அகலக் கால்களை வைத்த ஹிஸ்புல்லா அமைப்பு

சிரியத் தலைநகரை அண்டியுள்ள டிமாஸ் என்னும் இடத்தில் இஸ்ரேலிய விமானங்கள் பத்துக்கு மேற்பட்ட குண்டுகளை வீசியுள்ளன. இவை ஹிஸ்புல்லாவிற்கான படைக்கல விநியோகங்களைத் தடுப்பதற்காக மேற்கொள்ளப்பட்டுள்ளது. இப்படிப்பட்ட தாக்குதல் நடப்பது இது முதற் தடவையும் அல்ல. நிச்சயமாகக் கடைசித் தடவையும் அல்ல. சிரியாவில் அதன் அதிபர் பஷார் அல் அசாத்திற்கு எதிராகப் போராடும் கிளர்ச்சிக்காரர்களுக்கு எதிராகவும் அசாத்திற்கு ஆதரவாகவும் ஹிஸ்புல்லா அமைப்பு தனது போராளிகளில் ஐயாயிரத்திற்கு மேலானவர்களைக் களமிறக்கியுள்ளது. இந்தப் போராளிகளின் தொகை ஹிஸ்புல்லா அமைப்பின் மொத்தப் போராளிகளின் தொகையில் மூன்றில் ஒரு பங்கு எனக் கணிப்பிடப்பட்டுள்ளது. சிரிய உள்நாட்டுப் போர் தொடங்கியதில் இருந்து ஹிஸ்புல்லா அமைப்பு ஆயிரத்திற்கு மேற்பட்ட போராளிகளை இழந்துள்ளது.

ஒரு புறம் இரசியாவின் பிரதி வெளிநாட்டமைச்சர் மிகையில் பொக்டனவ் ஹிஸ்புல்லாத் தலைவர்  ஹசன் நஸ்ரல்லாவைச் சந்தித்த வேளையில் இஸ்ரேல் சிரியாவில் ஹிஸ்புல்லா நிலைகள் மீது தாக்குதல் நடாத்தியுள்ளது.

வலுமிக்க ஹிஸ்புல்லா
ஹிஸ்புல்லாவிடம் நிதிவலு, படைக்கலவலு ஆகியவை நிறைய உண்டு. கட்டமைக்கப்படாத போராளி இயக்கமான (Asymmetric movement) ஹிஸ்புல்லாவிடம் விமான எதிர்ப்பு ஏவுகணைகள், போர்க்கப்பல்களை அழிக்கும் ஏவுகணைகள், தாங்கி எதிர்ப்பு ஏவுகணைகள், வேவுபார்க்கவும் தாக்கவும் கூடிய ஆளில்லாப் போர்விமானங்கள் ஆகியவை இருப்பதாக இஸ்ரேலியப் பாதுகாப்புத் துறை கருதுகின்றது.  ஹிஸ்புல்லா இயக்கம் ஹமாஸ் அமைப்பைப் போலவே பல நிலக் கீழ் சுரங்கப் பாதைகளைக் கொண்ட வலையமைப்பையும் பதுங்கு குழிகளையும் இஸ்ரேல்-லெபனான் எல்லையில் அமைத்துள்ளது. இஸ்ரேலியக் கடற்படையை செய்லிழக்கச் செய்யும் அளவிற்கு ஹிஸ்புல்லாவிடம் படைக்கலன்கள் இருக்கின்றது எனச் சொல்லப்படுகின்றது

கிருஸ்த்தவ நாடாக லெபனான்
மத்திய கிழக்கிலே கிருஸ்த்தவர்களைப் பெரும்பான்மையாகக் கொண்ட ஒரு நாடாக லெபனான் திட்டமிட்டு முதலாம் உலகப் போரின் பின்னர் உருவாக்கப்பட்டது.  பிரான்சின் குடியேற்ற ஆட்சி நாடாக இருந்த லெபனான்1942-ம் ஆண்டு நவம்பர் 22-ம் திகதி சுதந்திர நாடாகியது. பின்னர் கிரிஸ்த்தவர்களும் இசுலாமியர்களும் தேசிய உடன்படிக்கை ஒன்றைச் செய்து கொண்டனர். அந்த உடன்படிக்கையின் படி குடியரசுத் தலைவர் ஒரு மரோனைற் கிருத்தவராகவும் தலைமை அமைச்சர் ஒரு சுனி முசுலிமாகவும் பாராளமன்ற அவைத் தலைவர் சியா முசுலிமாகவும் இருப்பதாக ஒத்துக் கொள்ளப்பட்டது. பாராளமன்ற உறுப்பினர்களாக கிருத்தவர்களுக்கு ஆறு முசுலிம்களுக்கு ஐந்து என்ற விகிதாசாரப்படி இருக்க வேண்டும் எனவும் ஒத்துக் கொள்ளப்பட்டது.

மத மோதல்கள் நிறைந்த லெபனான்
1943-ம் ஆண்டிலிருந்து 1956-ம் ஆண்டு வரை மக்களாட்சிப்படி லெபனான் ஆளப்பட்டது. பின்னர் 1957-ம் ஆண்டு லெபனானில் வலதுசாரிக் கிரிஸ்த்தவர்கள் தொடர்ந்து ஆட்சி புரியக் கூடிய வகையில் லெபனானிய அரசமைப்பை அமெரிக்க உளவுத் துறையான சி.ஐ.ஏ இரகசியமாகத் தலையிட்டு மாற்றியது. அரசமைப்பை மாற்றுவதற்க்கு தேவையான பெரும்பான்மையை 1957 மே-ஜூன் மாதங்களில் நடந்த பாராளமன்றத் தேர்தலில் வலதுசாரிகள் வெற்றி பெறச் செய்ய வாக்குப் பெட்டிகளுக்குள் கள்ள வாக்குகள் திணிக்கப்பட்டன. இதனால் அரபு நாடுகளுடன் ஒத்துழைக்க வேண்டும் என்ற எண்ணம் கொண்ட கிருத்தவ வேட்பாளர்கள் தோல்வியைத் தழுவினர்.  அரபு நாடுகளுடன் ஒத்துழைக்க வேண்டும் என்ற கொள்கையுடையவர்கள் பொதுவுடமைவாதிகள் (கம்யூனிஸ்ட்டுகள்) என சி.ஐ.ஏ அமெரிக்க அதிபரிடமே பொய் சொன்னது. இந்த முறைகேடான தேர்தலைத் தொடந்து லெபனானில் பெரும் உள்நாட்டுக் குழப்பம் ஏற்பட்டது. மரோனைற் கிருத்தவர்களும் இசுலாமியர்களும் மோதிக் கொண்டனர். 1956-ம் ஆண்டு எகிப்து சூயஸ் கால்வாய்காக மேற்கு நாடுகள் முரண்பட்ட போது லெபனானிய கிருத்தவர்கள் எகிப்திய ஆட்சியாளர் கமால் நாசர் பக்கம் நிற்காமல் மேற்கு நாடுகளுக்கு சார்பாக நின்றது எகிப்த்திற்கும் லெபனானிற்கும் இடையில் முறுகலை உருவாக்கியது. எகிப்த்தியர்களும் சிரியர்களும் தமது நாடுகளை இணைத்து 1958-ம் ஆண்டு ஐக்கிய அரபுக் குடியரசை உருவாக்கினார்கள். லெபனானில் இருக்கும் இசுலாமியர்கள் லெபனானும் இந்த அரசில் இணைய வேண்டும் எனவும் கிருத்தவர்கள் லெபனான் தொடர்ந்து தனிநாடாக இருக்க வேண்டும் எனவும் விரும்பினர். புதிய ஐக்கிய அரபுக் குடியரசு லெபனானிய இசுலாமியர்களுக்கு உதவியது. இதனால் உள்நாட்டுப் போர் தீவிரமடைந்தது. லெபனானில் அமெரிக்கா தலையிட்டால் தான் அணுக் குண்டைப் பாவிப்பேன் என சோவியத் அதிபர் குருசேவ் மிரட்டினார். 1958-ம் ஆண்டு ஜூலை மாதம் அமெரிக்கா 14000 படையினரைக் கொண்டு நீல வௌவால் என்னும் பெயரில் ஒரு படைநடவடிக்கையை லெபனானில் மேற் கொண்டது.

மாறிய இனவிகிதாசாரம்
மத்தியதர வர்க்கத்தினரை அதிகமாகக் கொண்ட லெபனானிய கிருத்தவர்களின் மக்கள் தொகைப் பெருக்கத்துடன் ஒப்பிடுகையில் வறியவர்களை அதிகம் கொண்ட இசுலாமியர்களின் மக்கள் தொகை அதிகமாகக் கூடியதாலும் 1948-ம் ஆண்டு நடந்த அரபு-இஸ்ரேலியப் போரைத் தொடர்ந்து பலஸ்தீனத்தில் இருந்து இஸ்ரேலியர்கள் லெபனானிற்கு தப்பி ஓடியதாலும் 20-ம் நூற்றண்டின் நடுப்பகுதில் இருந்து லெபனானின் இனவிகிதாசாரம் தலைகீழாக மாறியது. பலஸ்த்தீனிய விடுதலை இயக்கம் லெபானானில் வலுமிக்க ஒரு அமைப்பாக உருவானது. மாரோனைற் கிருத்தவர்களுக்கும் பாலஸ்த்தீனிய விடுதலை இயக்கத்திற்கும் இடையில் போர் மூண்டது. அமெரிக்காவும் இஸ்ரேலும் தந்திரமாக பாலஸ்த்தீன விடுதலை இயக்கம் லெபனானைக் கைப்பற்றினால் அது சிரியாவிற்கு ஆபத்தாக முடியும் என சிரிய ஆட்சியாளர்களை நம்ப வைத்தனர். இதனால் அப்போதைய சிரிய அதிபர் ஹஃபீஸ் அல் அசாத் 1976இல் லெபனானிற்கு நாற்பதினாயிரம் படையினரை அனுப்பினார். பல பாலஸ்த்தீனிய விடுதலைப் போராளிகள் கொன்று குவிக்கப்பட்டனர். லெபனானிய துரூஸ் இனக் குழுமத்தினரின் தலைவர் கமால் ஜம்பிளட் கொல்லப்பட்டார். லெபனானில் பாலஸ்த்தீனிய விடுதலை அமைப்பு ஒழித்துக் கட்டப்பட்டது. எஞ்சிய பாலஸ்த்தீனியர்கள் அபு நிதால் என்னும் பெயரில் உள்ள அமைப்பின் கீழ் இயங்கினர். அவர்களை 1982இல் இஸ்ரேல் லெபனானில் படை எடுத்துக் கொன்று குவித்தது. லெபனானின் தென் பகுதியையும் கைப்பற்றிக் கொண்டது. பின்னர் தெற்கு லெபனானில் உள்ள பெரும்பானமை சியா முசுலிம்கள் மத்தியில் ஹிஸ்புல்லா அமைப்பு உருவானது. இன்றுவரை இஸ்ரேலுக்கு பெரும் சவாலாக கடவுளின் படை என்னும் பொருள் கொண்ட ஹிஸ்புல்லா திகழ்கின்றது. ஹிஸ்புல்லாவின் தோற்றத்திற்கும் வளர்ச்சிக்கும் சியா முசுலிம்களைப் பெரும்பான்மையினராகக் கொண்ட ஈரானிற்குப் பெரும் பங்கு உண்டு. ஹிஸ்புல்லா அமைப்பினர் பல மருத்துவ மனைகள் கல்விக்கூடங்கள் போன்றவற்றை லெபனானில் நடாத்தி வருகின்றனர். தொலைக்காட்சி சேவை உட்படப் பல ஊடகங்களையும் ஹிஸ்புல்லா நடாத்தி வருகின்றது.

