சிரியாவில் பல நாடுகளின் அடிகளும் பதிலடிகளும்

2011-ம் ஆண்டு சிரியாவில் அரசுக்கு எதிராக மக்கள் செய்த கிளர்ச்சியில் பல அமைப்புக்கள் இணைந்து கொண்டன. பல புதிய அமைப்புக்களும் உருவாகின. சிரியத் தேசிய சபை, சுதந்திர சிரியப்படை. ஜபத் அல் நஷ்ரா, இசுலாமிய சகோதரத்துவ அமைப்பு, மதசார்பற்ற மக்களாட்சிக்கான அமைப்பு, டமஸ்கஸ் பிரகடன அமைப்பு, சிரிய மக்களாட்சிக் கட்சி, சிரியப் புரட்சிக்கான உச்ச சபை, சிரிய உள்ளூர் ஒருங்கிணைப்புக் குழு,  மக்களாட்சி மாற்றத்திற்கான தேசிய ஒருங்கிணைப்புக் குழு, தேசிய மக்களாட்சி அணி, சிரியப்புரட்சிக்கான தேசிய ஆணையகம், சிரிய விடுதலைப்படை, சிரிய இசுலாமிய முன்னணி, சிரியத் தேசிய விடுதலை முன்னணி, விடுதலைக்கும் மாற்றத்துக்குமான முன்னணி...........இப்படி இனும் பல படைக்கலன் ஏந்திய குழுக்களும், மத அமைப்புக்களும் அரசியல் கட்சிகளும் சிரிய அதிபர் பஷார் அல் அசாத்திற்கு எதிராகச் செயற்பட்டன. இவற்றில் சுதந்திர சிரியப்படை ஐக்கிய அமெரிக்காவை சார்ந்த ஓர் அமைப்பாகும். ஜபத் அல் நஷ்ரா  அல் கெய்தாவைச் சார்ந்த ஓரு அமைப்பாகும். 

தீர்க்க முயலாத ஐநாவும் தீர்க்க முடியாத மனித உரிமைக் கழகமும்

ஐ எஸ் அமைப்புக்கு எதிரான போர் நடக்கும் போது ஏற்பட்ட அப்பாவிகளின் அவலத்திலும் அதிக அவலம் இப்போது சிரியாவில் நிலவுகின்றது. சிரியப் பிரச்சனை தொடர்பாக ஜெனீவா மனித உரிமைக்கழகத்தில் 2018 பெப்ரவரி இறுதியில் விவாதிக்கப்பட்டது. கையாலாகாத அமைப்பாகிய மனித உரிமைக்கழகம் ஐநா பாதுகாப்புச் சபையால் கூட கொண்டுவர முடியாத அமைதியை சிரியாவில் கொண்டு வர முடியுமா? சிரியா தொடர்பாக ஐநா ஒரு சிறப்பு சமாதானத் தூதுவராக முன்னாள் பொதுச் செயலாளர் கோஃபி அனனை நியமித்ததூதுவராக நியமித்தது. அவர் சிரியாவில் பட்டபாடு பெரும் பாடு. கோஃபி அனன் அரபு நாட்டு மக்களினதும் ஊடகங்களினதும் கருத்துக்குப் பயப்படுகிறார் என்று சில அரசதந்திரிகள் குற்றம் சாட்டினார்கள். கோஃபி அனன் ஆபிரிக்க ஊடகங்களைத் தவிர்க்கிறார் மேற்குலக ஊடகங்களுக்கு மட்டுமே பேட்டிகள் கருத்துக்கள் தெரிவிக்கிறார் என்று ஆபிரிக்க ஊடகங்கள் குற்றம் சாட்டின. கோஃபி அனன் சமர்ப்பித்த ஆறு அமசத் திட்டம் சிரிய அதிபர் பஷார் அல் அசாத்திற்கு மிகவும் தேவையான கால அவகாசத்தை வழங்கி அவரைப் பாதுகாக்க உதவும் என்றனர் அமெரிக்க அரசதந்திரிகள். நியூயோர்க் ரைம்ஸ் பத்திரிகை. கோஃபி அனன் சமர்ப்பித்த ஆறு அம்சத் திட்டத்தின் ஒவ்வொரு அம்சமும் ஒவ்வொரு பொறியாகும் என்கிறது நியூயோர்க் ரைம்ஸ். மேலும் அது தெரிவிக்கையில் கோஃபி அனனின் திட்டம் சுதந்திர சிரியப் படையினருக்கு படைக்கலன்கள் போய்ச் சேர்வதைத் தடுக்கும் என்றது. அதனால் சிரியக் கிளர்ச்சியாளர்கள் பெரும் பின்னடைவைச் சந்திப்பினர் என்றது. இஸ்ரேலிய ஊடகம் ஒன்று பதினேழாயிரம் பேர் கொல்லப்பட்டுள்ளனர் அதனால் கோஃபி அனன் படுதோல்வியைச் சந்தித்தார் என்றது. ரைம்ஸ் ஒஃப் இந்தியா கோஃபி அனன் தனது சிரிய சமாதான முயற்ச்சி தோல்வியடைந்தது என்கிறார் என்றது. ஆனால் கோஃபி தனது கோரிக்கைகளுக்கு ஐநா பாதுகாப்புச் சபை செவிசாய்க்கவில்லை எனக் குற்றம் சாட்டினார். 

அரபு வசந்தத்தை இலையுதிர் காலமாக்கிய ஐஎஸ்

2014-ம் ஆண்டு சிரியாவிலும் ஈராக்கிலும் அதிரடியாகக் களமிறங்கியது ஐஎஸ் என்னும் இஸ்லாமிய அரசு அமைப்பு. 2014-ம் ஆண்டு அது சிரியாவிலும் ஈராக்கிலும் 34,000 சதுர மைல்களைத் தனது கட்டுப்பாட்டின் கீழ் வைத்திருந்தது. ஆயிரக்கணக்கானவர்களை அடிமைகளாகவும் வைத்திருந்தது. அப்பாவி யதீஷியர்களுக்கு எதிராக இனக்கொலை புரிந்து சிறுமிகள் உட்பட பல பெண்களை பாலியல் கொடுமைகளுக்கு உள்ளாக்கியது. இருபத்தியொன்றிற்கும் மேற்பட்ட நாடுகளில் அது தாக்குதல்களை நடத்தியது. சிரியாவில் மக்களாட்சி வேண்டிச் செய்யப்பட்ட எழுச்சி திசைமாறி ஐஎஸ் அமைப்பிற்கு எதிரான போராக மாறியது. ஈரான், சவுதி அரேபியா, துருக்கி போன்ற பிராந்திய வல்லரசுகளும் அமெரிக்கா, இரசியா ஆகிய உலக வல்லரசுகளும் ஐஎஸ் அமைப்பிற்கு எதிராகத் தக்குதல் நடத்தின.

அமைப்புகளிடை மோதல் நாடுகளிடை மோதலாகியது

இதுவரை ஐஎஸ் எனப்படும் இஸ்லாமிய அமைப்பிற்கும் மற்ற மதவாதப் படைக்குழுக்களுக்கும் எதிரான போர் நடந்த சிரியாவில் ஈரானும் இஸ்ரேலும் ஒரு புறம், அமெரிக்காவும் இரசியாவும் ஒரு புறம், துருக்கியியும் குர்திஷ்களும் இன்னொரு புறம் என மோதலகள் உருவாகியுள்ளன. தீவிரவாத அமைப்புக்களுக்கு எதிரான போர் நடந்த சிரியா இப்போது பிராந்திய வல்லரசுகளுக்கும் உலக வல்லரசுகளுக்கும் இடையிலான மோதல் களமாக மாறும் ஆபத்து உருவாகியுள்ளது.

பழம் பெரும் எதிரிகளான இஸ்ரேலும் ஈரானும்

1. 2018 பெப்ரவரி மாதம் 10-ம் திகதி இஸ்ரேல் ஆக்கிரமித்துள்ள சிரியாவிற்குச் சொந்தமான கோலான் குன்றுகளுக்குள் ஈரானின் ஆளில்லா விமானங்கள் பறந்தன. அதை இஸ்ரேலிய உலங்கு வானூர்திகள் சுட்டு வீழ்த்தின.

