொருளாதாரமான சீனாவில் செல்வந்தர்களுக்கும் வறியவர்களுக்கும் இடையிலான இடைவெளி அதிகரித்து வருகிறது.

10. நிதி நிறுவனங்கள் வளரவில்லை
ஒரு நாட்டின் பொருளாதார வளர்ச்சியுடன் அந்த நாட்டு நிதி நிறுவனங்களும் வளர்ந்து செல்ல வேண்டும். அமெரிக்காவின் நிதிச் சந்தை, பிரித்தானியாவின் வங்கிக் கட்டமைப்பு போன்றவற்றுடன் ஒப்பிடுகையில் சீன நிதி நிறுவனங்கள் இன்னும் பாதாளத்தில்தால் இருக்கின்றன. இதனால் மூலதனங்கள் திறன்மிக்க துறைகளில் முதலீடு செய்யப்படுவதில்லை.

மோசமான வருமானப் பங்கிடு, மாசடையும் சூழல், பெருகும் ஊழல் சமூக ஒருக்கிணைப்பின்மை ஆகியவற்றால் சீனப் பொருளாதார வளர்ச்சியை ஒரு தரங்குறைந்த வளர்ச்சி என்கின்றனர் சமூகப் பொருளாதார வல்லுனர்கள். தற்போது தமது பொருளாதார வளர்ச்சிக்கு சீனாவின் பொருளாதார வளர்ச்சியில் பல நாடுகள் நம்பியிருக்கின்றன. சில தங்கியிருக்கின்றன. இருதரப்பு வர்த்தகத்தை மேம்படுத்த பல மேற்கு நாட்டு ஆட்சித் தலைவர்கள் சீனாவிற்கும் இந்தியாவிற்கு அடிக்கடி பயணம் மேற்கொள்கின்றனர். இவர்களுக்கு இறுதியில் ஏமாற்றமே மிஞசலாம்.

உணவே மருந்தாகும்

உணவியல் நிபுணர்கள் நாம் கட்டாயம் உண்ண வேண்டிய உணவுகள், எமது பசியை அடக்க உண்ண வேண்டிய உணவுகளை வகைப்படுதியுள்ளனர். அவற்றைப் பின்பற்றினால் எமது ஆரோக்கியம் பேணப்படும்.  சரியான முறையில் சரியானவற்றை உண்டால் உணவு எமக்கு மருந்தாகும்.

 கட்டாயம் உண்ண வேண்டிய உணவுகள்:
1. அவரைவகைகள் - பருப்பு, பீன்ஸ், அவரை எனப் பல வகையில் கிடைக்கும் உணவு இது. இதில் உள்ள நார் கொழுப்பைக் கரைக்கவல்லது.
2. நீலநெல்லி(Blueberries) - பழங்களிலேயே அதிக antioxidants கொண்டது இது.
3. தயிர் - உங்களுக்குத் தேவையான் கல்சியம் இதில் உண்டு. அத்துடன் உங்கள் குடலைச் சுத்தமாக வைத்திருக்க இதில் உள்ள  probiotics உதவுகிறது.
4. ஓட்ஸ் - இது கொழுப்பைக் குறைக்கும். இரத்த அழுத்தத்தை குறைக்கும்.
5. பூக்கோசு (broccoli) - மரக்கறி என்று சொல்கையில் முதல் தேர்வாக இருக்க வேண்டிய உணவு இது. இது எமது உடலில் enzymes(நொதியூக்கி) அதிகரிக்கச் செய்கிறது. Enzymes are large biological molecules responsible for the thousands of chemical interconversions that sustain life.
6. முட்டை - புரதம் நிறைந்த உணவு.
7. கீரை - இதில் vitamins A, C and K, fiber, iron, calcium, potassium, magnesium and vitamin E ஆகியவை உண்டு.
8. விதைக்கலவை (Mixed Nuts) - தற்போது கடைகளில் இவை நிறையக் கிடைக்கின்றன. அண்மைய ஆராய்ச்சிகளின்படி விதைகளை உண்பவர்கள் உண்ணாதவர்களிலும் பார்க்க இரண்டு ஆண்டுகள் அதிகம் வாழக்கூடிய சாத்தியம் இருக்கிறது எனக் கண்டறிபப்பட்டுள்ளது. அக்ரூட் பருப்பும் (Walnuts) பாதாம் பருப்பும் இவற்றில் முக்கியமானவை.
9. தோடம்பழம்: ஒரு தோடம்பழத்தில் ஒருவருக்குத் தேவையான விட்டமின் C உண்டு.
10. இஞ்சி: தமிழ்ச்சித்தர்கள் இஞ்சியையும் கடுக்காயையும் மிக முக்கியமாக உண்ண வேண்டும் என்றனர். கிருமிகளைக் கொல்லக் கூடியது. கொழுப்பைக் கரைக்கக் கூடியது.