ஈரானின் ஹிஸ்புல்லா
பல ஆண்டுகளாக இஸ்ரேலியப் படைகளுக்கு எதிரான கரந்தடிப் போரில் பாலஸ்த்தீனியர்கள் ஈடுபட்டனர். 1978இல் ஐக்கிய நாடுகளின் சமாதானப் படை லெபனானிற்கு அனுப்பப்பட்டது. 1983-ம் ஆண்டு லெபனானின் தலைநகர் பெய்ரூட்டில் இருந்த அமெரிக்கக் கடற்படையினர் மீது ஹிஸ்புல்லா தற்கொடைத் தாக்குதல் நடாத்தி 241 படையினரைக் கொன்றது. இது அமெரிக்கப் படையைப் பொறுத்தவரை ஒரு நாளில் ஏற்பட்ட பேரிழப்பாகும். இதில் இருந்து ஹிஸ்புல்லா உலகப் புகழ் பெற்றதுடன் அமெரிக்கப் படைகளையும் 1984இல் லெபனானில் இருந்து வெளியேற்றியது. 1982-ம் ஆண்டு லெபனானில் அமைதியை ஏற்படுத்த எனச் சென்ற பன்னாட்டுப் படைகளில் அமெரிக்கப் படையினரும் உள்ளடக்கப்பட்டிருந்தனர்.  1992-ம் ஆண்டு ஹிஸ்புல்லாவை உருவாக்கியவரிகளில் ஒருவரும் அதன் தலைவருமான அப்பால் அல் முசாவியை இஸ்ரேல் கொன்றது. அதைத் தொடர்ந்து ஹசன் நஸ்ரல்லா ஹிஸ்புல்லாவின் தலைமைப் பொறுப்பை ஏற்றுக் கொண்டார். இஸ்ரேலுக்கு எதிராக உறுதியாகப் போராடும் சியா முசுலிம்களின் அமைப்பான ஹிஸ்புல்லாவிற்கு சிரியாவும் ஈரானும் உற்ற நட்பு  நாடுகளாகின. ஹிஸ்புல்லாவின் கல்வி மேம்பாடு உட்பட்ட பல சமூக அபிவிருத்தி வேலைகள் பலரது கவனத்தை ஈர்த்ததுடன் பல நிதி உதவியாளர்களையும் கவர்ந்தது. லெபனானில் உள்ள சுனி முசுலிம்கள் பல பிரிவுகளாகப் பிளவு பட்டு இருக்கும் போது ஹிஸ்புல்லா லெபனானில் உள்ள சியா முஸ்லிம்களை தனது பிடிக்குள் வைத்திருக்கிறது. ஈரான் இஸ்ரேலுக்கு எதிரான தனது நகர்வுகளுக்கு ஹிஸ்புல்லாவைப் பாவிக்கிறது.

ஹிஸ்புல்லாவின் அரண் ஆட்டம் காணத் தொடங்கியது
ஹிஸ்புல்லாவின் இருப்பிற்கு சிரிய ஆட்சியாளர்களும் ஈரானும் முக்கியமானவையாகும். சிரிய அதிபர் பஷார் அல் அசாத் சியா முசுலிம்களின் ஒரு பிரிவினரான அலவைற் இனக் குழுமத்தைச் சேர்ந்தவர். இவர் சுனி முசுலிம்களைப் பெரும்பான்மையினராகக் கொன்ட சிரியாவின் ஆட்சியைத் தனது தந்தையாரிடம் இருந்து பெற்றுக் கொண்டார். ஹிஸ்புல்லாவிற்குத் தேவையான படைக்கலன்களும் நிதியும் ஈரானிடமிருந்தும் சிரியாவிடமிருந்தும் கிடைக்கின்றன. ஹிஸ்புல்லாவிற்கு ஸ்கட் ஏவுகணைகளைக் கூட சிரியா வழங்கியிருந்தது. 2011ம் ஆன்டு சிரியாவில் ஆரம்பமான அரபு வசந்தம் பஷார் அசாத்தின் ஆட்சிக்குப் பெரும் சவாலாக அமைந்தது. ஹிஸ்புல்லா அமைப்பினர் லெபனானில் இருந்து சிரியா சென்று அசாத்தின் படைகளுடன் இணைந்து கிளர்ச்சிக்காரர்களுக்கு எதிராகப் போராடத் தொடங்கினர். சிரியா அமெரிக்க ஆதரவு ஆட்சியாளர்களின் கைகளிற்கோ அல்லது சவுதி ஆதரவு பெற்ற சுனி முசுலிம்களின் கைக்களிற்கோ சென்றால் அது ஹிஸ்புல்லாவிற்குப் பெரும் சவாலாக அமையும். அத்துடன் ஈரான் மத்திய கிழக்கில் தனிமைப்படுத்தப்படும். இதனால் ஈரானும் ஹிஸ்புல்லா அமைப்பினரை அசாத்தின் படைகளுடன் இணைந்து போராடும்படி வேண்டிக் கொண்டது.


ஹிஸ்புல்லாவை அழிக்க முயலும் அமெரிக்கா
ஹிஸ்புல்லாவை அமெரிக்கா இரு முனைகளில் இப்போது அழித்து வருகின்றது. லெபனானிய அரச படைகளுக்கு பயிற்ச்சியும் படைக்கல உதவியும் அமெரிக்கா வழங்குகின்றது. அதே வேளை சிரியாவில் அதிபர் பஷார் அல் அசாத்திற்கு எதிராகப் போராடும் அமைப்புகளில் சிலவற்றிற்கு அமெரிக்கா படைப் பயிற்ச்சியும் படைக்கலன்களும் வழங்குகின்றது. இவை ஹிஸ்புல்லா அமைப்பினர் மீது தாக்குதல் நடாத்துகின்றன. ஈரானின் வேண்டு கோளிற்கு ஏற்ப ஹிஸ்புல்லா ஈராக்கிற்கு சென்று அங்கு சுனி முசுலிம் போராளி அமைப்பான ஐ.எஸ் எனப்படும் இசுலாமிய அரசு அமைப்பிற்கு எதிராகவும் போராடுகின்றது.

போராளிகள் தலைகளில் அதிக சுமை
சிரியாவில் போராடும் ஹிஸ்புல்லாப் போராளிகள் பலர் தமது போரைக் கைவிட்டு தலைமையின் கட்டளைக்குப் பணிய மறுத்து லெபனான் திரும்புவதாகச் செய்திகள் சொல்கின்றன. சிரியப் போரில் இறந்த போராளிகளின் குடும்பங்களுக்கு போதிய உதவிகள் செய்யப்படாமையும் போராடும் போராளிகளுக்கு உரிய கொடுப்பனவுகள் வழங்கப்படாமையும் போராளிகளைப் பெரிதும் அதிருப்திக்கு உள்ளாக்கியுள்ளது. சிரியா ஈராக் ஆகிய நாடுகளில் போராடுவது ஹிஸ்புல்லாப் போராளிகளுக்குப் பெரும் சுமையாகவும் அமைந்துள்ளது.

இஸ்ரேல் ஹிஸ்புல்லா மீது பாயுமா?
சிரியாவில் ஹிஸ்புல்லா அமைப்பினருக்கு கிடைத்துக் கொண்டிருக்கும் களமுனை அனுபவம் இஸ்ரேலைச் சிந்திக்க வைத்துள்ளது. அத்துடன் சிரிய அரசிடமிருந்து புதிய தரப் படைக்கலன்களை ஹிஸ்புல்லா பெறுவதாக இஸ்ரேல் சந்தேகிக்கின்றது. பல தடவைகள் சிரியாவில் இருந்து லெபனானிற்கு படைக்கலன்களை எடுத்துச் சென்ற வண்டிகளின் தொடரணிகள் மீது இஸ்ரேலிய விமானங்கள் தாக்குதல்கள் நடாத்தியுள்ளன. லெபனான், சிரியா, ஈராக் ஆகிய நாடுகளில் ஹிஸ்புல்லா பரந்திருக்கும் வேளையில் லெபனானியப் படைகளும் சிரியக் கிளர்ச்சிக்காரர்களும் ஹிஸ்புல்லா மீது தாக்குதல்கள் நடாத்துகின்றனர். ஹிஸ்புல்லாவின் முன்னணிப் படையணிகள் சிரியாவிற்கு சென்று விட்டன. இஸ்ரேலின் எல்லையை ஒட்டிய லெபனானின் மேற்குப் பிரதேசத்தில் தற்போது சாதாரண படையணிகள்தான் எல்லைப் பாதுகாப்பில் ஈடுபட்டுள்ளன. சரியான தருணம் பார்த்து இஸ்ரேலியப் படைகள் ஏற்கனவே பல தடவைகள் செய்தது போல லெபனானிற்குள் புகுந்து ஹிஸ்புல்லாவின் படையினரையும் படைக்கலன்களையும் அழிக்கலாம்.

நீருக்கடியில் பயணிக்கும் ஆளில்லாக் கப்பல்கள்

ஆளில்லா விமானங்கள்(Drones) படைத்துறையில் இருந்து வீட்டுக் வீடு பொருட்களை விநியோகிப்பது வரை பாவிக்கப் படும் வேளையில் படைத்துறைத் தேவைகளுக்காக நீருக்கடியில் பயணிக்கும் ஆளில்லாக் கப்பல்கள் Underwater Drones) உருவாக்கப்பட்டுக் கொண்டிருக்கின்றன. சீனா தரத்திலும் தொகையிலும் வேகமாகப் பெருக்கிவரும் நீர் மூழ்கிக் கப்பல்களின் சவால்களை சமாளிக்க அமெரிக்கா நீருக்கடியில் பயணிக்கும் கப்பல்களை உருவாக்குகின்றது.

பனிப் போர்க் காலத்திலிருந்தே நீருக்கடியில் உளவு பார்க்கும் திறன் மேம்படுத்தப் பட்டுக் கொண்டிருக்கின்றது. அப்போது சோவியத் ஒன்றியத்தின் போர்க் கப்பல்களைக் கண்காணிக்க உலகெங்கும் உள்ள கடற்படுக்கைகளில் ஐக்கிய அமெரிக்கா வைத்த உணரிகள் இப்போதும் பாவனையில் உள்ளன. சோவியத்தின் கடற்படைக் கப்பல்களிலும் பார்க்க சீனக் கடற்படைக் கப்பல்கள் இரைச்சல் அதிகமானவை என்பதால் சீனக் கலன்களின் நடமாட்டங்களை இலகுவாக அவதானிக்கக் கூடியதாக இருக்கின்றது. ஆனால் சீனா தனது நீர் மூழ்கிக் கப்பல்களை மிகவும் இரகசியமாக மேம்படுத்திக் கொண்டிருக்கின்றது. அத்துடன் நீருக்கடியில் பாய்ந்து போர்க் கப்பல்களையும் நீர்மூழ்கிக் கப்பல்களையும் அழிக்கக் கூடிய ஏவுகணைகளையும் மேம்படுத்திக் கொண்டிருக்கின்றது. சீனாவின் இறுதி நோக்கம் ஆசிய பசுபிக் பிராந்தியத்தில் அமெரிக்க விமானம் தாங்கிக் கப்பல்களின் நடமாட்டத்தைக் கட்டுப் படுத்துவதாகும். சீனாவின் விமானம் தாங்கிக் கப்பல்களுடன் ஒப்பிடுகையில் அமெரிக்க விமானம் தங்கிக் கப்பல்கள் இரண்டு தலை முறை மேம்பட்டவையாகும். இதனால் சீனா தனது கடற்பாதுகாப்பிற்கு நீர் மூழ்கிக் கப்பல்களில் பெரிதும் தங்கி இருக்கின்றது. சீனாவின் முத்து மாலைத் திட்டத்தில் உள்ள துறைமுகங்கள் பெரும்பாலும் நீர் மூழ்கிக் கப்பல்களை தங்கவைக்கக் கூடியவையாகவே வடிவமைக்கப் பட்டுள்ளன.