2. ஈரான் ஆளில்லா விமானங்கள் பறக்கவிடப்பட்ட சிரியாவின் பல்மேரியா பிராந்தியத்தில் உள்ள ரியாஸ் வான்படைத்தளத்தின் மீது எட்டு இஸ்ரேலிய F-16 போர்விமானங்கள் தாக்குதல் நடத்தி அதை அழித்தன. பல உயிரிழப்புக்களும் ஏற்பட்டதாகச் சொல்லப்படுகின்றது. 3. தாக்குதல் நடத்திவிட்டுத் திரும்பிச் செல்லும்போது இஸ்ரேலிய F-16கள் மீது சிரியப்படைகள் நடத்திய தாக்குதலில் ஒரு F-16 சுட்டு வீழ்த்தப்பட்டது. அது இஸ்ரேலியக் கட்டுப்பாட்டில் உள்ள பிராந்தியத்தில் விழுந்தது. விமானிகள் இருவர் உயிர் தப்பினர். 30 ஆண்டுகளுக்குப் பின்னர் ஓர் இஸ்ரேலிய விமானம் சுட்டு வீழ்த்தப்பட்டது. ஹிஸ்புல்லா இனிப்பு வழங்கி அதைக் கொண்டாடியது.

4. வல்லூறு என்னும் பட்டப்பெயரால் அழைக்கப்படும் ஒற்றை இயந்திரம் கொண்ட F-16 போர்விமானம்  ஒலியிலும் பார்க்க வேகமாகப் பறக்கக் கூடிய தனது விமானம் சுட்டு வீழ்த்தப்பட்டமைக்கு பழிவாங்க சிரியாவில் உள்ள மூன்று வான்பாதுகாப்பு நிலைகள் உட்பட பன்னிரண்டு இலக்குகள் மீது இஸ்ரேலிய வான்படையினர் தாக்குதல் நடத்தினர். சிரியாவிலுள்ள எட்டு சிரிய நிலைகள் மீதும் நான்கு ஈரானிய நிலைகள் மீதும் இஸ்ரேல் தாக்குதல் நடத்தியது. தாக்குதல் நடந்த துரிதத்தைப் பார்க்கும்போது இதை இஸ்ரேல் ஏற்கனவே திட்டமிட்டு வைத்திருந்தது எனப் படைத்துறை நிபுணர்கள். இஸ்ரேல் மேலும் பல் தாக்குதல்கள் செய்ய முனைந்த போது இரசிய அதிபர் விளடிமீர் புட்டீன் இஸ்ரேலியத் தலைமை அமைச்சர் பெஞ்சமின் நெத்தன்யாஹூவுடன் தொடர்பு கொண்டு தாக்குதலை நிறுத்தும் படி விடுத்த வேண்டுகோளை இஸ்ரேல் ஏற்றுக் கொண்டது. புட்டீன் மிகவும் ஆத்திரமடைந்திருந்தார் எனவும் செய்திகள் தெரிவித்தன. சிரியாவில் ஈரானுக்கு பெரும் இழப்பை ஏற்படுத்தும் இஸ்ரேலியப் படைத்தளபதிகளின் திட்டம் கைவிடப்பட்டது.

ஈரானுக்கு எதிராக இஸ்ரேலும் அமெரிக்காவும்

மேற்காசியாவின் இரு மோசமான எதிரிகளான ஈரானும் சிரியாவும் பல ஆண்டுகளுக்கும் பின்னர் நேரடியாக மோதிக் கொண்டன.

சிரியாவில் ஈரானியப் படைகளின் இருப்பை இஸ்ரேலும் அமெரிக்காவும் கடுமையாக எதிர்க்கின்றன. சிரியாவில் ஈரான் உறுதியாக நிலை கொண்டால் அது லெபனானையும் இலகுவில் ஹிஸ்புல்லா அமைப்பின் உதவியுடன் கைப்பற்றலாம். அது இஸ்ரேலுக்கு ஆபத்தான ஒன்றாகும். மத்திய தரைக்கடலில் ஈரானின் ஆதிக்க நிலப்பரப்பு நீண்டு செல்வதை அமெரிக்கா விரும்பவில்லை. அமெரிக்காவும் சிரியாவிலிருந்து ஈரானை வெளியேற்ற முயல்கின்றது.  ஈரானியப் படைகளும் ஹிஸ்புல்லா போராளிகளும் சிரியாவில் பரவலாக நிலைகொண்டுள்ளன. தற்போது அமெரிக்காவும் இஸ்ரேலும் அவற்றை வெளியேற்ற உறுதி பூண்டுள்ளன. அவை இரண்டும் இணைந்து செயற்படுவது போல வெளியில் காட்டிக் கொள்ளவதில்லை. சிரியாவில் ஹிஸ்புல்லா தலையிடத் தொடங்கியதிலிருந்து இஸ்ரேல் பல தடவை அங்கு விமானத் தாக்குதல் நடத்தியது. அவை இரகசியமாக நடத்தப்பட்டடன. கோலான் குன்றுகள் தனது ஆக்கிரமிப்பிற்கு கீழ் இருப்பதை எல்லா வகையில் பாதுகாக்க இஸ்ரேல் முயலும். இந்த மோதல்களைத் தொடர்ந்து இஸ்ரேலிய உயர் மட்டக்குழு அமெரிக்கா சென்று மேற்கொண்டு கடுமையான நடவடிக்கைகள் எடுக்க வேண்டின.

மியூநிச் மாநாட்டில் எதிரொலித்த சிரியா

ஜெர்மனியில் நடந்த மியூநிச் பாதுகாப்பு மாநாட்டில் இஸ்ரேலியத் தலைம அமைச்சர் இஸ்ரேல் சுட்டு வீழ்த்தியதாகச் சொல்லப்படும் ஈரானிய ஆளில்லாவிமானத்தின் பாகத்தை உயர்த்திப் பிடித்துக் காட்டிக் கொண்டு ஈரானிய வெளியுறவுத் துறை அமைச்சர் ஜாவட் ஜரீஃப் அவர்களின் பெயரைச் சொல்லி இது உங்களுடையது. மேலும் அவர் உங்கள் கொடுங்கோலர்களுக்குச் சொல்லுங்கள் இஸ்ரேலின் உறுதிப்பாட்டை சோதித்துப் பார்க்க வேண்டாம் என்றார். பின்னர் அங்கு பதிலளித்த ஈரானிய அமைச்சர் நெத்தன்யாஹூ செய்தது கோமாளித்தனமானது என்றார். ஆனால் ஈரானின் முன்னாள் படைத்தளபதி ஈரானில் கருத்துத் தெரிவிக்கையில் இஸ்ரேலியத் தலைநகர் டெல் அவீவ் தரைமட்டமாகும் இஸ்ரேல் அழிக்கப்படும், பெஞ்சமின் நெத்தன்யாஹூ கொல்லப்படுவார் எனச் சூளுரைத்தார். லெபனானில் செயற்படும் ஹிஸ்புல்லா அமைப்பிற்கு ஈரான் துல்லியமாகத் தாக்குதல் செய்யக்கூடிய ஏவுகணைகளை வழங்க முயல்கின்றது என்றார் நெத்தன்யாஹூ.