பசியடக்கும் உணவுகள்: 
1. அவக்காடோ- இது இருதயத்திற்கு உகந்த monounsaturated fatஐக்கொண்டுள்ளது. இதை அளவோடு உண்ண வேண்டும்.
2. வற்றாளைக் கிழங்கு(Sweet Potatoes) - விட்டமின் ஏ, பி நிறைந்தது. இதில் உள்ள சர்க்கரை பசியை அடக்கும் அத்துடன் சர்க்கரையை சிறிது சிறிதாக இரத்தத்தில் சேரவைக்கும்.
3.  ஓட்ஸ் - காலை உணவாக ஓட்ஸை எடுத்தால் அது மதியம் வரை உங்கள் பசியை அடக்கி வைக்கும். இதில் உள்ள ghrelin சிறந்த பசியடக்கி.
4. தண்ணீர் - சாப்பிடமுன்னர் இரண்டு கிளாஸ் தண்ணீர் அருந்துப்வர்கள் குறைந்த அளவு உணவு உட்கொள்வதாக பல ஆய்வுகள் தெரிவிக்கின்றன.
5. பாதாம் பருப்பு - இது antioxidants, vitamin E, and magnesium ஆகியவை நிறைந்தது. ஒரு கையளவு பாதாம் பருப்பு தினமும் உண்ண வேண்டும்.
6. முட்டை- காலை உணவாக முட்டையை உண்டால் அது நீண்ட நேரம் உங்கள் பசியை அடக்கி வைக்கும். புதிய ஆய்வுகள் முட்டையில் உள்ள கொழுப்பு இருதயத்திற்கு நன்மை பயக்கக் கூடியது என்று சொல்கிறது,.
7. கறுப்பு சாக்லெட் - இதில் உள்ள antioxidants நன்மை பயக்கக் கூடியது.
8. பச்சை தேநீர் - இதிலும் antioxidants உள்ளது.
9. இலவங்கப்பட்டை (கறுவா) - இது  உங்கள் இரத்தத்தில் உள்ள சர்க்கரையின் மட்டத்தை(blood sugar levels) குறைத்து உங்கள் பசியை அடக்கும். உங்கள் உணவுகளில் இதை அடிக்கடி சேர்த்துக் கொள்ளுங்கள்.
10. காப்பி - இது சோர்வைப் போக்கும் குணமுடையது. உங்கள் பசியால் வருவது சோர்வு. உங்கள் உடலின் metabolismஐ இது ஊக்குவிக்கும்.

இந்திய எல்லைக்குள் சீன ஆக்கிரமிப்பின் சதிக்கோட்பாடு

இந்த நூற்றாண்டில் இரு நாடுகளிடையான உறவிலும் பார்க்க அவற்றினடையான வர்த்தகத்திற்கு அதிக முக்கியத்துவம் கொடுக்கும் தந்திரோபாய நிலைப்பாடு பன்னாட்டு உறவின் ஓர் அம்சமாகிவிட்டது. முன்பெல்லாம் ஆ..ஊ என்றால் அமெரிக்கா இரசியாவிற்கு எதிராக பொருளாதாரத் தடைகளை கொண்டுவரும். பின்னர் அமெரிக்க வியாபாரிகள் கள்ளத்தனமாக அரச தடைகளை மீறிய வர்த்தகம் செய்து பெரும் இலாபமீட்டும்.

இந்த நூற்றாண்டின் ஆரம்பத்தில் மூன்று பில்லியன் அமெரிக்க டாலர்களாக இருந்த இந்திய சீனாவிடையிலான வர்த்தகம் 2011இல் எழுபது பில்லியன்களாக உயர்ந்தது. இரு நாடுகளிடையான வர்த்தகத்தை மேலும் வளர்ப்பதற்கு அவை உறுதி பூண்டுள்ளன. ஆனால் இரு நாடுகளிடையான உறவு சென்ற நூற்றாண்டு இருந்ததிலும் பார்க்க இப்போது மோசமடைந்து வருகிறது. அருணாச்சலப் பிரதேசமும் காஷ்மீரில் சில பகுதிகளும் தன்னுடைய பிரதேசம் என சீனா சொல்லி வருகிறது.

இரு பிரதான பிரதேசங்களான காஷ்மீரிலும் அருணாச்சலப் பிரதேசத்திலும் இந்தியாவிற்கும் சீனாவிற்கும் இடையில் முறுகல் நிலை இருக்கிறது. 10-10-1962இற்கும் 21-11-1962இற்கும் இடையில் நடந்த இந்திய சீனப் போரில் இந்தியா அக்சாய் சின் என்னும் பிரதேசத்தில் சுவிற்சலாந்து தேசத்தின் நிலப்பரப்பு கொண்ட இடத்தையும் (அதாவது 38,000சதுர கிலோ மீட்டர்) அருணாசலப் பிரதேசத்தில் ஒஸ்ரியா நாட்டின் நிலப்பரவளவு இடத்தையும் (90,000சதுர கிலோ மீட்டர்)சீனாவிடம் பரிதாபகரமகப் பறிகொடுத்தது.