சீனாவின் நீர் மூழ்கிக் கப்பல்களுக்கு அமெரிக்க்காவின் ஆப்பு?
ஐக்கிய அமெரிக்கா உருவாக்கும் நீருக்கடியில் ஆளில்லாமல் பயணிக்கக் கூடிய சிறுகப்பல்கள் Autonomous Continuous Trail Unmanned Vessel எனப் பெயரிடப்பட்டுள்ளன. தமிழ்ல் இவற்றை தொடர்ச்சியாகத் தடம் தேடும் ஆளில்லாத் தானியங்கிக் கலன்கள் எனக் கூறலாம். இவை நீருக்கடியில் வேவுபார்த்தலில் இருந்து  கண்காணித்தல் வரை (reconnaissance to surveillance) செய்யக் கூடியவை. இவற்றின் உணரிகள் ஓசையின்றி நீருக்கடியில் பயணிக்கும் டீசலில் இயங்கும் நீர் மூழ்கிக் கப்பல்களை தூரத்தில் வைத்தே கண்டறியக் கூடியவை. அதற்கேற்ற வகையில் நெடுந்தூரம் கண்காணிக்கக் கூடிய ரடார்கள் என்னும் கதுவிகளை இவை கொண்டிருக்கின்றன. சீனாவின் பெரும்பாலான நீர் மூழ்கிக் கப்பல்கள் டீசலில் இயங்குபவையாகும்.

மனிதர்களால் இயக்கப்படும் கடற்கலன்கள் International Maritime Organizaடிஒன் என்னும் பன்னாட்டு நிறுவனத்தின் கட்டுப்பாடுகளுக்கு இணங்க செயற்படவேன்டும். ஆனால் ஆளில்லாக் கப்பல்களை அந்த நிறுவனத்தின் கட்டுப்பாடுகள் பாதிக்காது.

வெற்றீகரமான சோதனைகள்
தொடர்ந்து 42 நாட்கள் அமெரிக்காவின் Autonomous Continuous Trail Unmanned Vessel என்னும் நீருக்கடியில் ஆளில்லாமல் பயணிக்கக் கூடிய சிறுகப்பல்கள் கடலில் பரிசோதிக்கப்பட்டன. அவை தாமாகவே மற்றக் கப்பல்களுடன் மோதாமல் தமது பாதைகளை நிலைமைகளுக்கு ஏற்ப மாற்றிக் கொன்டு பயணித்தன. நூற்றுக்கு மேற்பட்ட வேறு வேறு சூழல்களில் இப்பரிசோதனைகள் மேற்கொள்ளப்பட்டன. இச் சோதனைகளில் தானாக இயங்கும் தன்மை நன்கு செயற்படுவது அவதானிக்கப்பட்டது. நிலைமகளுக்கு ஏற்ப இந்த ஆளில்லாக் கப்பல்கள் தமது வேகங்களையும் மாற்றக் கூடியவையாக இருக்கின்றன.

2015-ம் ஆண்டு ஐக்கிய அமெரிக்கா உருவாக்கும் Autonomous Continuous Trail Unmanned Vessel என்னும் நீருக்கடியில் ஆளில்லாமல் பயணிக்கக் கூடிய சிறுகப்பல்கள் பாவனைக்கு வரவிருக்கின்றன.

உலகக் கடற்பரப்பு அனைத்தையும் கண்காணிக்கும் அமெரிக்காவின் ஆளில்லாப் போர்விமானங்கள்

அமெரிக்கக் கடற்படையினர்   என்னும் ஆளில்லாப் போர்விமானங்கள் மூலம் உலகின் எல்லாக் கடற்பரப்பையும் தமது கண்காணிப்பின் கீழ் கொண்டு வரவுள்ளனர்.  அமெரிக்கா உருவாக்கும் MQ-4C Triton unmanned aircraft system ஆளில்லாப் போர் விமானங்கள் அமெரிக்காவின் Boeing P-8 Poseidon என்னும் விமானிகள் ஓட்டும் கண்காணிப்பு விமானங்களுடன் இணைந்து செயற்படக் கூடியவை.

40 அடி உடலையும் 131 அடி இறக்கைகளையும் கொண்ட MQ-4C Triton ஆளில்லா விமானங்கள் உலகின் வேறு வேறு பாகங்களில் உள்ள ஐந்து தளங்களில் இருந்து செயற்படவிருக்கின்றன. இவற்றால் 50,000 அடி உயரமாகவும்  மிகவும் தாழ்வாகவும் பறக்க முடியும் அத்துடன் மிகவும் பரந்த கடற்பரப்பை கண்காணிக்கவும் வேவு பார்க்கவும் முடியும். தொடர்ந்து 24 மணித்தியாலங்களுக்கு மேல் இவற்றால் பறக்க முடியும். மிகவும் உயர்ந்ததர உணரிகளாலும் ஒளிப்பதிவுக் கருவிகளாலும் திரட்டப்படும் தகவல்களை இவை உலகெங்கும் உள்ள அமெரிகக் கடற்படைத் தளங்களுக்கு அனுப்பிக் கொண்டிருக்கும். இதானால் உலகக் கடற்பரப்பு எல்லாவற்றையும் அமெரிக்கக் கடற்படையால் தொடர்ச்சியாகக் கண்காணிக்கவும் வேவு பார்க்கவும் முடியும்.

2017-ம் ஆண்டு முழுமையான சேவைக்கு வரும் MQ-4C Triton ஆளில்லா விமானங்கள் மணிக்கு முன்னூறு மைல்கள் வேகத்தில் பறந்து இரண்டாயிரம் கடல் மைல்களைக் கண்காணிக்கக் கூடியவை. இவற்றினுள் 3200 இறாத்தல் எடையுள்ள படைக்கலன்களை எடுத்துக் கொண்டு பறக்கும் போது வெளியில் 2400 இறாத்தல் எடையுள்ள படைக்கலன்களையும் பொருத்திக் கொண்டும் பறக்க முடியும்.

50,000 அடி உயரத்தில் பறந்து கொண்டிருக்கும் போது தேவை ஏற்படின் தனது electro-optical/infrared உணரிகளின் துணையுடன் எந்தவித முகில்களூடாகவும் இறங்கி மிகவும் தாழப்பறந்து உளவு, கண்காணிப்பு, வேவு போன்றவற்றைச் செய்ய முடியும்.

2014 ஒக்டோபர் மாதம் செய்யப்பட்ட இரண்டாவது பரீட்சார்த்த பறப்புக்கள் மிகவும் சிறப்பாக அமைந்ததாக அமெரிக்கக் கடற்படையினர் தெரிவித்துள்ளனர்.

உலக எரிபொருள் விநியோகமும் புவிசார் அரசியலும்

புவிசார் அரசியல் என்பது அடிக்கடி எமது கண்களிலும் காதுகளிலும் அடைக்கடி விழும் சொற்பதமாகும்.

ஒரு குறிப்பிட்ட நிலப்பரப்பில் உள்ள மக்கள் தொகைக் கட்டமைப்பும் பொருளாதாரமும் தொடர்பான ஆதிக்கம் புவிசார் அரசியல் எனப்படும். 
முதலாவது ஒரு குறிப்பிட்ட நிலப்பரப்பில் உள்ள மக்களின் அரசியல் ஆதிக்கம் புவிசார் அரசியலில் முக்கியத்துவம் வகிக்கின்றது. 
இரண்டாவது அக்குறிப்பிட்ட நிலப்பரப்பில் உள்ள பொருளாதார வளங்கள் மீதான ஆதிக்கத்தை யார் செலுத்துவது என்பது புவிசார் அரசியலில் முக்கியத்துவம் பெறுகின்றது. 
மூன்றாவது ஒரு குறித்த நிலப்பரப்பில் உள்ள மக்கள், பொருளாதாரம், மற்றும் அரசு அல்லது அரசுகள் தொடர்பாக அந்த நிலப்பரப்புடன் தொடர்புடைய அரசுகளின் வெளிநாட்டுக் கொள்கை அந்த நிலப்பரப்பின் புவிசார் அரசியலில் முக்கியத்துவம் வகிக்கின்றது.
நான்காவது: ஆதிக்கம் தொடர்பான போட்டியை படை வலிமை (பல சமயங்களில்) முடிவு செய்யும்

இதையே சுருக்கமாகச் சொல்வதானால் ஒரு குறிப்பிட்ட நிலப்பரப்பில் உள்ளவை தொடர்பான பல் வேறு நாடுகளின் கொள்கைகளை புவிசார் அரசியல் எனலாம். இங்கு உள்ளவை எனக் குறிப்பிட்டது மிகவும் பரந்த பொருளுடைய ஒரு சொல்லாகும். மக்கள், மதம், கலாச்சாரம், வளம், பொருளாதாரம், படைவலு எனப் பலவற்றை இந்த உள்ளவை என்னும் சொல் தாங்கி நிற்கின்றது. 

மதப் பரப்பலில் புவிசார் அரசியல்

கிறிஸ்த்தவ மதம் உருவாகிப் பரவத் தொடங்கியதில் இருந்து மதம் புவிசார் அரசியலில் முக்கியத்துவம் வகிக்த்தது. பின்னர் உருவான இசுலாமிய மதத்தைப் பரப்புவது தொடர்பாக புவிசார் அரசியல் மோசமான போட்டியாக உருவானது. கிருஸ்துவ மதத்தை முன்னெடுத்த ரோமானியப் பேரரசு வீழ்ச்சியடைந்து இசுலாமிய மதத்தைப் பரப்பிய உதுமானியப் பேரரசு எழுச்சியடைந்தது.