சிரியாவும் துருக்கியும் மோதல்

சிரியாவின் வட பிராந்தியத்தில் ஐஎஸ் படையினரை விரட்டிய குர்திஷ் போராளிகள் அதைத் தமது கட்டுப்பாட்டில் வைத்திருக்கின்றனர். சிரியாவிலோ ஈராக்கிலோ குர்திஷ் போராளிகள் தமக்கு என ஒரு கட்டுப்பாட்டுப் பிரதேசத்தை வைதிருப்பதை விரும்பாத துருக்கி அவர்களின் கட்டுப்பாட்டில் உள்ள அஃப்ரின் நகரை ஆக்கிரமித்தது. அங்கு குர்திஷ் போராளிகளுக்கும் துருக்கியப் படைகளுக்கும் இடையில் மோதல் உருவானது. தனது நாட்டுக்குள் துருக்கியப் படைகள் வந்தது தனது இறையாண்மைக்கு இழுக்கு என்பதால் சிரிய அரச படைகள் அஃப்ரின் நகருக்குள் சென்று துருக்கியப் படைகளுடன் சண்டையிடுகின்றன. சிரிய அதிபர் பஷார் அல் அசாத்தைப் பதவியில் இருந்து அகற்ற விருப்பம் கொண்டுள்ள துருக்கி சிரியாவுடன் ஒரு போருக்குத் தயார் என அறிவித்துள்ளது. துருக்கி அஃப்ரினில் செய்த படை நடவடிக்கையில் தனது படையில் 30 உயிரிழப்பு ஏற்பட்டதாகத் தெரிவித்துள்ளது. உண்மையான எண்ணிக்கை அதிலும் அதிகமாகும். 1974-ம் ஆண்டு துருக்கி சைப்பிரசில் 60,000 படையினரை இறக்கி ஒரு மாதம் சண்டையிட்டு 570 படையினரின் இழப்புக்களுடன் தனது நோக்கத்தை நிறைவேற்றியிருந்தது. அஃப்ரின் நகருக்குள் 6400 படையினரை இறக்கியதாக துருக்கி அறிவித்த போதிலும் உண்மையான எண்ணிக்கை பதினையாயிரம் முதல் இருபதினாயிரம் என மதிப்பிடப்பட்டுள்ளது. ஆனால் அஃப்ரினில் துருக்கியின் எண்ணம் நிறைவேறுமா என்பது கேள்விக்குறி. அஃப்ரினில் துருக்கிக்கு எதிரான போரில் குர்திஷ் போராளிகளுக்கு அமெரிக்கா உதவ மாட்டேன் எனக் கைவிரித்து விட்டது.

அமெரிக்க துருக்கி முறுகல்

சிரியப் பிரச்சனையால் துருக்கிக்கும் அமெரிக்காவிற்கும் இடையிலான உறவு கடந்த சில மாதங்களாக மோசமடைந்துள்ளது. 2018 பெப்ரவரி நடுப்பகுதியில் இரு நாடுகளுக்கும் இடையிலான உறவு நெருக்கடிப் புள்ளியில் இருக்கின்றது என்றார் அமெரிக்க வெளியுறவுத் துறைச் செயலர் ரெக்ஸ் ரில்லர்சன். இதற்கான காரணம் குர்திஷ் போராளிகளுக்கு அமெரிக்கா படைக்கலன்களையும் பயிற்ச்சிகளையும் வழங்குவதே. இதைச் சீர் செய்ய பெப்ரவரி மூன்றாம் வாரம் ரில்லர்சனுடன் அமெரிக்க பாதுகாப்புத் துறைச் செயலர் ஜிம் மத்தீஸ், தேசிய பாதுகாப்பு ஆலோசகர் எச் ஆர் மக்மஸ்ரர் ஆகியோர் துருக்கி சென்று ஆழமான கலந்துரையாடல் செய்துள்ளனர்.

இரசியர்களைக் கொன்ற அமெரிக்கா

2018 பெப்ரவரி 7-ம் திகதி சிரிய அரச படையினரும் இரசியாவின் தனியார் படையினரும் இணைந்து அமெரிக்க ஆதரவு படைக்குழுக்களின் கட்டுப்பாட்டில் உள்ள அல் ரபியா நகர்மீது தாக்குதல் நடத்தினர். அமெரிக்கப்படையினரும் அவரது ஆதரவுப் படையினரும் நடத்திய பதில் தாக்குதலில் பல இரசியர்கள் கொல்லப்பட்டனர். சிரியாவின் இரசியர்கள் பலர் கொல்லப்பட்ட தாக்குதல் இதுவாகும். இரசிய அரசு பல தனியார் படைகளை சிரியாவில் களமிறக்கியுள்ளது. தனது படையினருக்கு ஏற்படும் உயிரிழப்பை இரசியா பகிரங்கமாகத் தெரிவிக்க வேண்டும். அதைத் தவிர்ப்பதற்காகவே தனியார் படைகள். தனியார் படை என்பது கூலிப்படைக்கான கௌரவப் பெயராகும். இரசிய தனியார் படையினர் அமெரிக்க நிலைகள் மீது தாக்குதல் செய்தது இரசிய அரசின் உத்தரவிலா என்ற கேள்வி முன்வைக்கப்பட்டுள்ளது. இரசியப் படையினர் அமெரிக்க ஆதரவுப் படையினரின் கட்டுப்பாட்டில் உள்ள பிரதேசங்களில் தாக்குதல் நடத்தினால் அமெரிக்கா எப்படி நடந்து கொள்ளும் என அறியவே இத்தாக்குதல் நடத்தப்பட்டிருக்கலாம் என்ற ஊகமும் தெரிவிக்கப்பட்டுள்ளது.  புட்டீனின் நெருங்கிய நண்பரான Yevgeny Prigozhin என்பவரே இரசியாவில் தனியார் படைக்குப் பொறுப்பாகவுள்ளார். அமெரிக்கத் தேர்தலில் தலையிட்டமைக்காக Yevgeny Prigozhin எதிராக அண்மையில் குற்றப்பத்திரிகையும் சமர்ப்பிக்கப் பட்டுள்ளது. தனது இழப்புக்களுக்குப் பழிவாங்கும் முகமாக இரசியா இனின் என்ன நடவடிக்கை எடுக்க்ப் போகின்றது என்பதும் அதன் விளைவுகளும் சிரியாவில் பெரும் மோதலை உருஆக்கலாம்.

ஐஎஸ் அமைப்பு முற்றாக ஒழிக்கப்படவில்லை

ஐஎஸ் அமைப்பு சிரியாவில் இருந்து இன்னும் முற்றாக ஒழிக்கபப்டவில்லை. ஆங்காங்கே பல சிறிய நிலப்பரப்புக்களை அவர்கள் தமது கட்டுப்பாட்டின்கீழ் வைத்திருக்கின்றார்கள். மெய்நிகர் நாணயத்தின் (Crypto-currency or simply bitcoins) புழக்க அதிகரிப்பு அவர்களின் நிதி திரட்டலை இப்போது அதிகரித்துள்ளது. அவர்கள் சிரியாவில் மீளவும் எழுவதற்கான வாய்ப்பை நிராகரிக்க முடியாது.

கிழக்குக் கூட்டா(Ghouta).

சிரியாவில் நான்கு இலட்சம் மக்களைக் கொண்டது கிழக்குக் கூட்டா(Ghouta). இந்த நகரை பரதா(Barada) நதி பாலைவனச் சோலையாக்கியுள்ளது.

இது டமஸ்க்கஸுக்கு கிழக்காக 15 கிலோ மீட்டர் தூரத்தில் உள்ளது.

அங்கு பல படைக்கலன் ஏந்திய குழுக்கள் உள்ளன.

முக்கியமான குழுக்கள்: Jaysh al-Islam, Faylaq al-Rahman, Hay'at Tahrir al-Sham

Jaysh al-Islam 2013-ம் ஆண்டு பல குழுக்களை இணைத்து உருவாக்கப்பட்டது. இஸ்லாமியச் சட்டப்படி ஆட்சி நடக்க வேண்டும் என்ற கொள்கையுடையது. இதில் பத்தாயிரம் போராளிகள் இருக்கலாம் என நம்பப்படுகின்றது. அல் கெய்தாவிற்கு எதிராக சவுதி அரேபியாவால் இந்தக் குழு உருவாக்கப்பட்டது என நம்பப்படுகின்றது. இதற்கு துருக்கிய அரசுடனும் தொடர்பு இருக்கலாம் எனவும் சில செய்திகள் தெரிவிக்கின்றன.