2008-ஆம் ஆண்டு சீனா சிக்கிம்மை இந்தியாவிடமிருந்து பிடுங்கி விடுமா என்ற நிலை இருந்தது. இரண்டு மாதங்களாக இருதரப்பும் என்னேரமும் போர் வெடிக்கலாம் என்ற பதட்ட நிலையில் இருந்தன. 

இந்திய சீன எல்லையில் மிக நீண்ட தூரம் பிரச்சனைக்கு உரியதாக இருக்கிறது. இப்பகுதியில் சீனா 2012இல் நானூற்றிற்கு மேற்பட்ட தடவை ஊடுருவல்களை மேற்கொண்டது. பல இடங்களில் இருந்து சீனா ஊடுருவிய பின்னர் விலகிச் சென்றாலும் சில இடங்களில் சீனா தனது படை முகாம்களை நிறுவி நிரந்தரமாகத் தங்கியுள்ளது. இதைத் தொடர்ந்து இந்தியா தனது 50,000இற்கும் 60,000இற்கும் இடைப்பட்ட துருப்புக்களைக் கொண்ட இரு பெரும் படையணிகளை அருணாச்சலப் பிரதேரத்திற்கு நகர்த்தியது. இதற்கு சீனா தனது எச்சரிக்கையை 2010 ஜூன் மாதம் ஆறாம் திகதி இப்படி வெளியிட்டது: India’s current course can only lead to a rivalry between the two countries. India needs to consider whether or not it can afford the consequences of a potential confrontation with China.” இந்தியாவின் செயல்கள் இரு நாடுகளிடையான முரண்பாட்டை வளர்க்கும். இதன் விளைவுகளை இந்தியாவால் எதிர் கொள்ள முடியுமா என்பதை இந்தியா கருத்தில் கொள்ள வேண்டும். அருணாச்சலப் பிரதேசம் என்பது சுவிஸ்ற்லாந்து நாட்டிலும் பார்க்க மூன்று மடங்கு நிலப்பரப்பைக் கொண்டது.

2013 ஏப்ரல் நடுப்பகுதியில் சீனப்படையினர்  காஷ்மீர்  மாநிலம் லடாக் பகுதியில்  டேப்சாங் பள்ளத்தாக்கில்   19 கிலோ மீட்டர் தூரம்ஊடுருவி முகாம் அமைத்துள்ளனர்.  ஒரு நாள் கழித்தே இது இந்தியப்படையினருக்குத் தெரிய வந்தது. புது டில்லியில் உள்ள சீனத் தூதுவரை அழைத்து இந்தியா தனது ஆட்சேபனையைத் தெரிவித்தது. அதற்குச் சீன கொடுத்த பதில் மேலும் இரண்டு முகாம்களை அங்கு அமைத்தமையே. அத்துடன் இது நம்ம ஏரியா உள்ளே வராதே என ஆகிலத்தில் ஒரு அறிவிப்புப் பலகையையும் நிறுவியது. அந்த அறிவிப்புப் பலகை இந்தியப் படைகளிற்கு “You are in Chinese side.”  எனச் சொன்னது. இரு நாடுகளிடையான மூன்று சுற்றுப் பேச்சு வார்த்தைகள் தோல்வியிலேயே முடிவடைந்தன. சீனா இந்தியப் படையினர் இந்திய நிலப்பரப்பில் இருந்து விலக வேண்டும் என்று அடம் பிடிக்கின்றனர். மேலும் இந்தியா தனது எல்லைக்குள் அமைத்த காப்பரண்களை உடைத்து அழிக்க வேண்டும் என்றும் இந்தியாவை நிர்ப்பந்திக்கிறது. அத்துடன் சீனப்படைகள் தமது எல்லைக்குள்ளேயே நிலை கொண்டிருக்கின்றன என்று சீன வெளிநாட்டமைச்சர் அறிவித்துள்ளார்.