1760-ம் ஆண்டில் இருந்து 1840-ம் ஆண்டு வரை நடந்த கைத்தொழிற்புரட்சிக்குப் பின்னர் எரிபொருளே பல வலுமிக்க நாடுகளின் முக்கிய தேவையாக அமைந்தது

பத்தொன்பதாம் நூற்றாண்டில் இருந்து உலகப் புவிசார் அரசியலில் பெரும் பங்கு வகித்தது எரிபொருள் பிரச்சனையே. மத்திய கிழக்கில் நடந்த பல போர்கள் எரிபொருள் உற்பத்தி மற்றும் விநியோகம் தொடர்பானவையாகவே இருக்கின்றன. கடந்த முப்பது ஆண்டுகளாக ஆசிய நாடுகள் பல பொருளாதார வளர்ச்சியடைந்த படியால் தற்போது உலக ஹைதரோக் காபன் எரிபொருளில் காற்பங்கை சீனா, இந்தியா, ஜப்பான், தென் கொரியா ஆகிய நாடுகள் பாவனை செய்கின்றன. இனி வரும் இருபது ஆண்டுகளில் உலக எரிபொருள் பாவனை அதிகரிப்பின் 85 விழுக்காடு இந்த நாடுகளாலேயே ஏற்படும். அடுத்த இருபது ஆண்டுகளில் அதிக எரிபொருள் பாவனையை சீனா செய்யும். அதன் பின்னர் இந்தியா அந்த முதலாம் இடத்தைப் பெறும். இனிவரும் பத்து ஆண்டுகளில் அமெரிக்கா தனது ஷேல் எரிபொருள் உற்பத்தியை மூன்று மடங்காக அதிகரிக்கும். அத்துடன் உலகில் அதிக அளவு எரிபொருள் ஏற்றுமதி செய்யும் நாடாக மாறும். அமெரிக்காவுடன் கனடாவும் பிரேசிலும் தமது ஷெல் எரிபொருள் உற்பத்தியை இனி வரும் ஆண்டுகளில் அதிகரிக்கவிருக்கின்றன. இதனால் மத்திய கிழக்கை அமெரிக்கக் கண்டம் எரிபொருள் உற்பத்தியில் இரண்டாம் இடத்திற்கு தள்ளவிருக்கின்றது. இதுவரை ஐரோப்பிய நாடுகளுக்கு தனது எரிபொருளை ஏற்றுமதி செய்து வந்த இரசியா தனது ஏற்றுமதியை கிழக்கு நோக்கி நகர்த்தி சீனாவிற்கும் இந்தியாவிற்கும் தனது ஏற்றுமதியை அதிகரிக்கவிருக்கின்றது. சீனா தனது நாட்டிற்கான எரிபொருள் விநியோகம் தங்கு தடையின்றி நடப்பதை உறுதி செய்ய பட்டுப் பாதைத் திட்டத்தையும் முத்து மாலைத்திட்டத்தையும் இணைத்து தனது உபாயங்களை வகுக்கின்றது.

சோவியத் ஒன்றியத்தை வீழ்த்திய எரிபொருள் 

1991-ம் ஆண்டு சோவியத் ஒன்றியத்தை வீழ்ச்சியடையச் செய்ததில் சவுதி அரேபியாவிற்கும் பெரும் பங்கு உண்டு. எரிபொருள் ஏற்றுமதில் அப்போது சோவியத் ஒன்றியம் பெரிதும் தங்கி இருந்தது. தனது உற்பத்தியை அதிகரித்து உலக எரிபொருள் விலையை சவுதி அரேபியா வீழ்ச்சியடையச் செய்தது. இதனால் சோவியத் ஒன்றியத்தின் ஏற்றுமதி வருமானம் பெரிதும் பாதிப்படைந்தது. ஆப்கானிஸ்த்தானில் செய்த ஆக்கிரமிப்பால் ஏற்கனவே பாதிப்படைந்திருந்த சோவியத் பொருளாதாரம் மேலும் மோசமாகப் பாதிக்கப்பட்டு சோவியத் ஒன்றியம் விழ்ச்சியடைந்தது

சவுதியின் அடுத்த அதிரடி

தற்போது சிரியாவில் அதிபர் பஷார் அல் அசாத்தின் ஆட்சியை விழ்ச்சியடையச் செய்ய சவுதி அரேபியா பெரிதும் முயல்கின்றது. அங்கு பெரும்பான்மையாக வாழும் சுனி இசுலாமியரின் ஆட்சியைக் கொண்டு வந்து சிரியாவில் ஈரானின் ஆதிக்கத்தை அடக்க சவுதி அரேபியா விரும்புகின்றது. சிரியாவில் அசாத்தின் ஆட்சி தொடர இரசியா பலவகைகளில் உதவுகின்றது. அசாத்திற்கு எதிராக ஐக்கிய நாடுகள் நிறுவனத்தின் பாதுகாப்புச் சபையில் கொண்டு வந்த தீர்மானங்களை இரசியய இரத்துச் செய்தது. ஐக்கிய அமெரிக்கா சிரியாவில் அசத்தின் படைகளுக்கு எதிராகத் தாக்குதல் நடாத்தினால் இரசியாவின் செஸ்னியப் பிராந்தியத்தில் உள்ள இசுலாமியத் தீவிரவாதிகளுக்கு உதவும் சவுதி அரேபியாவின் எர்பொருள் உற்பத்தி நிலையங்கள் மீது தான் தாக்குதல் நடாத்தப் போவதாக இரசியா அமெரிக்காவையும் சவுதி அரேபியாவையும் எச்சரித்திருந்ததாகச் சொல்லப்படுகின்றது. இந்த நிலையில் சவுதி அரேபியா தனது எரிபொருள் உற்பத்தியை அதிகரித்தும் அமெரிக்கா தனது ஷேல் எரிவாயும் உற்பத்தியை அதிகரித்தும் உலக எரிபொருள் விலையை வீழ்ச்சியடையச் செய்தன. இரசியாவின் 2015, 2016, 2017 ஆண்டுகளுக்கான அரச வரவு செலவுத் திட்டம உலக எரிபொருள் விலை பீப்பாய் ஒன்றிற்கு 100 அமெரிக்க டொலர்களாக இருக்கும் என்ற எதிர்பார்ப்பில் செய்யப் பட்டவை. தற்போது ஒரு பீப்பாய் எரிபொருளின் விலை 85 டொலர்களிலும் குறைந்து விட்டது. இரசியா இந்த எரிபொருள் விலை வீழ்ச்சியை தனது நாணயமான ரூபிளின் மதிப்பிறக்கத்தால் சமாளிக்கின்றது. வீழ்ச்சியடைந்த நாணய மதிப்பு ஒரு தற்காலிக நிவாரணியே. வீழ்ச்சியடையும் ரூபிளும் எரிபொருள் விலையும் இரசியப் பொருளாதாரத்தில் நீண்ட கால அடிப்படையில் பெரும் பாதிப்பை ஏற்படுத்தப் போகின்றது. இன்னும் ஒரு புவிசார் அரசியல் பிரச்சனையான உக்ரேன் விவகாரத்தால் இரசியாமீது வட அமெரிக்க நாடுகளும் ஐரோப்பிய ஒன்றிய நாடுகளும் கொண்டு வந்த பொருளாதாரத் தடையும் இரசியப் பொருளாதாரத்தில் பாதிப்பை ஏற்படுத்தியுள்ளன. 

அமெரிக்காவின் நிலையில் மாற்றம்
அமெரிக்காவைப் பொறுத்தவரை கடந்த நூறு ஆண்டுகளுக்கு மேல் அதன் எரிபொருள் தேவை பல பிராந்தியங்களின் புவிசார் அரசியலில் தாக்கம் செலுத்தி வந்தது. இப்போது அதன் எரிபொருள் ஏற்றுமதி பல பிராந்தியங்களின் புவிசார் அரசியலில் தாக்கம் செலுத்தப் போகின்றது. இரசியாவின் பிராந்திய ஆதிக்கத்திற்கு தனது எரிபொருள் விநியோகத்தை மாற்றுவதன் மூலம் அமெரிக்கா சவால் விடுக்கின்றது. வளைகுடாப் பிராந்தியத்தில் ஈரானின் ஆதிக்கக் கனவை அடக்க ஈரானின் பல் பிடுங்கும் முயற்ச்சியில் தீவிரமாக ஈடுபட்டுக் கொண்டிருக்கின்றது. அமெரிக்கா தனது மசகு எண்ணெய் மற்றும் வாயு (Crude oil and lease condensate production) உற்பத்தியை நாளொன்றிற்கு 8.6பில்லியன் பீப்பாய்களாக அதிகரித்துள்ளது. அமெரிக்காவின் எரிபொருள் ஏற்றுமதி மீது இருந்த கட்டுப்பாடுகள் விரைவில் நீக்கப்படலாம். 2015-ம் அமெரிக்கா ஐரோப்பாவிற்கும் ஆசியாவிற்கு எரிபொருள் ஏற்றுமதி செய்யும் என எதிர்பார்க்கப்படுகின்றது.

அடக்கப்படுவாரா புட்டீன்?

மேற்கு நாடுகள் விதித்த பொருளாதாரத் தடையால் இரசியாவிற்கு ஆண்டொன்றிற்கு 40பில்லியன் அமெரிக்க டொலர்கள் இழப்பும் எரிபொருள் விலைவீழ்ச்சியால் ஆண்டு ஒன்றிற்கு 100பில்லியன் டொலர்கள் இழப்பும் ஏற்படுகின்றது. 2014-ம் ஆண்டில் இரசியாவில் இருந்து 130பில்லியன் அமெரிக்க டொலர்கள் முதலீடு வெளியேறும் என எதிர்பார்க்கப்படுகின்றது 2014-ம் ஆண்டின் செப்டம்பர் ஒக்டோபர் மாதங்களில் இரசிய நாணயமான ரூபிள் 30விழுக்காடு பெறுமதி வீழ்ச்சியடைந்துள்ளது.  இரசிய அதிபர் விளடிமீர் புட்டீன் சோவியத் ஒன்றியத்தின் வீழ்ச்சி இருபதாம் நூற்றாண்டில் நடந்த மோசமான விபத்து என்று கருதுகின்றார். மீண்டும் இரசியாவின் தலைமையில் முன்னாள் சோவியத் ஒன்றிய நாடுகளை ஒன்று படுத்தும் கனவுடன் இருக்கின்றார். அவரது இந்த கிழக்கு ஐரோப்பிய மத்திய ஆசிய புவிசார் அரசியல் கனவை எரிபொருள் விலை உடைக்குமா என்பதைப் பற்றி அறிய இன்னும் குறைந்தது இரண்டு ஆண்டுகளாவது காத்திருக்க வேண்டும்.

சீன ஜப்பானிய உறவு நெருக்கமடையுமா நொருங்கிப் போகுமா?

சீன அதிபர் ஷி ஜின்பிங்கும் ஜப்பானிய அதிபர் சின்ஷோ அபேயும் இருபத்தொரு நாடுகளைக் கொண்ட ஆசிய பசுபிக் பொருளாதாரக் கூட்டுறவின் உச்சி மாநாட்டில் 2014 ஒக்டோபர் 10-ம் திகதி சந்தித்துக் கொண்டனர்.  பீஜிங்கில் உள்ள மக்கள் பெரு மண்டபத்தில் இந்தச் சந்திப்பு நடைபெற்றது. ஒன்றுடன் ஒன்று பிரச்சனைக்கு உரிய உறவு நிலையில் உள்ள இரு நாட்டுத் தலைவர்கள் சந்திக்கும் போது அவர்களின் உடல் மொழியை அரசியல் நோக்குனர்கள் நுணுக்கமாக அவதானிப்பார்கள். 2012 டிசம்பர் மாதம் பதவிக்கு வந்த சின்ஷே அபேயிர்கும் 2013 மார்ச்சில் பதவிக்கு வந்த ஷி ஜின்பிங்கிற்கும் இடையில் நடத்த சந்திப்பு வழமைக்கு அதிகமாக அவதானிக்கப்பட்ட போதிலும் இச் சந்திப்பு இரு நாடுகளுக்கும் இடையிலான உறவில் பெரும் மாற்றத்தை ஏற்படுத்தாது எனவும் எதிர்பார்க்கப்பட்டது.