Faylaq al-Rahman இரண்டாவது பெரிய படைக்குழு. இது Jaysh al-Islam அமைப்புடன் இணைந்து செயற்படுகின்றது. இரண்டும் தங்கள் கட்டுப்பாட்டு நிலப்பரப்புக்களை பகிர்ந்து கொண்டுள்ளன.

Hay'at Tahrir al-Sham அல் கெய்தாவின் ஓர் இணை அமைப்பு

மேலும் பல குழுக்கள் கிழக்கு கூட்டாவில் உள்ளன. அவை அடிக்கடி தமக்குள் போரிட்டுக் கொள்வது பொதுமக்களுக்கு பெரும் அசௌகரியங்களை ஏற்படுத்தும்.

ஐக்கிய நாடுகள் சபை கிழக்கு கூட்டாவை மீட்க சிரிய அரசு படைகள் நடத்திய தாக்குதலில் 426 சிறுவர்கள் உட்பட 1400 அப்பாவிகள் கொல்லப்பட்டிருக்கலாம் எனத் தெரிவிக்கின்றது. உண்மையான இழப்புக்கள் அதிகமாக இருக்கலாம்.

கூட்டாவில் நடப்பது ஒரு சமச்சீரற்ற போர். உலக வல்லரசான இரசியாவின் துணையுடன் பாரிய படைக்கலன்களுடன் சிரிய அரச படையும் மட்டுப்படுத்தப்பட்ட படைக்கலன்களுடன் போராளிக் குழுக்களும் மோதுகின்றன. அண்மைக்கால வரலாற்றைப் பார்க்கும் போது அப்பாவிகளின் உயிரிழப்புகளுக்கு முக்கியத்துவம் கொடுத்தால் இது போன்ற குழுக்களுக்கு எதிராக வெல்ல முடியாது. சுற்றி வளைப்பு, கண்மூடித்தனமான தாக்குதல், உணவு விநியோகத்தை தடுத்து பட்டினி போடுதல் ஆகிய மனிதாபிமனமற்ற நடவடிக்கைகளால் மட்டுமே சமச்சீரற்ற போரில் வெல்ல முடியும்.

அதனால்தான் சிரியாவின் கிழக்கு கூட்டாவில் பேரழிவுகளை நாம் பார்க்கின்றோம்.

ஐநாவில் மலையைக் கெல்லி எலியைப் பிடித்தது போல் ஐந்து மணித்தியாலப் போர் நிறுத்தம் ஒத்துக் கொள்ளப்பட்டுள்ளது.

ஐந்து மணித்தியால போர் நிறுத்தம் நிவாரணப் பொருட்களைக் கொண்டு செல்லப் போதாது. அங்குள்ள மக்களைப் பாதுகாப்பாக வெளியேற்றும் திட்டம் முன்வைக்கப்பட்டது. கிழக்குக் கூட்டா வாழ் மக்கள் பலர் தாம் எக்காரணம் கொண்டும் தமது இருப்பிடங்களை விட்டு வெளியேற மாட்டோம் என்கின்றனர். கிழக்கு அலெப்பேவிலும் இப்படி இரசிய விமானங்களின் தாக்குதலுடன் உச்ச நெருக்கடியைக் கொடுத்த சிரியப் படையினர் அங்குள்ள மக்களை வெளியேற்றி சிரிய சுதந்திரப்படை அமைப்பினரிடம் இருந்து அதைக் கைப்பற்றினர்.

இப்போது இரசியாவின் புதிய ரக விமானமான SU-35 சிரியாவில் பரீட்சிக்கப்படவிருக்கின்றது.

கிழக்கு கூட்டாவிற்கு துருக்கியில் இருந்து படைக்கலன்களை படைக்குழுக்களுக்கு விநியோகிப்பது இலகுவல்ல.

அமெரிக்க ஆதரவு படைக்குழுக்கள் அங்கு பெரிதளவில் இல்லை.

ஆனால் அங்குள்ள போராளிக் குழுக்கள் உறுதியாக நின்று போராடுகின்றன. 

இரசியாவின் ஆதரவு இருக்கும் வரை அதிபர் பஷார் அல் அசாத்தின் ஆட்சியை அசைப்பது மிகவும் கடினம் என்ற நிலை 2016-ம் ஆண்டே உருவாகிவிட்டது. ஆனால் 75 விழுக்காட்டிலும் அதிகமான சுனி இஸ்லாமியர்களைக் கொண்ட சிரியாவில் சியா இஸ்லாமியர்களின் ஒரு பிரிவான அல்வைற் இனக்குழுமத்தைச் சேர்ந்த பஷார் அல் அசாத்தால் அமைதியான ஆட்சியை நடத்த முடியாது. சிரிய இரத்தக் களரிக்கு அண்மையில் முடிவு இல்லை.

உறுதியான உலகப் பொருளாதாரத்தில் பங்குச் சந்தையின் தடுமாற்றம்

2008-ம் ஆண்டு ஏற்பட்ட நிதி நெருக்கடி அமெரிக்காவை நிலை குலைய வைத்தது. 2011இல் மேற்கு ஐரோப்பாவில் கடன் நெருக்கடி கலங்கடித்தது. 2015இல் சீனாவின் பொருளாதார வளர்ச்சி வேகம் குறைவடைந்தமை உலகையே வியக்க வைத்தது. இவற்றால் கடந்த பத்து ஆண்டுகளாக பணவாட்டம் (விலைச்சரிவு) உலகெங்கும் உள்ள முதலீட்டாளர்களை ஆட்டிப் படைத்தது. பொருளாதார வளர்ச்சியைத் தூண்ட உலகெங்கும் உள்ள நடுவண் வங்கிகள் அளவுசார் தளர்ச்சி (Quantitative Easing)  அது இது என்று தத்தம் நாடுகளில் பணப்புழக்கத்தை அதிகரித்தன. உலகெங்கும் உள்ள வங்கிகள் பணப்புழக்கத்தை அதிகரிக்க கடன்முறிகள் பங்குகள் உட்பட பாதுகாப்புப்பத்திரங்களை (securities, including debt and stocks) வாங்கி வைத்திருக்கின்றன. அதனால் உலகெங்கும் உள்ள பாதுகாப்புப் பத்திரங்களில் மூன்றில் இரண்டு பகுதி நடுவண் வங்கிகளின் கைகளில் உள்ளன. உலக நாடுகளின் மொத்தக் கடன் பழு 63 ரில்லியன் டொலர். கடன் கொடுத்தவர்கள் அந்த இலுமினாட்டிகள் எனப்படும் பதின்மூவரா?

கடனில் கலக்கும் அமெரிக்கா

அமெரிக்காவில் அரசு 2001-ம் ஆண்டில் இருந்து பாதீட்டுப் பற்றாக்குறை நிலவுகின்றது. 2001-ம் ஆண்டு அமெரிக்காவின் கடன் 6.9ரில்லியன் டொலர்கள். அது அதன் தேசிய உற்பத்தியின் 54விழுக்காடு. 2018இல் கடன்பளு 20ரில்லியன் டொலர்கள் மொத்தத் தேசிய உற்பத்தியின் 107விழுக்காடாக உயர்ந்துள்ளது. டொனால்ட் டிரம்பின் நிர்வாகத்தில் இது இன்னும் அதிகரிக்கவிருக்கின்றது.  அமெரிக்கப் பாதுகாப்புச் செலவு அதிகரிக்கப்பட விருக்கின்றது.

விற்கத் தொடங்கிய நடுவண் வங்கிகள்

பொருளாதார வளர்ச்சி சீரடைய நடுவண் வங்கிகள் தம் வசமுள்ள பத்திரங்களை விற்பனை செய்யத் தொடங்கியுள்ளன. அதனால் அவற்றில் விலைகள் குறையத் தொடங்கிவிட்டன. அதனால் அவற்றின் விளைபயன் (yield) அதிகரிக்கத் தொடங்கியது. தம்மிடம் பங்குகளை வைத்திருக்கும் முதலீட்டாளர்கள் அவற்றை விற்று நடுவண் வங்கிகள் விற்கும் கடன்முறிகளை வாங்கத் தொடங்கியதும் பங்குகளின் விலைகள் சரியத் தொடங்கின.

