சைவக் கோழியின் முட்டை சாப்பிட்டால் ஆரோக்கியம்.

கோழி முட்டை ஒரு காலத்தில் நல்ல ஆரோக்கியமான உணவாகக் கருதப்பட்டது. பின்னர் அது கெடுதலான கொழுப்பு நிறைந்தது என்று கூறப்பட்டது. இப்போது கதை மீண்டும் மாறிவிட்டது.

அமெரிக்க அரசு நடாத்திய ஆய்வின் படி இப்போது உள்ள கோழி முட்டைகள் பத்து ஆண்டுகளுக்கு முன் இருந்த கோழி முட்டைகளிலும் பார்க்க 13% கொழுப்பு (cholesterol) குறைந்தவை என்றும் 64% விட்டமின் D அதிகம் கொண்டவை என்றும் அறியப்பட்டுள்ளது. இதற்கான காரணம் இப்போது கோழிகளுக்கு பண்ணைகளில் கொடுக்கப்படும் உணவில் அரசுகள் செய்துள்ள கட்டுப்பாடுகளாகும். முன்பு கோழுகளுக்கு மிருகங்களின் எலும்பில் செய்த உணவுகள் கொடுக்கப்பட்டன. இப்போது அவை தடை செய்யப்பட்டுள்ளன. இப்போது பண்ணைகளில் கோழிகளுக்கு சோழம் கோதுமை கொண்ட புரோட்டீன் நிறைந்த உணவுகள் கொடுத்து வளர்க்கப்படுவதால் கோழிகள் இடும் முட்டைகளும் ஆரோக்கியமானவையாகின்றன.

ஒரு நடுத்தர அளவான முட்டையில் 100மில்லி கிராம் கொழுப்பு(cholesterol) இருக்கிறது. இது நாளாந்தம் ஒருவர் உட் கொள்ளக் கூடிய 300மில்லி கிராம் கொழுப்பிலும் பார்க்கக் குறைவானது.

ஒரு வருடத்திற்கு முன்னர் கனடிய அரசு செய்த ஆய்வின் பிரகாரம் முட்டை உண்பது உடலில் உள்ள தீங்கு விளைவிக்கும் கொழுப்பைக் குறைக்கும் என்று கூறப்பட்டது. முட்டை சமிபாடடையும்போது எமது உடலுள் உருவாகும் புரதம் Ace inhibitors எனப்படும் இரத்த அழுத்தம் குறைக்கும் மருந்தைப் போல் செயற்படுகிறதாம். இதனால் தினமும் முட்டை உண்ணுதல் இரத்த அழுத்தத்தை குறக்க உதவுமாம் என்றது கனடிய அரசு.

பிரித்தானிய சறே(Surrey) பல்கலைக்கழகத்தின் ஆய்வின் படி காலையில் ஒன்று அல்லது இரண்டு முட்டை உண்டால் அது எமது உடலின் புரதச் சத்துத் தேவையைப் பூர்த்தி செய்து வயிற்றுப் பசியைக் குறைக்கிறது. இதனால் நாம் அதிகம் உண்பதைக் குறைக்கிறோம். இதனால் எமது எடை குறைக்க முட்டை உண்ணுதல் உதவுகிறது. 12 வாரங்களாக சிலருக்கு தொடர்ந்து காலை உணவில் இரண்டு முட்டைகள் சேர்த்து உண்டவர்களினது எடை குறைந்திருப்பதை ஆய்வில் கண்டனர்.