சிரிக்காத சீனம்
இந்திய ஜப்பானியத் தலைமை அமைச்சர்கள் சந்தித்த போது அவர்கள் கட்டித் தழுவிய விதமும் அவர்கள் முகத்தில் மலர்ந்த சிரிப்புக்களும் பலராலும் விமர்சிக்கப்பட்டன. சின்ஷே அபேயும் ஷி ஜின்பிங்கும் கைகுலுக்கும் போது  அபேயின் முகத்தில் அவரால் ஒரு புன்னைகை திணிக்கப்பட்டதை அவதானிக்கக் கூடியதாக இருந்தது. ஷி ஜின்பிங்கின் முகத்தில் புன்னகையே இருக்க வில்லை. ஷி ஜின்பிங் கை குலுக்கியது ஓர் ஆர்வமற்ற கைகுலுக்கல் எனவும் அவர் ஓர் இனிய சூழலை அப்போது உருவாக்கவில்லை எனவும் அவதானிக்கப்பட்டுள்ளது. அபே சொன்ன வாழ்த்தை மொழி பெயர்ப்பாளர் மொழி பெயர்த்து ஷியிடம் சொன்னார் ஆனால் பதில் வாழ்த்து எதையும் ஷி சொல்லவில்லை. வழமையாக இரு நாடுகளின் ஆட்சியாளர்களிடையே நடக்கும் சந்திப்புக்கள் எடுக்கும் நேரத்திலும் பார்க்க அரைவாசி நேரத்தில் இவர்களது சந்திப்பு எடுத்துள்ளது. ஷியும் இரசிய அதிபர் விளடிமீர் புட்டீனும் சந்தித்த போது ஷியின் முகத்தில் புன்னகை தவழ்ந்தது. ஜப்பானியத் தலைமை அமைச்சருடன் நட்பு நிறைந்த சந்திப்பை சீன அதிபர் செய்வது சீன மக்களை ஆத்திரப்படுத்தும் என்பதை  ஷி நன்கு அறிவார்.

ஒன்றானாலும் இரண்டே
சீனாவிற்கும் ஜப்பானிற்கும் இடையில் கலாச்சார மற்றும் மத ரீதியில் பெரும் ஒற்றுமை உண்டு. ஜப்பானியக் கலாச்சாரம் சீனாவிடமிருந்து பெறப்பட்டதே என்றும் சொல்லப்படுகின்றது. ஜப்பான் உலகத்தில் இருந்து தனிமைப் பட்டு இருந்த வேளையில் சீனா உலகெங்கும் தனது பட்டுப்பாதையை நீட்டி பலநாடுகளுடன் வர்த்தக மற்றும் கலாச்சாரப் பரிவர்த்தனை செய்யத் தொடங்கிவிட்டது. ஆனால் ஜப்பானியர்கள் சீனர்கள் தமது நாட்டுக்குள் அந்நியர்களை அனுமத்துப் போதைப் பொருளுக்கு அடிமையானார்கள் எனக் கருதுகின்றனர். இரு நாடுகளும் சீனத் தத்துவ ஞானி கன்ஃபூசியஸ் அவர்களின் சிந்தனை அடிப்படையில் தம் கலாச்சாரங்களை வளர்த்துக் கொண்டாலும் சரித்திரமும் பூகோளமும் இரு நாடிகளையும் பிரித்து வைத்துள்ளது.

சீன ஜப்பானியப் பிளவில் சரித்திரத்தின் பங்கு
சீனவின் சூய் அரசவம்சத்தினதும் டாங் அரசவம்சத்தினது ஆட்சிகளின் போது சீன மரபு, கலாச்சாரம், ஆட்சி நிர்வாக முறைமை, கட்டிடக் கலை நகர கட்டுமானம் ஆகியவை ஜப்பானிற்குப் பரவியது. இரு நாடுகளுக்கும் இடையிலான முதலாவது மோதல் கொரியத் தீபகற்பத்தை ஒட்டி ஆரம்பமானது. மூன்று அரசுகள் ஒன்றிணைந்து ஆட்சி நாடாத்திய கொரியாவில் மூன்று அரசுகளும் பிளவு பட்டபோது ஓர் அரசு ஜப்பானுடனும் மற்ற இரு அரசுகள் சீனாவுடனும் உறவு கொண்டாடின. இதனால் கிபி 663-ம் ஆண்டு இரு நாடுகளும் மோதிக் கொண்டன. சீனாவிற்கும் ஜப்பானிற்கும் இடையில் நடந்த கடற்போரில் முன்னூற்றுக்கும் மேற்பட்ட ஜப்பானியப் கடற்கலன்கள் அழிக்கப்பட்டன. பின்னர் 1593-ம் ஆண்டில் இருந்து 1598-ம் ஆண்டு வரை ஜப்பான் கொரியத் தீபகற்பத்தைக் கைப்பற்ற முயன்று தோற்றுப் போனது. சீனர்களினதும் கொரியர்களினதும் மிகையான ஆளணிவலுவைன் முன்னால் ஜப்பானால் நின்று பிடிக்க முடியவில்லை.  ஆனால காலப் போக்கில் நிலைமை தலைகீழாக மாறிவிட்டது. ஜப்பான் தன் படைவலுவை அதிகரித்துக் கொண்டது. 1876-ம் ஆண்டு தற்போது தென் கொரியா, வட கொரியா எனப்படும் இரு நாடுகளைக் கொண்ட கொரியத் தீபகற்பத்தை ஜப்பான் கைப்பற்றி தன்னுடன் இணைத்துக் கொண்டது. ஜப்பானிற்கும் சீனாவிற்கும் இடையில் உள்ள ரியுகியூ தீவுகள் யாருக்கும் சொந்தம் என்பதில் இரு நாடுகளும் 1894-ம் ஆண்டு மோதிக்கொண்டன. இதில் தாய்வான் தீவு உட்படப் பல நிலப்பரப்புக்களை சீனா ஜப்பானிடம் இழந்தது. இரண்டாம் உலகப் போரில் ஜப்பான் தோற்கடிக்கப்படும்வரை கொரியத் தீபகற்பமும் தாய்வான் தீவும் ஜப்பானின் ஆதிக்கத்தின் கீழேயே இருந்தன. 1931-ம் ஆண்டில் இருந்து 1937-ம் ஆண்டு வரை இரு நாடுகளும் தொடர்ச்சியாகவும் அடிக்கடியும் மோதிக் கொண்டன. இதில் சீனா ஷங்காய் உடபடப் பல நகரங்களை ஜபபானிடம் பறிகொடுத்தது. இப்போர்களின் போது ஜப்பானியப் படைகள் சீனப் போர்வீரர்களையும் பெண்களையும் பல வன்கொடுமைக்கு உள்ளாக்கியதை இன்றும் சீனர்கள் மறக்கவில்லை. 2014 ஒக்டோபர் மாதம் 10-ம் திகதி ஜப்பானியத் தலைமை அமைச்சருடன் கைகுலுக்கும் போது சீன அதிபர் நட்புப் பாராட்டமைக்கு இதுவே காரணம்.

சீன ஜப்பானியப் பிளவில் பூகோளத்தின் பங்கு
சீனாவிற்கும் ஜப்பானிற்கும் இடையிலான முரண்பாட்டின் இரண்டாம் அம்சம் கிழக்குச் சீனக் கடலில் உள்ள தீவுக் கூட்டங்கள் யாருக்குச் சொந்தம் என்பதாகும். இத் தீவுகள் யாருக்கு சொந்தம் என்பதில் சீனாவிற்கும் ஜப்பானுக்கும் இடையிலான முறுகல் நாளுக்கு நாள் மோசமடைந்து கொண்டே போகின்றது. கிழக்குச் சீனக் கடல் வான் பரப்பில் பெரும் பகுதியை சீனா தனது வான் பாதுகாப்பிற்கு உட்பட்ட வலயம் என 2013 நவம்பர் 24-ம் திகதி  அறிவித்தது. இந்த வான் பரப்பு சீனாவும் ஜப்பானும் தமது எனச் சொந்தம் கொண்டாடும் சென்காகு அல்லது டயோயு தீவுக் கூட்டங்களையும் உள்ளடக்கியது என்பதால் உலக அரங்கில் ஒரு பெரும் அதிர்வலை உருவானது.  இதற்குப் பதிலடி கொடுக்கும் முகமாக நவம்பர் 26-ம் திகதி முற்பகல் 11-00இல் இருந்து பிற்பகல் 1.22 வரை அமெரிக்கா தனது இரு பி-52 போர் விமானங்களை சீனா அறிவித்த வான் பாதுகாப்பு வலயத்திற்குள் பறக்க விட்டது. இது சீனா தனது வான் பாது காப்பு வலயம் என அறிவிக்க முன்னர் ஏற்பாடு செய்யப்பட்ட பறப்பு என்கின்றது அமெரிக்கா.  அமெரிக்க விமானங்கள் மேற்குப் பசுபிக் கடலில் உள்ள குவாம் கடற்படைத் தளத்தில் இருந்து கிழக்குச் சீனக் கடலில் தமது பறப்புக்களை மேற் கொண்டன. இப்பறப்புக்கள் பற்றி அமெரிக்கா சீனாவிற்கு எந்த முன்னறிவிப்பையும் செய்யவில்லை. சீனா அறிவித்த வலயம்  சீனத் தரையில் இருந்து 500 மைல்கள் வரை நீள்கின்றது. சீனா சென்காகு அல்லது டயோயு தீவுக் கூட்டங்களிற்கு அடிக்கடி விமானங்களை அனுப்புவதும் அவற்றின் அலைவரிசைகளை ஜப்பான் குழப்புவதும் ஒன்றின் விமானங்கள் மீது மற்ற விமானங்கள் ரடார் பூட்டுப் போடுவதும் அடிக்கடி நடந்தன. இரு நாட்டுக் கடற்படைக் கப்பல்கள் ஒன்றுடன் ஒன்று நேரடியாக மோதும் சூழலும் உருவாகி இருந்தது.

சீன ஜப்பானிய உறவில் பொருளாதாரம்.
இரு நாடுகளுக்கும் இடையிலான பொருளாதாரத் தொடர்புகளைப் பார்த்தால் 2013-ம் ஆண்டு சீனா ஜப்பானில் 434 மில்லியன் அமெரிக்க டொலர்கள் பெறுமதியான முதலீட்டைச் செய்திருந்தது. ஆனால் சீனாவில் ஜப்பான் செய்யும் முதலீடு குறைந்து கொண்டு செல்லும் வேளையில் சீனா ஜப்பானில் செய்யும் முதலீடு அதிகரித்துக் கொண்டிருக்கின்றது. 2013-இல் ஜப்பான் சீனாவில் ஒன்பது பில்லியன் அமெரிக்க டொலர்களுக்கும் மேலான முதலீட்டைச் செய்திருந்தது. சீனா ஜப்பானிற்கு ஆண்டு ஒன்றிற்கு 153 பில்லியன் டொலர்கள் பெறுமதியான ஏற்றுமதியைச் செய்கின்றது. ஜப்பான் சீனாவிற்குச் செய்யும் ஏற்றுமதி 130 பில்லியன் டொலர்கள் பெறுமதியானதாகும். சீனா ஜப்பானிற்குச் செய்யும் ஏற்றுமதி அதிகரிக்கும் வேளையில் ஜப்பானின் ஏற்றுமதி குறைந்து கொண்டே போகின்றது. சீனாவின் பொருளாதார வளர்ச்சி வேகம் குறைந்து கொண்டு போகும் வேளையில் ஜப்பானியப் பொருளாதாரம் கடந்த இருபது ஆண்டுகளாக வளர மல் இருக்கின்றது. இரு நாடுகளுக்கும் இடையிலான வர்த்தகமும் நேரடி முதலீடுகளும் அமைதியான கடற்போக்கு வரத்துகளும் இரு நாட்டுப் பொருளாதாரங்களுக்கு மிகவும் அவசியமானதாக அமைகின்றது.