.

அமெரிக்கத் தும்மலும் உலகத் தடிமலும்

2018 பெப்ரவரி 2-ம் திகதி அமெரிக்காவில் பங்கு விலைகள் சரியத் தொடங்கின. அது உலகெங்கும் பங்குகளின் விலைகளை விழச் செய்தன. அந்த வீழ்ச்சி 5-ம் திகதிவரை தொடர்ந்தது. இந்த வீழ்ச்சி மீண்டும் பொருளாதார நெருக்கடியை மீண்டும் உலகெங்கும் கொண்டு வருமா என்ற கேள்வியை எழுப்பியது. பங்குச் சந்தையில் முதலீட்டாளர்கள் 5ரில்லியன்களுக்கு மேல் இழந்துள்ளனர். கடந்த பத்து ஆண்டுகளாக பொருளாதார வளர்ச்சியின்மை, பணவாட்டம் போன்றவற்றால் பாதிக்கப்பட்ட முதலீட்டாளர்கள் இப்போது பொருளாதார வளர்ச்சி பணவீக்கம் போன்றவற்றால் கரிசனையடைந்துள்ளார்கள்.

சரிவின் ஆரம்பப் புள்ளி

2018 பெப்ரவரி 2-ம் திகதி அமெரிக்காவின் ஊழியர்களின் ஊதியம் தொடர்பான புள்ளிவிபரங்கள் வெளிவந்தன. அமெரிக்க ஊதியம் கடந்த பத்து ஆண்டுகளில் இல்லாத அளவு 2.9விழுக்காடு அதிகரித்து இருந்தது. இதனால் பணவீக்கம் அதிகரிக்கும் என்ற அச்சத்தில் பல முதலீட்டாளர்கள் தம்மிடமுள்ள அமெரிக்க திறைசேரியின் கடன்முறிகளை விற்பனை செய்யத் தொடங்க அவற்றின் விளைதிறன் 2.85விழுக்காடாக அதிகரித்தது. 14ரில்லியன் டொலர் பெறுமதியான அமெரிக்க திறைசேரிக் கடன் முறிகளின் பெறுமதி சரியத் தொடங்கியது. ஊதியம் அதிகரித்தால் அமெரிக்க நிறுவனங்களின் உற்பத்திச் செலவு அதிகரித்து அவற்றின் இலாபத்தைக் குறைக்கும் என்ற அச்சத்தால் பங்குகளின் விலைகளும் வீழ்ச்சியடையத் தொடங்கின.

பட்ட கடன் அடைக்க விற்பனை  

2008-ம் ஆண்டின் பின்னர் பல நடுவண் வங்கிகள் வட்டி விழுக்காட்டை ஒரு விழுக்காட்டிலும் பார்க்கக் குறைத்தன. சில நாடுகளில் அது எதிர்க்கணியமாகவும் இருந்தது. இதனால் பலர் வங்கிகளில் கடன் வாங்கி பங்குச் சந்தையில் முதலிட்டனர். அதனால் பங்குகளின் விலை அளவிற்கு அதிகமாக உயர்வடைந்ததது. இப்போது வட்டி விழுக்காடு அதிகரிப்பதால் பங்குகளை விற்று வாங்கிய கடனை அடைக்கவேண்டியுள்ளது.

டிரம்பின் வரிச் சலுகைகள்

2018-ம் ஆண்டின் ஆரம்பத்தில் அமெரிக்கக் கூட்டாண்மைகளுக்கான வரியை அதிபர் டொனாண்ட் டிரம்ப் குறைத்தார். இதனால் அவற்றின் இலாபம் அதிகரிக்கும் என்பதால் அமெரிக்காவில் பங்குகளின் விலைகள் உயர்ந்தன. S&P 500 சுட்டியில் உள்ள கூட்டாண்மைகளின் பெறுமதி 2017 ஜனவரியில் இருந்ததிலும் பார்க்க 5ரில்லியன் டொலரால் 2அதிகரித்தது. அதைத் தொடர்ந்து உலகெங்கும் பங்குகளின் விலைகள் 14ரில்லியன் டொலரால் அதிகரித்தன. உலகெங்கும் பங்குச் சந்தைகளில் மேலதிகமாக 350பில்லியன் டொலர் முதலிடப்பட்டது.

நற்செய்தி சொன்ன நாணய நிதியம்

2018 ஜனவரியில் சுவிஸ் நகர் டவோஸில் நடந்த உலகத் தலைவர்களும் பெரும் செல்வந்தர்களும் கலந்து கொண்ட உலகப் பொருளாதார மன்றக் கூட்டத்தில் பன்னாட்டு நாணய நிதியத்தின் நிறைவேற்று இயக்குனர் உலகெங்கும் உள்ள பல நாடுகளில் பொருளாதார வளர்ச்சி ஒரேயடியாக நடைபெறுகின்றது என்றார் (a synchronised acceleration in America, Europe and Asia) 2018-ம் ஆண்டிற்கான உலகப் பொருளாதார வளர்ச்சிக்கான எதிர்வு கூறலை 3.7 விழுக்காட்டில் இருந்து 3.9 விழுக்காடாக பன்னாட்டு நாணய நிதியம் அறிவித்தது. உலகெங்கும் பொருளாதாரம் வளர்ச்சியடைந்தால் அது தன் கூடவே பணவீக்கத்தையும் கொண்டு வரும். பணவீக்கம் வந்தால் எல்லா நடுவண் வங்கிகளும் வட்டி விழுக்காட்டை அதிகரிக்கும். வட்டி விழுக்காடு அதிகரித்தால் அரசுகளின் கடன் முறிகளினால் கிடைக்கும் வருமான விகிதம் அதிகரிக்கும். அதனால் உலகெங்கும் உள்ள முதலீட்டாளர்கள் தமது பங்குகளை விற்பனை செய்து அரச கடன்முறிகளில் முதலீடு செய்வார்கள். அதனால் பங்கு விலைகள் சரியும் என 2018 பெப்ரவரி முதல் வாரத்தில் முதலீட்டார்கள் எதிர்பார்க்கத் தொடங்கினர்.

வட்டி வட்டி ஏறும் நேரமிது

2018 பெப்ரவரி முதலாம் திகதி அமெரிக்காவின் இணைப்பாட்சி ஒதுக்ககம் (Federal Reserve) என்னும் நடுவண் வங்கி தனது அறிக்கையில் படிப்படியாக இனி வட்டி விழுக்காடு அதிகரிக்கப்படும்  எனத் தெரிவித்துள்ளது. வட்டி விழுக்காட்டு அதிகரிப்பு கடன்முறிகள் மீதான முதலீட்டை அதிகரிக்கும் அதனால் பங்குகளின் விலைகளைக் குறைக்கும்.

வளர்முக நாடுகளின் கீழ்முகம்

2018 ஜனவரி 29-ம் திகதிக்கும் பெப்ரவரி 7-ம் திகதிக்கும் இடையில் வளர்முக நாடுகளின் பங்குச் சுட்டியான Morgan Stanley Capital International (MSCI) 7.5 விழுக்காடு வீழ்ச்சியடைந்தது. அமெரிக்கப் பங்குச் சுட்டியான டௌ ஜோன்ஸ் பெப்ரவரி 5-ம் திகதி வரையிலான மூன்று நாட்களில் 2271 புள்ளிகள் வீழ்ச்சியடைந்தது அது ஒன்பது விழுக்காடான வீழ்ச்சியாகும். பத்து விழுக்காடு வரையிலான வீழ்ச்சி ஆபத்தானதல்ல அது ஒரு திருத்தம் ஆக இருக்கலாம். 2017-ம் ஆண்டின் இறுதியிலும் 2018 ஜனவரியிலும் பங்குகளின் விலைகள் அதிகரித்தமைக்கான ஒரு திருத்தம்தான் 2018 பெப்ரவரி ஆரம்பத்தில் ஏற்பட்ட விலை வீழ்ச்சி எனவும் பலர் கருதுகின்றனர். இலண்டனில் இருந்து வெளிவரும் பினான்ஸியல் ரைம்ஸ் பத்திரிகையில் இது ஒரு ஆரோக்கியமான திருத்தம் என ஒருவர் கருத்து வெளியிட்டுள்ளார்.

