எமது நிலம் எமக்கு வேண்டும்

யாழிசைக்குப் பரிசாகி மீனிசைக்கு வசமாகி
தமிழிசைக்குக் களமாகி மழலையிசை தேனாகி
புள்ளிசை காதினிக்க இல்லற நெறியிசைக்க
நாம் வாழ்ந்த எமது நிலம் எமக்கு வேண்டும்

ஆழ்கடல் முத்தெடுத்து சூழ்கடல் உப்பெடுத்து
மீன் வளச் சொத்தெடுத்து பாய்மரக் கப்பலெடுத்து
திரைகடல் கடந்து சென்று செல்வஞ் சேர்த்தெடுத்து
நாம் வாழ்ந்த எமது நிலம் எமக்கு வேண்டும்

கால்நடைகள் உறவாக களனியது தாயாக
மழைத் துளிகள் பரிசாக வியர்வைத்துளிகள் வித்தாக
நீர்வளங்கள் தெய்வங்களாக வளர்த்த பயிர் விருந்தாக
நாம் வாழ்ந்த எமது நிலம் எமக்கு வேண்டும்

அற வழி பொருளீட்டி அன்பு வழி ஆனந்தம் கூட்டி
மழலையர்க்கு மரபு காட்டி பண்பார்ந்த வாழ்வு காட்டி
நற்றமிழ் மொழி பேசி நானிலத்திற்கு வழிகாட்டி
நாம் வாழ்ந்த எமது நிலம் எமக்கு வேண்டும்

கதிரது நாளை உதிக்க கீரி மலையோடு திருமலை
எரிமலையாய் வெடிக்க விடுதலைத் தீ எரிய
படுவான்கரையும் எழுவான் கரையாய் மாற
ஈழ நிலமெங்கும் எதிரி விழுவான் நிரையாக - அன்று
நாம் வாழ்ந்த எமது நிலம் எமக்கே ஆகும்