உருகாத உறைநிலை
மேற்படி தீவுக் கூட்டங்களில் ஏற்பட்ட முரண்பாட்டால் கடந்த இரண்டு ஆண்டுகளாக இரு நாட்டுத் தலைவர்களும் ஒருவருடன் ஒருவர் தொடர்புகளின்றி இருந்தனர். ஷியும் அபேயும் சந்தித்துக் கொண்டது உறைநிலையில் இருந்த இருநாட்டு உறவை "உருகச் செய்யும்" என எதிர்பார்க்கப்பட்டது. ஷி எப்படியும் ஜப்பானை அடக்குவதில் தீவிரமாக உள்ளார். சீன அதிபர் ஷி ஜின்பிங்கின் தந்தை ஜப்பானிய ஆக்கிரமிப்பிற்கு எதிராக போராடியவர் என்றவகையிலும் தந்தையின் நண்பர்களின் பிள்ளைகளுடன் சிறுவயது முதற்கொண்டே ஜப்பானிய அக்கிரமங்களைப்பற்றி பலதடவைகள் உரையாடியவர்கள் என்றவகையிலும் ஜப்பான் மீது அதிக வெறுப்பு உள்ளவராகக் கருதப்படுகின்றார். 1979-ம் ஆண்டு பிஜிங்கின் தின்மன் சதுக்கக் கிளர்ச்சிக்குப் பின்னர் சீனா தனது கல்வித் திட்டத்தில் “அந்நிய ஆக்கிரமிப்பின் மானபங்கத்தில் நூறு ஆண்டுகள்” என்பதை புகுத்தியுள்ளது. இதனால் பல சீன இளைஞர்கள் ஜப்பான் மீது வெறுப்புக் கொண்டுள்ளனர். அண்மைக்கால ஜப்பானியத் தலைமை அமைச்சர்களில் சின்ஷே அபேயே அதிக அளவு தேசியவாதியாவார். ஷி ஜின்பிங்கும் அவ்வாறே. அபே சீன ஜப்பானியப் போரின் போது இறந்தவர்களின் நினைவிடமான யசுக்குனிக்கு அஞ்சலி செய்யச் சென்றது சீனர்களைக் கடுமையாக ஆத்திரப்படுத்தியிருந்தது. இரு தலைவர்களின் சந்திப்பின்போது நிலவிய சிநேகமற்ற சூழலுக்கு இதுவும் ஒரு காரணியாக அமைந்தது.

அமெரிக்காவே துணை.
ஆண்டு தோறும் ஏழு விழுக்காடு பொருளாதார வளர்ச்சியைக் கொண்ட சீனா பாதுகாப்பிற்கு 131 பில்லியன் அமெரிக்க டொலர்களை ஒதுக்குகின்றது. அத்துடன் சீனாவின் பாதுகாப்புச் செலவீனம் 12 விழுக்காட்டிற்கு மேல் ஆண்டுக்கு அதிகரிக்கின்றது. ஆண்டொன்றிற்கு 0.8 விழுக்காடு பொருளாதார வளர்ச்சியைக் கொண்ட ஜப்பான் பாதுகாப்புச் செலவிற்கு 46 பில்லியன் அமெரிக்க டொலர்களை மட்டும் ஒதுக்குகின்றது. அத்துடன் ஜப்பானின் பாதுகாப்புச் செலவு ஆண்டுக்கு 2.8 விழுக்காடு மட்டுமே அதிகரிக்கப்படுகின்றது. ஜப்பானிய அரசமைப்பின் படி அது ஒரு தாக்குதல் படையை வைத்திருக்க முடியாது. அதனால் ஒரு பாது காப்புப் படையை மட்டுமே வைத்திருக்க முடியும். இன்னொரு நாட்டின் மீது ஜப்பானால் படையெடுக்க முடியாது. இருந்தும் ஜப்பானியப் படைவலு உலக நாடுகளின் பட்டியலில் பத்தாவது இடத்தில் உள்ளது. அதனிடம் ஒரு உழங்கு வானூர்தி தாங்கி நசகாரிக் கப்பல் உண்டு. இது ஒரு விமானம் தாங்கிக் கப்பலுக்கு ஈடானதாகும். சீனாவின் படைவலுவின் முன்னர் ஜப்பானால் தனித்து நிற்க முடியாது. அது தனது பாதுகாப்பிற்கு அமெரிக்காவுடன் அது செய்த பாதுகாப்பு ஒப்பந்தம் தான் கைகொடுக்க வேண்டும்.

வாராது காக்க வேண்டும் ஆசியப் போர்
உலகிலேயே போர் மூளும் அபாயம் கூடிய இடங்களாக தென் சீனக் காடலும் கிழக்குச் சீனக் கடலும் இருக்கின்றன. இதற்கு ஜப்பானிற்கும் சீனாவிற்கும் இடையில் பேச்சு வார்த்தை அவசியம். சீன ஜப்பானியப் போர் நடந்தால் அங்கு அமெரிக்காவும் தலையிடும் கட்டாயம் உள்ளது. ஆசிய பசுபிக் பொருளாதாரக் கூட்டுறவின் உச்சி மாநாட்டின் முன்னர் இரு தலைவர்களும் சந்திப்பார்களா என்பது ஒரு முயற்கொம்பாகவே இருந்தது. சீன அதிபர் ஷி ஜின்பிங் ஜப்பானி எதிர்ப்புப் பரப்புரைகள் மூலமும் கிழக்குச் சீனக் கடலுக்கு அடிக்கடி கடற்கலங்களையும் வான் கலன்களையும் அனுப்பி ஜப்பானைச் சீண்டுவதன் மூலமும் சீனாவில் தனது செல்வாக்ககிப் பெருக்கிக் கொள்கின்றார் என்பது ஜப்பானின் குற்றச்சாட்டு. ஜப்பானியர்கள் போரின் போது செய்ய அட்டூழியங்களைப் பற்றி சீனாவில் அதிகம் பேசுவதால் சீனர்கள் இப்போதும் பழைமையிலேயே வாழ எத்தனிக்கின்றார்கள் எனக் குற்றம் சாட்டும் ஜப்பான் அவர்கள் பழையவற்றை மறந்து புது யுகத்தில் இரு நாடுகளிற்கும் இடையிலான ஒத்துழைப்பில் அதிக கவனம் செலுத்த வேண்டும் என்கின்றது. ஜப்பானுடன் பேச்சு வார்த்தை நடாத்துவதற்கு சீன இரு நிபந்தனைகளை விதித்திருந்ததாகக் கூறப்படுகின்றது. ஒன்று சர்ச்சைக்குரியதான ஜப்பானின் இறந்த போர்வீரர்களின் யசுக்குனி எனப்படும் நினைவிடத்திற்கு ஜப்பானியத் தலைமை அமைச்சர் பயணம் மேற்கொள்ளக் கூடாது. மற்றது கிழக்குச் சீனக் கடலில் உள்ள சென்காகு அல்லது டயோயு தீவுக் கூட்டங்கள் தொடர்பாக இருநாடுகளுக்கும் இடையில் முரண்பாடு இருக்கின்றது என்பதை ஜப்பான் ஒத்துக் கொள்ள வேண்டும். சந்திப்பின் போது இரு நாடுகளும் தமது படை நடவடிக்கைகள் தொடர்பாக ஒரு உடனடித் தொடர்பாடலை ஏற்படுத்துவதாக ஒத்துக் கொள்ளப்பட்டுள்ளது. சந்திப்பின் பின்னர் செய்தியாளர்களிடம் பேசிய சின்ஷே அபே இரு நாடுகளிடையே அடிக்கடி உரையாடல்கள் நடக்க வேண்டும் என்றதுடன் ஒரு நாட்டுக்கு மற்ற நாட்டின் நட்பு அவசியம் என்றார். சண்டைகள் தொடங்காமல் இருக்க உரையாடல்கள் உதவட்டும்.

சீன விமானக் கண்காட்சி - 2014

சீனாவின் J-31 போர் விமானம்

சீனா 2014-ம் ஆண்டு நவம்பர் மாதம்  11-ம் திகதி முதல் 16-ம் திகதி வரை தனது China Airshow எனப்படும் விமானக் கண்காட்சியை நடாத்தியது. இரண்டு ஆண்டுகளுக்கு ஒரு தடவை சீனா இந்த விமானக் கண்காட்சியை ஒழுங்கு செய்யும்.  1996-ம் ஆண்டில் இருந்து  இந்தக் கண்காட்சி நடந்து வருகின்றது. உலகின் பல பகுதிகளில் இருந்தும் போக்கு வரத்து மற்றும் போர் விமான உற்பத்தியாளர்கள் இதில் தமது உற்பத்திகளைப் பகிரங்கப்படுத்துவர். சீனாவின் Guangdong மாகாணத்தில் உள்ள Zhuhai விமானத் தளத்தில் இந்தக் கண்காட்சி நடை பெறுகின்றது. வழமைக்கு மாறாக சீனா தனது விமானப்படை வலுவை இம்முறை இந்தக் கண்காட்சியில் பகிரங்கப் படுத்தியதாகச் சொல்லப்படுகின்றது.

சீனாவின் J-31 stealth fighter
சீனா தான் உருவாக்கிவரும் stealth fighter வகையைச் சார்ந்த J-31 போர் விமானங்களை சீன விமானக் கண்காட்சியில் பகிரங்கப்படுத்தியுள்ளது. இரு இயந்திரங்களைக் கொண்ட ஒருவர் மட்டும் செலுத்தக் கூடிய J-31 ரடார்களுக்குப் புலப்படாத் திறனுடையவை. J-31 விமானங்கள் Falcon Eagle என்னும் குறியீட்டுப் பெயரினால் அழைக்கப்படுகின்றன. சீனா இந்த J-31 stealth fighter போர்விமானங்களை அமெரிக்காவின் F-35 போர் விமானங்களுக்குப் போட்டியாக உருவாக்கி வருகின்றது. இந்த உருவாக்கம் இன்னும் முற்றுப் பெறாத நிலையில் சீனா தனது ஆரம்ப உற்பத்திகளை இப்போது பகிரங்கமாகப் பறக்க விட்டுள்ளது. கிழக்குச் சீனக் கடலில் அமெரிக்காவினதும் ஜப்பானினது வான் ஆதிக்கத்திற்கு சீனாவின் J-31 stealth fighter என்னும் ஐந்தாம் தலைமுறை விமானங்கள் பெரும் சவலாக அமையும் என சீன வான் படையைச் சேர்ந்த Ni Leixiong கூறியுள்ளார். ஆனால் சீனாவின் J-31 stealth fighterவிமானங்களால் high-G maneuver எனப்படும் விமானப் பறப்பில் கடினமானதும் முக்கியமானதுமான பறப்பைச் செய்ய முடியாது என ஜேர்மனியைச் சேர்ந்த விமானத் துறை நிபுணர் தெரிவித்துள்ளார். சீனாவின் J-31 stealth fighter விமாங்களின் இயந்திரங்கள் இரசியாவில் தயாரிக்கப் படுபவை என்பது சீனாவின் பின்னடைவு நிலையை எடுத்துக் காட்டுகின்றது. அமெரிக்காவின் F-35 வாங்க முடியாத நாடுகள் தனது வ் J-31  விமானங்களை வாங்கும் என சீனா எதிர்பார்க்கின்றது. ஆனால் The Diplomat இணையத் தளம் சீனாவின் J-31 விமானங்களை ஒரு நாடும் வாங்கப் போவதில்லை என எதிர்வு கூறியுள்ளது. அமெரிக்கச் ஊட்கமான Wall Street Journal அமெரிக்காவின் F-35 விமானங்களின் தொழில் நுட்பத்தை சீனா இணையவெளியினூடாகத் திருடியே தனது J-31 விமானங்களை உருவாக்கியுள்ளதாகக் குற்றம் சாட்டியுள்ளது.