அரசியல் காரணங்கள்

நாலரை மாதங்களுக்கு முன்னர் தேர்தல் நடந்த ஜேர்மனியில் ஓர் ஆட்சி அமைப்பதற்கான வாய்ப்பு பெப்ரவரி 5-ம் திகதிவரை ஒரு நிச்சயமற்ற நிலையில் இருந்தது. ஜேர்மனியில் ஆட்சி உறுதியற்ற நிலையில் இருந்தால் அது ஐரோப்பிய ஒன்றியத்தில் ஓர் உறுதியற்ற நிலையை உருவாக்கும். அந்த உறுதியற்ற நிலை பங்கு விலைகளைச் சரியச் செய்தது. பெப்ரவரி 7-ம் திகதி ஜேர்மனியில் ஆட்சி அமைப்பதற்கான உடன்பாடு ஏற்பட்டதால் பங்கு விலைகள் மீளவும் உயர்வடைந்தன. இதனால் 2017 ஏப்ரலிற்குப் பின்னர் பிரித்தானியாவின் FTSE 100 பங்குச் சுட்டியும் ஐரோப்பாவின் Euro Stoxx 600 சுட்டியும் ஒரு நாளில் மிக அதிக அதிகரிப்பைக் கண்டன.

அமெரிக்கா வேறு ஐரோப்பா வேறு

வேலையற்றோர் தொகை தொடர்ச்சியாக வீழ்ச்சியடைந்து வரும் அமெரிக்காவில் ஊழியர்களின் ஊதியம் அதிகரித்துக் கொண்டே போகின்றது அதனால் அங்கு விலைவாசி அதிகரிக்கலாம் என்ற அச்சம் பங்குச் சந்தையை ஆட்டிப்படைக்கின்றது. ஆனால் மேற்கு ஐரோப்பாவிலும் ஜப்பானிலும் ஊழியர் ஊதிய அதிகரிப்பு கட்டுபாட்டுக்குள்ளேயே இருக்கின்றது. அமெரிக்காவின் பாதீட்டில் வரவிலும் பார்க்க செலவு அதிகரிக்கப்படவிருக்கின்றது. அடுத்த நிதியாண்டில் அரச கடன் இருமடங்காகி ஒரு ரில்லியல் டொலரை எட்டவுள்ளது. அதனால் அங்கு வட்டி விழுக்காடு அதிகரிக்கும் வாய்ப்புக்கள் அதிகரித்துள்ளன.

தங்கத்திலே ஒரு குறையிருக்கு

பல பங்குச் சந்தை ஆய்வாளர்களின் கருத்துப்படி உலெகெங்கும் பொருளாதாரங்கள் சீரடைகின்றன, நிறுவனங்களின் இலாபங்கள் அதிகரிக்கின்றன, அதனால் பங்குச் சந்தையில் பாரிய வீழ்ச்சி ஏற்பட வாய்ப்பில்லை. உலகப் பொருளாதாரத்தில் நிச்சயமற்ற நிலை ஏற்படும் போது தங்கத்தில் பலர் முதலீடு செய்வர். ஆனால் பங்கு விலைகள் சரியும் போது தங்கத்தின் விலையும் குறைந்தது. அமெரிக்க டொலரின் பெறுமதி அதிகரித்தது. இதனால் உலகப் பொருளாதாரத்தில் ஒரு நிச்சயமற்ற நிலை இல்லை என்பது நிச்சயமாகின்றது. BlackRock என்னும் உலகின் மிகப்பெரிய சொத்து முகாமை நிறுவனம் பங்கு விலைகளின் சரிவு தற்காலிகமானது என அடித்துச் சொல்கின்றது. அமெரிக்கப் பங்குச் சுட்டியான S&P 500இல் உள்ள நிறுவனங்களின் இலாபம் 2017இன் நான்காம் காலாண்டில் 13 விழுக்காடு அதிரித்துள்ளதுடன் விற்பனை எட்டு விழுக்காடு அதிக்ரித்துள்ளது. 2018இல் வரிக் குறைப்பு மேலும் இலாபத்தை அதிகரிக்கும் என எதிர்பார்க்கப்படுகின்றது.

புயலுக்குப் பின் அமைதி

2018 முதலாம் வாரத்தில் குழம்பிய பங்குச் சந்தை இரண்டாம் வாரத்தில் அமைதியடையத் தொடங்கிய போது அமெரிக்காவின் பணவீக்கம் 1.9விழுக்காடு என்ற தகவல் 2018 பெப்ரவரி 14-ம் திகதி வெளிவந்தது. இது எதிர்பார்த்திருந்த 1.7விழிக்காட்டிலும் அதிகம். பொதுவாக பணவீக்கம் அதிகரிக்கும் செய்தி வந்தவுடன் பங்கு விலைகள் சரிவதுண்டு. ஆனால் அப்படியில்லாமல் அமெரிக்காவில் பங்குகள் விலை அதிகரிப்பைக் கண்டன. டௌ ஜோன்ஸ், S&P 500 ஆகிய இரு பங்குச் சுட்டிகளும் உயர்வடைந்தன. பணவீக்கம் அதிகரித்தால் வட்டி விழுக்காடு அதிகரிக்கப்படும் என்ற எதிர்பார்ப்பால் நாணயத்தின் பெறுமதி அதிகரிப்பதுண்டு. ஆனால் டொலரின் பெறுமதி வீழ்ச்சியடைந்தது. தங்கத்தின் விலை அதிகரித்தது. அமெரிக்காவின் சில்லறை விற்பனை குறைந்தது என்ற புள்ளி விபரமும் வெளிவந்தது. அது பொருளாதார வளர்ச்சி உறுதியற்று இருப்பதைக் காட்டியது. . உடனடியாக வட்டி அதிகரிக்க முடியாத சூழல் உருவாகியுள்ளது. அதனால் தொடர்ந்து நான்கு நாட்களாக பங்கு விலைகள் அதிகரித்தன.

பங்குத் தளும்பல் சுட்டி

Vix என்னும் பங்கு விலைகளின் தளும்பல் நிலையைக் காட்டும் சுட்டி இருக்கின்றது இது உயரும் போது பங்கு விலைகள் சரிவதையும் குறையும் போது பங்குச் சந்தையில் ஒரு நிச்சய நிலை உள்ளது என்றும் விலைகள் உயரும் என்றும் சுட்டிக்காட்டும். 2018-ம் ஆண்டு பெப்ரவரி மாத ஆரம்பத்தில் 14 ஆக இருந்த Vix சுட்டி பெப்ரவரி இரண்டாம் வாரம் 37 ஆக உயர்ந்தது. 14-ம் திகதி 20இலும் குறைந்தது.

பங்குச் சந்தைத் திருத்தங்கள்

பங்குகள் அவற்றின் உண்மையான பெறுமதிக்கு அதிகமான விலையில் இருக்கும் போது 10 விழுக்காடு விலை வீழ்ச்சியடைந்து உண்மையான பெறுமதி நிலையை அடைதலை பங்குச்சந்தைத் திருத்தம் என அழைப்பர். இரண்டாம் உலகப் போரின் பின்னர் அமெரிக்காவின் பங்குச் சந்தை 36 திருத்தங்களைச் சந்தித்துள்ளது. அவற்றில் பொருளாதாரம் வளர்ச்சி நிலையில் இருக்கும் போது நடந்தவை 24 பொருளாதாரம் மந்த நிலையில் இருக்கும் போது நடந்த திருத்தங்கள் 12. பங்குச் சந்தைத் திருத்தம் நடப்பது பொருளாதார வளர்ச்சியின் ஓர் அம்சமாகும். அதையிட்டு அச்சப்படத் தேவையில்லை. கரடிப் பங்குச் சந்தை என்பது பங்கு விலைகள் வீழ்ச்சியடையும் என்ற நம்பிக்கையை உள்ள நிலை. எருதுப் பங்குச் சந்தை என்பது விலைகள் அதிகரிக்கும் என்ற நம்பிக்கை உடைய நிலை. இரண்டாம் உலகப் போரின் பின்னர் பொருளாதாரம் வளர்ச்சி நிலையில் இருந்தபோது நடந்த 24 பங்குவிலைத் திருத்தங்களில் 4 மட்டுமே கரடிச் சந்தை நிலையை உருவாக்கின. 

