இணைவோம் எழுவோம் வெல்வோம்

ஓயாத அலைகளாய் சாயாத மலைகளாய்
தாழாத நிலைகளாய் சோராத தோள்களாய்
அணையாத தீயென நில்லாத காற்றென
இணைவோம் எழுவோம் வெல்வோம் வெல்வோம்

கீர்த்தியில்லாச் சில்லறைகள் உற்சவ மூர்த்திகள் நாமெனச்
உருத்திரம் கொண்டாலும் பிரிந்து நின்றாலும்
பிளவு பட்டாலும் நிலையது குலையோம் நிமிர்ந்து நிற்போம் 
இணைவோம் எழுவோம் வெல்வோம் வெல்வோம்

எத்தனை பகை வரினும் எத்தனை இடர் வரினும்
எழ எழ வீழ்த்துவோம் என இந்தியா நின்றாலும்
விழ விழ வீறு கொண்டெழுவோம் வேங்கைகள் நாமாவோம் 
இணைவோம் எழுவோம் வெல்வோம் வெல்வோம்

பெருமரமாகும் சிறு வித்துக்களாய் நாம் வருவோம்
ஆழ்கடல் சென்றெடுத்த நன் முத்துக்களாய்
களங்கமடையோம் பெருமைகள் சேர்ப்போம் 
இணைவோம் எழுவோம் வெல்வோம் வெல்வோம்

தாயகத்துக் கனவுடன் மாவீரர்களாய் மரித்து
வானகத்துறையும் கானகத்து வேங்கைகளின்
கனவினை நனவாக்கிட துணிவோம் துணிவோம்
இணைவோம் எழுவோம் வெல்வோம் வெல்வோம்