அசையக் கூடிய செய்மதி செலுத்திகள்
சீனா தனது விமானக் கண்காட்சியில் காட்சிப்படுத்திய இன்னும் ஒரு படைக்கலன் அசையக் கூடிய செய்மதி செலுத்திகள் ஆகும். இவை FT-1 solid launch vehicle for emergency satellite launches எனப்படுகின்றது இவை தெருக்களில் செல்லக் கூடிய பார் ஊர்திகளில் இருந்து செய்மதிகளை அவசரத் தேவைகளின் போது செலுத்தக் கூடியவை. இவற்றில் இருந்து மூன்னூறு கிலோ எடையிலும் குறைந்த செய்மதிகளைச் செலுத்த முடியும். இது போன்ற ஏவுகணைச் செலுத்திகளை வேறு எந்த நாடும் உருவாக்கவில்லை எனச் சொல்லலாம். இவற்றிக்கான தேவை எதுவும் ஏற்படவில்லை என்கின்றனர் படைத்துறை நிபுணர்கள். இவற்றை சீனா உருவாக்கியமை பலரையும் ஆச்சரியப் பட வைத்துள்ளது.

 

சீனாவின் ஆளில்லா வான்கலங்கள்

சீன விமானக் கண்காட்சியில் சீனா உருவாக்கிய ஆளில்லா உழங்கு வானூர்திகளையும் காட்சிப்படுத்தியுள்ளது.  அத்துடன் தாக்கும் படைக்கலன்களைக் கொண்டஆளின்றிப் பறக்கக் கூடியதுமான   Stealthy WJ-500என்னும் விமானங்களையும் சீனா முதல் தடவையாகக் காட்சிப் படுத்தியுள்ளது. இதன் பெயரில் இருக்கும் Stealthy என்னும் சொல்லிற்கு ஏற்ப இவை ரடார்களுக்குப் புலப்படாமல் பறக்கக் கூடியவை. 

FM-3000 எனப்படும் air defense missile system

ஏவுகணை எதிர்ப்பு  முறைமை
சீனாவில் உருவாக்கப்பட்டுள்ள FM-3000 எனப்படும் air defense missile system சீன விமானக் கண்காட்சியில் காட்சிப் படுத்தப்படுள்ளது.  மூன்று பகுதிகளைக் கொண்ட இந்த ஏவுகணை எதிர்ப்பு முறைமை வரும் குறுந்தூர மற்றும் நடுத்தரத் தூர ஏவுகணைகளை இனம் காணும் ரடார்கள் ஒரு பகுதியாகும். இரண்டாம் பகுதி கட்டளையும் கட்டுப்பாட்டு நிலையமாகும். மூன்றாவது வரும் ஏவுகணைகளை இடைமறித்து அழிக்கும் ஏவுகணைகளை வீசும். ரடார் நிலையம் வரும் ஏவுகணைகளைப் பற்றிய தகவல்களை கட்டளை கட்டுப்பாட்டகத்திற்கு வழங்க அங்கிருந்து தாக்குதல் சமிக்ஞைகள் ஏவுகணைவீச்களுக்கு வழங்கப்படும்.

ஐ.எஸ்ஸிற்கு எதிரான போரின் துருப்புச் சீட்டு துருக்கியின் கையில்

அண்மைக்காலங்களாக இரசியாவிற்கு இணையாக அல்லது ஒரு படி மேலாக மேற்கு நாட்டு ஊடகங்களில் கடுமையாக விமர்சிக்கப்படும் ஒரு நாடாக துருக்கி இருக்கின்றது. மேற்குலகப் பத்தி எழுத்தாளர்கள் துருக்கி நேட்டோக் கூட்டமைப்பில் இருந்து விலக்கப்பட வேண்டும் என்றும் துருக்கி குர்திஷ் மக்களைக் கைவிட்டு ஐ. எஸ் தீவிரவாதிகளுடன் இரகசியமாகக் கை கோர்ப்பது வெட்கக் கேடான செயல் என்றும் எழுதித் தள்ளுகின்றனர்.

துருக்கி எப்போதும் மூன்றின் நடுவில். 
துருக்கி ஐரோப்பா,ஆசியா ஆகிய நாடுகளுக்கு நடுவில் இருக்கின்றது. அங்கு ஒரு மக்களாட்சி நிலவினாலும் அது மக்களாட்சி, படைத்துறை, இசுலாமியவாதம் ஆகிய மூன்றின் நடுவில் இருக்கின்றது. துருக்கியில் நிலப்பரப்பில் 97 விழுக்காடு ஆசியாக் கண்டத்தில் இருக்கின்றது. ஓர் இசுலாமிய நாடான துருக்கி மேற்கு நாடுகளுடன் இணைந்துள்ளது. நேட்டோவினது ஓர் உறுப்பு நாடாகவும் ஐரோப்பிய ஒன்றியத்தினது இணண உறுப்பு நாடாகவும் இருப்பதால் மத்திய கிழக்கு நாடுகளுடன் துருக்கியின் உறவு மேற்கு நாடுகளைப் பொறுத்தவரை முக்கியமானதாகும். முன்பு மத்திய கிழக்கிலுள்ள எல்லா நாடுகளுடனும் நல்ல உறவை வைத்திருந்தது துருக்கி. ஈராக் போரின் போது துருக்கிக்கும் ஈராக்கிற்கும் இடையிலான உறவில் விரிசல் ஏற்பட்டது. 1979-இல் ஈரானில் நடத்த மதவாதப் புரட்சிக்குப் பின்னரும் துருக்கியும் ஈரானும் நல்ல உறவைப்பேணின. துருக்கிக்கும் தற்போது ஈரான் எனப்படும் பாரசீகத்திற்கும் இடையில் புரதான காலம் தொட்டே நல்ல உறவு இருந்து வருகின்றது. ஐரோப்பா, அரபு நாடுகள், ஈரான் ஆகிய மூன்றின் மத்தியில் துருக்கியின் வெளிநாட்டுக் கொள்கை தடுமாறுகின்றது. துருக்கி ஐரோப்பிய ஒன்றியத்தில் முழுமையான உறுப்புரிமை பெறவிரும்புகிறது ஆனால் அது இழுத்தடிக்கப்படுவதால் இரசியாவின் யூரோ ஏசியன் கூட்டமைப்பில் அல்லது பிரேசில், இரசியா, இந்தியா, சீனா ஆகியவற்றைக் கொண்ட பிரிக்ஸ் கூட்டமைப்பில் இணைவது குறித்து கருத்தில் கொள்கின்றது. இங்கும் ஐரோப்பிய ஒன்றியமா யூரோ ஏசியனா பிரிக்ஸா என்பது துருக்கியின் தடுமாற்றம்.

 துருக்கிய ஆட்சியாளர்கள் இசுலாமியவாதிகளே!
துருக்கியில் தற்போது ஆட்சி செய்து கொண்டிருக்கும் நீதிக்கும் அபிவிருத்திக்குமான கட்சி அடிப்படையில் ஒரு மதவாதக் கட்சியாகும். நாளடைவில் பொருளாதார அபிவிருத்தியைக் கருத்தில் கொண்டு தன்னை ஒரு மேற்குலகு சார்பானதாகவும் அமெரிக்காவிற்கு நட்பானதாகவும் காட்டிக் கொண்டது. தாராண்மைவாத சந்தைப் பொருளாதாரக் கொள்கையை தனது கொள்கையாகவும் காட்டிக் கொண்டது. ஆனால் நீதிக்கும் அபிவிருத்திக்குமான கட்சியின் ஆட்சியில் துருக்கி தேவையான போதெல்லாம் இசுலாமியத் தீவிரவாதிகளுடன் இரகசியமாக இணைந்து செயற்பட்டது எனக் குற்றம் சாட்டப்படுகின்றது.

அமெரிக்காவும் துருக்கியும்
அமெரிக்காவிற்கும் துருக்கிக்கும் இடையிலான உறவு 1950-ம் ஆண்டு ஆரம்பமான கொரியப் போரில் மலர்ந்தது. இந்த உறவில் முதல் விரிசல் துருக்கி 1973-ம் ஆண்டு சைப்பிரசை ஆக்கிரமித்த போது உருவானது. இதனை அடுத்து துருக்கி மீது அமெரிக்கா படைக்கல விற்பனைத் தடை விதித்தது. 2003-ம் ஆண்டு சதாம் ஹுசேயினிற்கு எதிராக அமெரிக்காவும் பிரித்தானியாவும் படை எடுத்த போது இரண்டாவது விரிசல் உருவாகியது. துருக்கியின் கேந்திர நிலை ஈராக் மீதான தாக்குதலுக்கு அமெரிக்காவிற்கு மிகவும் தேவைப்பட்டது. துருக்கியை தளமாக வைத்து ஈராக் மீது தாக்குதல் நடாத்த அமெரிக்கா விரும்பியது ஆனால் துருக்கியப் பாராளமன்றம் அதை நிராகரித்து விட்டது. தற்போது ஐ. எஸ் போராளிகளுக்கு எதிராக சிரியாவிலும் ஈராக்கிலும் தாக்குதல் நடாத்த துருக்கியைத் தளமாகப் பாவிக்க அமெரிக்கா விரும்புகிறது. ஆனால் துருக்கிய விமானத் தளங்களில் அமெரிக்காவின் வேவு பார்க்கும் ஆளில்லா விமானங்கள் மட்டும் பாவிக்க துருக்கி அனுமதி வழங்கியுள்ளது. எகிப்த்தில் முஹமட் மேர்சியின் ஆட்சி தொடர்வதை துருக்கி விரும்பியது. அதை சவுதி அரேபியா கடுமையாக எதிர்த்ததுடன் படைத்துறையினரின் ஆட்சி மீண்டும் அமைய சவுதி அரேபியாவும் வேறு அரபு நாடுகளும் விரும்பின. அமெரிக்கா எகிப்திய விவகாரத்தில் விலகி இருப்பது போலக் காட்டிக் கொண்டது. ஈரானுக்கு எதிராக கடுமையான பொருளாதாரத் தடையை அமெரிக்கா விதித்தது. துருக்கி திரைமறைவில் ஈரானின் எரி பொருள் விற்பனைக்கு உதவி செய்கின்றது. 2012 மார்ச் மாதத்தில் இருந்து 2013 ஜூலை மாதம் வரை 13 பில்லியன் அமெரிக்க டொலர்கள் பெறுமதியான தங்கம் துருக்கியில் இருந்து ஈரானுக்கு அனுப்பப் பட்டுள்ளது. இவை ஈரானிடமிருந்து துருக்கி பெற்ற எரிவாயுவிற்கான விலையாகும். இதில் சம்பந்தப் பட்ட துருக்கிய அரச வங்கியை அமெரிக்கா தண்டிக்கவில்லை! அமெரிக்கா ஆப்கானிஸ்த்தானில் செய்த ஆக்கிரமிப்பை துருக்கிய மக்கள் பரவலாக எதிர்க்கின்றார்கள். சிரிய அதிபர் அசாத்தைப் பதவியில் இருந்து அகற்ற வேண்டும் என்பதில் துருக்கி உறுதியாக இருக்கின்றது. அமெரிக்கா அதுவே தனது நீண்டகாலத் திட்டம் என்கின்றது. அதை துருக்கி ஏற்க மறுக்கின்றது.