அமெரிக்காவில் ஷேல் எரிவாயு உற்பத்தி அதிகரிப்பதால் எரிபொருள் விலை பெரும் அதிகரிப்பைச் சந்திக்க வாய்ப்பில்லை. போர்த்துக்கல், ஜேர்மனி போன்றவற்றின் பொருளாதாரங்கள் உறுதியான வளர்ச்சி நிலையை அடைந்துள்ளன. இரசியா எரிபொருள் விலை வீழ்ச்சி பொருளாதாரத் தடை ஆகியவற்றையும் தாண்டி வளரத் தொடங்கி விட்டது. சீனா உள்நாட்டுக் கடன் பிரச்சனைகளுக்கு மத்தியிலும் பொருளாதார வளர்ச்சியை தொடர்ந்து தக்க வைக்கின்றது. பெப்ரவரி பங்குச் சந்தையில் ஏற்பட்ட குழப்பம் இனி முதலீட்டாளர்களை கவனத்துடன் செயற்பட வைத்துள்ளது.

பங்குச் சந்தைகள் அவ்வப்போது தளம்பல்களைச் சந்திக்கும். 2018இல் ஏற்பட்ட வீழ்ச்சி போல் மேலும் சில தளம்பல்களை பங்குகளில் முதலிட்டோர் சந்திக்க நேரிடும். ஆனால் 2018 உலகம் பொருளாதாரப் பிரச்சனைகளில் இருந்து சற்று விடுபடும். 

இந்திய சீன முறுகல் நிறுத்தப்பட முடியாதது

இந்திய சீன உறவைப் பற்றிய கருத்தறியவையம் 2018 பெப்ரவரி மாத ஆரம்பத்தில் நடைபெற்றது. இதில் கலந்து கொண்டு உரையாற்றிய இந்தியாவின் முன்னாள் பாதுகாப்பு ஆலோசகர் எம் கே நாராயணன் இந்தியாவிற்கும் சீனாவிற்கும் இடையிலான வேறுபாடுகள் அதிகரிக்கும் எனவும் டோக்லம் முறுகல் நிலை போல் மேலும் பல தொடரும் எனவுக் கருத்து வெளியிட்டிருந்தார்.

எம் கே நாராயணன் எல்லைப் பிரச்சனைகளுக்கு மேலாக சீன இந்தியப் பிரச்சனையில் முக்கிய பங்கு வகிப்பவற்றை முன்வைத்தார்:

1. தலாய் லாமாவிற்கான இந்திய ஆதரவு சீனாவை சீண்டுகின்றது

2. சீனாவின் சீண்டுதல் நடவடிக்கைகள் தொடரலாம்.

3.இந்தியாவிற்கு எதிராக இந்தியாவின் அயல் நாடுகளுக்கு சீனாவின் பொருளாதார மிரட்டல்கள் தொடரும்.

4. சீனாவின் பிராந்தியத் திட்டத்தில் பாக்கிஸ்த்தானிற்கு முக்கிய இடமுண்டு

5. சீனாவின் வசமுள்ள அம்பாந்தோட்டை துறைமுகம், பாக்கிஸ்த்தானிய குவாடர் துறைமுகம் ஆகியவற்றுடன் ஜிபுக்த்தியில் உள்ள சீனப்படைத்தளமும் சீனாவிற்கும் இந்தியாவிற்கு இடையிலான முறுகலை அதிகரிக்கும்.

6. இரு நாடுகளுக்கும் இடையில் முறுகல் நிலை தொடர்ந்தாலும் போர் நடக்கும் ஆபத்து இல்லை.

7. சீனாவின் நன்னுதல் உபாயம் தொடரும்.

2017 ஓகஸ்ட் மாதம் இந்தியப் படைகளும் சீனப் படைகளும் டொக்லம் பிராந்தியத்தில் ஒரு தரப்பும் மறுதரப்பும் கண்ணுக்கு எட்டிய தூரத்தில் முறுகல் நிலையில் எதிர் கொண்டிருந்தன. பிரேசில், இரசியா, இந்தியா, சீனா, தென் ஆபிரிக்கா ஆகிய நாடுகளைக் கொண்ட பிரிக்ஸ் அமைப்பின் கூட்டம் சீனாவில் பிரச்சனை இன்றி நடப்பதை சீனா விரும்பியபடியால் அந்த முறுகல் நிலை தவிர்க்கப்பட்டது. அதனால் டொக்லம் சமவெளியில் சீனா மீண்டும் இந்தியாவிற்கு அச்சுறுத்தல் விடுவிக்கக் கூடிய வகையில் நடக்கலாம் என எம் கே நாராயணன் சீன இந்திய சமகாலப் பிரச்சனைகள் தொடர்பாகப் பேசுகையில் தெரிவித்தார். அவரின் பேச்சில் நேப்பாளத்தில் நடந்த ஆட்சி மாற்றம் பற்றிய கருத்து உள்ளடக்கப்படவில்லை. ஆனால் நேப்பாளத்தில் நடந்த ஆட்சி மாற்றம் சீனாவால் பூட்டானிலும் தனக்கு சாதகமான ஆட்சி மாற்றத்தை ஏற்படுத்த முடியும். அப்படி நடக்கும் போது சீனா டோக்லம் சமதரையை கைப்பற்றத் தூண்டப்படும்.

இந்துத்தேசியவாதத்தில் ஓர் ஓட்டை துளைக்க முனையும் சீனா.

இந்தியாவில் ஆதரவு அதிகரித்துவரும் இந்து தேசியவாதம் தனக்கு சவால் விடத் துடிப்பதை சீனா அறியும். அதற்கு ஆரம்பத்திலேயே ஓர் அடி கொடுப்பது அவசியம் என சீனா கருத இடமுண்டு. ஆனால் இந்தியர்களின் கௌரவத்தை சிதைக்கக் கூடிய வகையில் சீனா எடுக்கும் நடவடிக்கைகள் ஒரு மிகை-தேசியவாதத்தை (Hyper-nationalism) தூண்டும் என்பதையும் சீனா உணரும்.  காங்கிரசுக் கட்சியின் இந்திப் பேரினவாதமும் பாரதிய ஜனதாக் கட்சியின் இந்துத் தேசியவாதமும் இந்தியாவின் தேசிய ஒருமைப்பாட்டுக்கு ஆபத்தானவை என்றாலும் அதை வைத்து இந்தியாவை பிளவு படுத்தும் திறன் மிக்கதாக சீன வெளியுறவுத் துறையோ அல்லது அதன் உளவுத் துறையோ இல்லை. சீனா கைப்பற்றி வைத்துள்ள திபெத்தில் இந்துக்களின் புண்ணிய நிலையமான கைலாய மலையும் அடங்கும். அதை சீனா இந்தியாவிடம் ஒப்படைக்க வேண்டும் என்பது இன்றுவரை ஒரு கோரிக்கையாக மட்டும் இருக்கின்றது. இந்துத் தேசியவாதமும் இந்தியப் படையும் உரிய வலிமையை அடையும் போது அது ஒரு மீட்பு முயற்ச்சியாக மாறும்.

