மகளிர்தானே அன்பின் விளைநிலம்

கருவாக்கி உருவாக்கி
உணவாக்கி குணமாக்கி
வளமாக்கி வளர் தருவாக்கி
அன்னை உருவாக
வரும் மகளிர்தானே
உலகின் விளைநிலம்

காலுறை தேடியெடுத்துக் கொடுத்து
மேலாடை அழுத்திக் கொடுத்து
முடிதிருத்தி அழகாக்கி
பணிவிடை செய்யும் அக்காக்கள்
அகிலத்தில் இருப்பதால்
மகளிர்தானே பாசத்தின் விளைநிலம்

என்பொருள் திருடும் மென்பொருளாகி
தோளில் சாய்ந்திருந்து அலைவரிசை மாற்றி
அடிக்கடி சண்டை போடும் தங்கைகளுடன்
வாழாத வாழ்க்கையும் ஒரு வாழ்க்கையா
தங்கைகளின் அன்பில் எல்லாம் உருகும்
அதனால் மகளிர்தானே அன்பின் விளைநிலம்

எல்லாவற்றையும் பொறுத்து
எல்லாக் குளப்படிகளுக்கும் அர்த்தம் கொடுத்து
பாராட்டி மகிழும் பாட்டியின் அன்பிற்கு
எதுதான் இந்த உலகத்தில் இணையாகும்
அதனால் மகளிர்தானே பரிவின் விளைநிலம்

மாமியாகி மைத்துனியாகி
சித்தியாகி பெரியம்மாவாகி
பக்கத்து வீட்டு ஆன்ரியாகி
மருத்துவ மனையில் தாதியாகி
பள்ளித் தோழியாகி பணிமனை நண்பியாகி
எத்தனை வடிவில் வந்து
எம்மில் அன்பு காட்டுவதால்
மகளிர்தானே நட்பின் விளைநிலம்

இதயச் சிறையிலடைத்துப் - பின்
முத்தத்தால் பிணை எடுத்து
ஓரப்பார்வையால் உயிரெடுத்து
தளர்ந்தால் தூக்கி நிறுத்தி
இளமையை இனிக்க வைப்பதால்
மகளிர்தானே காதலின் விளைநிலம்

கட்டிலில் கதாநாயகியாகி
கடைத்தெருவில் வில்லியாகி
சமையலறையில் தாயாகி
கவலைப்படுகையில் நட்பாகி
நெஞ்சின் உள்ளும் வெளியும்
எம்மைச் சுமக்கும் மனைவியர்
எம்மில் பாதியாக வாழ்வதால்
மகளிர்தானே வாழ்கையின் விளைநிலம்

எவரைப் புகழ்ந்தாலும்
எத்தனை சொன்னாலும்
கழுத்தில் நஞ்சணிந்து
களமாடிய பெண்புலிகள்தானே
வீரத்தின் தாய்களானார்
அதனால் மகளிர்தானே 
வீரத்தின் விளைநிலம்