 சில முக்கிய கேள்விகள்
 கடும் குளிரில் கள்ளத்தனமாக நள்ளிரவின்உள்வந்த 30 பேர் கொண்ட சீனக் காலாட் படையை சுற்றி வளைத்து வெளியேறு அல்லது சரணடை என்று சொல்ல வேண்டிய இந்தியா ஏன் பார்த்துக் கொண்டிருக்கிறது? கடந்த மூன்று ஆண்டுகளாக இந்தியா உலகச் சந்தையில் உலகிலேயே ஆகக் கூடிய அளவு பணம் செலவழித்து படைக் கலன்களைக் கொள்வனவு செய்த இந்தியா சீனாவைச் சமாளிக்கக் கூடிய நிலையை இன்னும் அடையவில்லையா?19 கிலோ மீட்டர் உள் வந்தது வெறும் எல்லைப் பிரச்சனையா அல்லது ஆக்கிரமிப்பா?
சீனத் தலைமை அமைச்சர் லீ கெப்பியோங் விரைவில் புதி டில்லிக்குப் பயணம் செய்ய விருக்கும் நிலையி இப்படி ஒரு நகர்வு ஏன்?
தென் சீனக் கடலும் கிழக்குச் சீனக் கடலும் கொதிக்கும் நிலையிலும் வட கொரியா குதிக்கும் நிலையிலும் வட கொரியாவிற்கு எதிராக அமெரிக்கா வரிந்து கட்டிக் கொண்டிருக்கும் நிலையிலும் சீனா இந்தியாவுடன் மோதுவதற்கான இன்னும் ஒரு களமுனையைத் திறந்தது ஏன்? ஐக்கிய அமெரிக்கா ஆசியப் பிரதேசத்தில் தனது கேந்திரோபாய பங்காளியாக இந்தியாவை மாற்ற முயற்ச்சி செய்யும் நிலையிலும் இந்தியா அது சினாவுடனா விரோதத்தை மோசமாக்கும் என்று தயங்கும் நிலையிலும் சீனா இப்படி ஓர் ஆத்திர மூட்டும் செயலை ஏன் செய்கிறது?
சீனாவின் பல ஊடுருவல்களுக்கு கிடைக்காத முக்கியத்துவம் இப்போது கொடுக்கப்படுவது ஏன்?

இந்தக் கேள்விகளைக் கருத்தில் கொண்டு பார்க்கையில் சீன ஊடுருவலின்  பின்னால் ஒரு சதிக் கோட்பாடு இருக்கலாம். சீனாவின் அத்துமீறல் நிறைந்த செயற்பாடுகள் ஆளும் கட்சியினருக்கு சுவிஸ் வங்கியில் இருக்கும் பெரும் பணத்திற்கு எந்தவிதமான பாதிப்புக்களையும் ஏற்படுத்தாது. சீனா இந்தியாவின் நிலப்பரப்புகளை ஆக்கிரமித்தால் அது ஆளும் கட்சிக்கு ஆதரவு கொடுக்கும் பெரும் பணக்காரர்களின் வருமானத்தில் பாதிப்பை ஏற்படுத்தாது. இதனால்தான் பெரும் பிரச்சனைக்கு வழிவகுக்கக் கூடிய இந்த ஊடுருவலை இந்திய வெளிநாட்டமைச்சர் சல்மன் குர்ஷித் ஒரு முகத்தில் உள்ள ஒரு சிறு புள்ளியை வைத்துக் கொண்டு முகம் அழகில்லை என்று சொல்ல முடியாது. அதை எதாவது ஒரு பூச்சைப் பூசிச் சரிபடுத்தி விடலாம் என்றார். இது அவரின் மனைவிக்குச் சரியாக இருக்கலாம் ஒன்றை ஒன்று சந்தேகக் கண்ணுடன் பார்க்கும் உலகின் இரு பெரும் நாடுகளுக்குச் சரிவராது. இந்தியப் தலைமை அமைச்சர் “It is a localized problem, We do believe it can be solved. We have a plan. We do not want to accentuate the situation.”  ஒரு நாட்டுப் படை இன்னொரு நாட்டுக்குள் புகுந்ததை ஒரு உள்மயமாக்கப்பட்ட பிரச்சனை என்று சொல்லிய முதல் தலைமை அமைச்சர் மன்மோகன் சிங்தான். இப்படிச் சொல்லும் ஆட்சியாளர்கள் ஆட்சியில் இருப்பது சீனாவிற்கு மிகவும் சாதகமான நிலையாகும். இந்தக் காங்கிரசு ஆட்சி விரைவில் வரவிருக்கும் தோல்வியடைந்து சீனாவிற்கு சாதகமற்ற ஓர் ஆட்சி உருவாகுவதை சீனா விரும்புமா? சீனா தேர்தலுக்கு முன்னர் சீனாவை இந்தியா மிரட்டி வெளியேறச் செய்வது போல் ஒரு நாடகத்தை ஆடினால் அது காங்கிரசின் வெற்றிக்கு வழி சமைக்கும். எந்தபுற்றுக்குள் எந்தப் பாம்போ? எந்தப் பாம்பிற்குள் எந்த நஞ்சோ?