நேட்டோவும் துருக்கியும்
சோவியத் விரிவாக்கத்திற்கு எதிராக உருவாக்கப் பட்ட நேட்டோப் படைத் துறைக் கூட்டமைப்பில் 1952-ம் ஆண்டு துருக்கி இணைந்து கொண்டது.  ஆனால் தற்போது நேட்டோவின் முக்கிய பணிகளில் ஒன்றாக இசுலாமியத் தீவிரவாத ஒழிப்பு உருவெடுத்து விட்டது. லிபியாவில் மும்மர் கடாஃபியின் ஆட்சியைக் கவிழ்த்தது போல சிரியாவில் பஷார் அல் அசாத்தின் ஆட்சியை நேட்டோ கவிழ்க்க வேண்டும் என துருக்கி எதிர்பார்த்தது. சிரியக் கிளர்ச்சிக்காரர்களுக்கு நேட்டோப் படைகள் படைக்கலங்கள் வழங்க வேண்டும் என துருக்கி எதிர்பார்த்தது. ஆனால் இரண்டையும் நேட்டோ செய்யவில்லை. வேல்ஸில் நடந்த நேட்டோக் கூட்டமைப்பின் மாநாட்டில் அமெரிக்க அதிபர் பராக் ஒபாமா ஐ. எஸ் தீவிரவாதிகளின் பணம் கடத்தல், இரகசிய எரிபொருள் விற்பனை போன்றவற்றைத் தடுக்குமாறு துருக்கியை வேண்டியிருந்தார். துருக்கி தனது ஏவுகணை எதிர்ப்பு முறைமையை சீனாவிடம் வாங்க முடிவு செய்தமை பல நேட்டோ நாடுகளை அதிருப்திக்கு உள்ளாக்கியது.

ஐ.எஸ் இற்கு எதிரன தாக்குதலும் துருக்கியும்
துருக்கி ஈராக்குடனும் சிரியாவுடனும் 780 மைல் நீளமான எல்லையைக் கொண்டுள்ளது. மத்திய கிழக்கில் ஒரு உறுதியான அரசியல் சூழ்நிலை உருவாக துருக்கியின் உதவி தனக்கு அவசியம் என அமெரிக்கா கருதுகின்றது. துருக்கியின் அடானா மாகாணத்தில் உள்ள இன்செர்ளிக் விமானப் படைத்தளத்தில் இருந்து ஐ.எஸ் தீவிரவாதிகள் மீது தாக்குதல் நடாத்துவது மிகவும் இலகுவானதாகும். ஆனால் துருக்கி  இதை அனுமதிக்கவில்லை. இந்த அனுமதியைப் பெறுவதற்கு அமெரிக்காவின் ஐ.எஸ் தீவிரவாதிகளுக்கு எதிரான நாடுகளின் கூட்டமைப்பை உருவாக்குவதற்கும் ஒருங்கிணைப்பதற்கும் நியமிக்கப்பட்ட அமெரிக்கத் தூதுவர் ஜோன் அலன் துருக்கிகுப் பயணத்தையும் மேற் கொண்டிருந்தார். அமெரிக்கப் படைத்துறையின் உச்சத் தளபதி மார்டின் டிம்செ துருக்கி உட்பட இருபது நாடுகளின் படைத்துறைத் தளபதிகளின் கூட்டம் ஒன்றை 2014-10-13-ம் திகதி வாஷிங்டனின் கூட்டியிருந்தார். துருக்கியப் படைத்தளபதி இதில் பங்கேற்கவில்லை. ஐ. எஸ் அமைப்பிற்கு எதிராகக் கருத்துத் தெரிவிக்கும்படி அமெரிக்கா துருக்கிய அதிபரை வலியுறுத்தியது ஆனால் துருக்கியின் அதிபர் ஐ. எஸ் அமைப்பிற்கும் இஸ்லாமிய மதத்திற்கும் தொடர்பில்லை எனக் கூறியதுடன் நிறுத்திக் கொண்டார். சிரியாவில் செயற்படும் குர்திஷ் மக்களின் மக்களாட்சி ஒன்றிய கட்சியினருக்கு அமெரிக்கப் படையினர் விமானத்தில் இருந்து படைக்கலன்களைப் போட்டது துருக்கிக்குப் பிடிக்கவில்லை. குர்திஷ் மக்களாட்சி ஒன்றியக் கட்சி என்பது  துருக்கியில் தடை செய்யப்பட்ட குர்திஷ்த்தான் தொழிலாளர் கட்சியின் சிரியக் கிளை என்பதால் துருக்கி இதை விரும்பவில்லை. குர்திஷ்த்தான் தொழிலாளர் கட்சி அமெரிக்காவிலும் ஐரோப்பிய ஒன்றியத்திலும் கூட "பயங்கரவாத" அமைப்பாகத் தடை செய்யப்பட்டுள்ளது. ஐ.எஸ் அமைப்பினருக்கு எதிரான போரில் துருக்கி செய்த பேருதவி ஈராக்கில் இருக்கும் குர்திஷ் அமைப்பான பெஸ்மேராப் போராளிகளை சிரியப் பிரதேசமான கொபானிக்கு துருக்கியூடாகச் சென்று அங்குள்ள குர்திஷ் அப்பாவிகளை ஐ.எஸ் தீவிரவாதிகளின் கொலையில் இருந்து பாதுகாக்க அனுமதித்தமையாகும். துருக்கியில் செயற்படும் குர்திஷ்த்தான் தொழிலாளர் கட்சிக்கும் சிரிய அதிபர் பஷார் அல் அசாத்திற்கும் இடையில் இருக்கும் தொடர்பும் துருக்கியை குர்திஷ் மக்களுக்கு எதிரான நிலைப்பாட்டை எடுக்க வைத்துள்ளது. ஐ. எஸ் போராளிகள் வெற்றி பெற்றால் அது துருக்கிக்கும் ஆபத்தாக முடியும். அந்த ஆபத்து குர்திஸ் போராளிகளால் ஏற்படும் ஆபத்தைவிட மோசமானதாக இருக்கும்.

துருக்கியும் டென்மார்க்கும்
டென்மார்க்கைச் சேர்ந்த பசில் ஹசான் என்னும் ஐ.எஸ்சின் "புனிதப் போராளி" லார்ஸ் ஹெடெகார்ட் என்னும் இசுலாமிய தீவிரவாதத்திற்கு எதிராக எழுதும் ஒரு ஆய்வாளரைக் கொலை செய்ய முயன்றார். இவர் துருக்கியில் பிடிபட்டிருந்த வேளை அவரை நாடுகடத்தும் படி டென்மார்க் அரசு துருக்கிய அரசைக் கோரியிருந்தது. பசில் ஹசானை நாடு கடத்தாமல் துருக்கி விடுவித்தது. ஐ. எஸ் அமைப்பினர் ஈராக்கில் பெரு நிலப்பரப்பைக் கைப்பற்றிய போது துருக்கிய இராசதந்திரிகள் 39 பேரைப் பணயக் கைதிகளாக பிடித்திருந்தனர். இவர்களை விடுவிக்க துருக்கி பசில் ஹசானை விடுவித்தது. ஐரோப்பிய ஒன்றிய நாடான டென்மார்க் துருக்கிக்கு எதிராக ஐரோப்பிய ஒன்றியத்தில் செயற்படப்போவதாகச் சூளுரைத்துள்ளது. புதிதாக சேரும் ஒரு நாட்டின் விண்ணப்பத்தை ஒரு நாடு நிராகரித்தாலே விண்ணப்பம் நிராகரிக்கப்படும். ஏற்கனவே ஐரோப்பிய ஒன்றிய நாடுகளான கிரேக்கமும் சைப்பிரசும் துருக்கியுடன் நல்ல உறவு நிலையில் இல்லை.  ஏற்கனவே துருக்கி ஐரோப்பிய ஒன்றியம் தன்னை முழுமையான உறுப்பினராக இணைப்பதில் இரட்டை நாக்குடன் செயற்படுவதாகக் குற்றம் சாட்டியுள்ளது.

குர்திஷ் போராளிகளா ஐ.எஸ் போராளிகளா?
சிரியாவின் துருக்கிய எல்லையை ஒட்டிய பிரதேசமான கொபானியில் அப்பாவி குர்திஷ் மக்களை ஐ. எஸ் திவிரவாதிகள் கொன்று குவித்த போது துருக்கியால் ஒரு சில நாட்களில் கொபானியின் வாழும் குர்திஷ் மக்களைப் பாதுகாக்க முடியும். நேட்டோ நாடுகளில் எண்ணிக்கை அடிப்படையில் துருக்கிய படைகள் இரண்டாவது பெரிய படைகளாகும். துருக்கியப் பாராளமன்றம் 2014-10-02-ம் திகதி துருக்கியப் படைகள் ஐ. எஸ் அமைப்பினருக்கு எதிராக நடவடிக்கை எடுப்பதை அனுமதிக்கும் தீர்மானம் நிறைவேற்றியிருந்தது. ஐ. எஸ் போராளிகளை அழித்து குர்திஷ் மக்கள் ஈராக்கில் வலுப்பெறுவதை துருக்கி விரும்பவில்லை. ஈராக்கில் குர்திஷ் மக்கள் வலுவடைந்தால் அது துருக்கியில் வாழும் குர்திஷ் மக்களை வலுவடையச் செய்யும் என துருக்கி அஞ்சுகின்றது.

துருக்கியின் கையில் துருப்புச் சீட்டு
ஐ.எஸ் தீவிரவாதிகளுக்கு எதிராக மாதக் கணக்காகச் செய்து வரும் விமானத் தாக்குதல்கள் அவர்கள் மீது பெரும் பாதிப்பை ஏற்படுத்தியதாகத் தெரியவில்லை. அமெரிக்கப் படைத் துறை நிபுணர்கள் ஆரம்பத்திலேயே ஒருதரைவழிப் படை நகர்வு செய்யாமல்ஐ.எஸ் தீவிரவாதிகளை அழிக்க முடியாது என எச்சரித்திருந்தனர். ஐ. எஸ் போராளிகளுக்கு எதிரான தக்குதல் தொடர்த் தொடர மேற்கு ஐரோப்பாவிலும் வட அமெரிக்காவிலும் இருக்கும் இசுலாமியத் தீவிரவாதிகளை இனம் காணுவதும் இலகுவாகிக் கொண்டே போகின்றது. அந்த அளவிற்கு அங்குள்ள இசுலாமியர்களில் தீவிரவாதப் போக்குள்ளவர்கள் ஐ.எஸ் அமைப்பினருடன் இணைந்து கொண்டே இருக்கின்றனர். இது வட அமெரிக்காவையும் மேற்கு ஐரோப்பாவையும் சுத்தப்படுத்த உதவுகின்றது. ஐ. எஸ் அமைப்பினருக்கு எதிரான போர் விரைவில் முடியுமா அல்லது இழுபடுமா என்பது துருக்கியின் கையில்தான் இருக்கின்றது.