அருணாச்சலப்பிரதேசம்

2003-ம் ஆண்டு சீனாவிற்குப் பயணம் மேற்கொண்ட அடல் பிஹாரி வாஜ்பாய் திபெத்தை சீனாவின் ஒரு பகுதியாக இந்தியா ஏற்றுக் கொள்வதாக அறிவித்தார். ஆனால் சீனா அருணாச்சலப் பிரதேசத்தை இந்தியாவின் ஒரு பகுதியாக ஏற்றுக் கொள்ளவில்லை. சீனாவின் கடவுச்சீட்டில் அருணாசலப் பிரதேசத்தை தனது ஒரு பகுதியாகக் காட்டும் வரைபடத்தை சீனா இணைத்தது. அருணாசலப் பிரதேசத்தில் உள்ள இந்திய அதிகாரிகள் சீனா வருவதற்கு நுழைவு அனுமதி தேவையில்லை என்றது. 2009-ம் ஆண்டு ஆசிய அபிவிருத்தி வங்கியில் இந்தியா கடன் பெற முனைந்தபோது தனது பிரதேசமான அருணாச்சலப்பிரதேசத்தின் அபிவிருத்திக்கு இந்தியா கடன் வாங்க முடியாது எனச் சொல்லித் தடுத்தது. இந்திய சீன முறுகலில் என்றும் தீர்க்க முடியாத பிரச்சனையாக அருணாச்சலப் பிரதேசம் இருக்கப்போகின்றது. எம் கே நாராயணன் தனது உரையில் சீனாவின் நன்னுதல் உபாயம் தொடரும் (China’s nibbling tactics will continue) என்பது கூர்ந்து கவனிக்கப்பட வேண்டிய ஒன்று. சீனா சிறிது சிறிதாக கடந்த பல ஆண்டுகளாக இந்தியாவின் எல்லைகளுக்கு ஊடுருவி படை நிலைகளை நிறுவி இந்தியாவைச் சிறிது சிறிதாக ஆக்கிரமிக்கின்றது. அதை இந்தியாவால் தடுக்க முடியவில்லை. காங்கிரசுக் கட்சியின் ஆட்சிக்காலத்தில் இவை மூடி மறைக்கப்பட்டன என்ற குற்றச் சாட்டும் முன்வைக்கப்பட்டது. இந்த மெல்ல மெல்ல சிறிது சிறிதாக ஆக்கிரமிக்கும் சீனாவின் உபாயம் தொடரும் என்பதை எம் கே நாராணன் உறுதிப்படுத்தியுள்ளார்.

   

பொருளாதாரத்தில் கவனம் செலுத்திய தளபதி

முன்னாள் இந்தியத் தளபதி ஜெனரல் ரொய் சௌத்திரியும் எம் கே நாராயணன் உரையாற்றிய அதே கருதறியவையில் உரையாற்றினார். அவர் இந்தியப் படையின் வலிமை பலர் நினப்பதிலும் பார்க்க அதிகம் என்றார். அத்துடன் அவர் இரு நாடுகளுக்கும் இடையிலான பொருளாதாரச் செயற்பாடுகள் பற்றியும் உரையாற்றினார். அவர் தொட்ட விடயங்கள்.

1. இந்தியப் பொருளாதாரத்தின் சோம்பல் நிலையும் பேராசையுமே சீனாவிலும் பார்க்க இந்தியா கைத்தொழில்துறையிலும் உற்பத்தித் துறையிலும் பின் தங்கியிருக்கக் காரணம்.

2. இந்தியச் சந்தையில் சீனா தனது பொருட்களைக் கொட்டுவதற்குக்(dumping) காரணம் இந்தியாவின் பிழையான கொள்கைகள்

3. விநாயகர் சிலைகளைக் கூடை சீனா இந்தியாவில் விற்பனை செய்கின்றது.

4. சீனாவுடன் ஒத்துழைப்பு, போட்டியிடல், எதிர்கொள்ளல் ஆகிய மூன்றையும் இந்தியா சரியாகக் கடைப்பிடிக்கவில்லை.

5. இந்தியாவின் பொருளாதாரச் செயற்பாட்டையே குறை கூற வேண்டும், சீனாவை அல்ல.

6. இரு நாடுகளுக்கும் இடையிலான படைத்துறை இடைவெளி 1962இல் இருந்தது போல் இல்லை.

7. சீனாவுடன் போட்டி போடக் கூடிய வகையில் இந்திய உற்பத்தித் துறை வலிமைப் படுத்தப்பட வேண்டும்.

சீனப் பொருட்கள் இந்தியாவில் பெருமளவில் விற்பனை செய்வதற்குக் காரணம் ஒரு சில இந்தியப் பெரு முதலாளிகளே என்பதைச் சுட்டிக்காட்ட சௌத்திரி தவறிவிட்டார். சீனாவின் படைத்துறை வளர்ச்சிக்கு அதன் பொருளாதார வளர்ச்சி உறுதுணையாக இருக்கின்றது. சீனாவிர்கு ஈடாக இந்தியாவும் பொருளாதாரத்தில் வளர்ச்சியடைந்தால் மட்டுமே படைத்துறையில் சீனாவிற்கு இந்தியா ஈடு கொடுக்க முடியும் என்பதாலேயே சௌத்திரி இந்தியப் பொருளாதாரத்தின் சோம்பல் தன்மையை எடுத்துக் காட்டினார்.

மக்கள் தொகைக் கட்டமைப்பை மறந்த நிபுணர்கள்

சீனா ஒரு பிள்ளைக் கொள்கையை கடுமையாக நிறைவேற்றியபடியால் சீனாவில் வயோதிபர் தொகை அதிகரித்தும் இளையோர் தொகை குறைந்தும் உள்ளது. இந்தியாவின் நாம் இருவர் நமக்கிருவர் கொள்கை இறுக்கமாகக் கடைப்பிடிக்கப்படவில்லை. அதனால் உலகிலேயே இளையோர் தொகை அதிகம் கொண்ட நாடுகளில் ஒன்றாக இந்தியயா இருக்கின்றது. படைத்துறைக்கு ஆட் சேர்பதில் சீனா பிரச்சனையை எதிர் கொள்ளும். இந்தியாவிற்கு அது பெரும் பிரச்சனையாக இருக்காது. எம் கே நாராயணனோ அல்லது ரோய் சௌத்திரியோ சீனா எதிர் கொள்ளும் மக்கள் தொகைக் கட்டமைப்பு பிரச்சனையைப் பற்றியும் இந்தியாவின் சாதகமான மக்கள் தொகைக் கட்டமைப்பையும் பற்றி எடுத்துரைக்கவில்லை.

நீர்ப்பங்கீடு

சீனாவில் உற்பத்தியாகி இந்தியாவிற்கும் பங்களாதேசத்திற்கும் செல்லும் பிரம்ம புத்திரா நதியை சீனா திசை திருப்பினாலும் அது இந்தியப் பகுதியில் உள்ள பிரம்புத்திரா நதியைப் பாதிக்காது என்றார் முன்னாள் இந்தியத் தளபதி ரோய் சௌத்திரி. அதனால் அதையிட்டு அச்சம்டையத் தேவையில்லை என்பது அவரது கருதாக இருந்தது.  திபெத்தில் உள்ள கைலாய மலையில் உருவாகும் நான்கு பெரும் நதிகளில் இந்திய நீர்த் தேவை பெருமளவில் தங்கியிருக்கின்றது. இந்திய நீர்வளத்தின் 34 விழுக்காடு சீனாவின் கட்டுப்பாட்டில் உள்ள கைலாய மலையில் இருந்து உருவாகின்றது. அவற்றில் ஒன்றான பிரம்மபுத்திரா நதி சீனாவில் சாங்போ (Tsangpo) என அழைக்கப்படுகின்றது.  பிரம்மபுத்திரா நதி அசாம், அருணாச்சலப் பிரதேசம், மெகாலயா, சிக்கிம், நாகலாந்து மேற்கு வங்கம் ஆகிய மாநிலங்களின் உணவு உற்பத்திக்கு நீர்வழங்கிக் கொண்டு பங்களாதேசத்தினூடாகச் சென்று வங்கக் கடலில் கலக்கின்றது. சீனாவில் அதிகரிக்கும் நீர்த் தட்டுப்பாட்டிற்கு பிரம்மபுத்திரா திசை திருப்பப்பட வேண்டும் என்ற திட்டம் சீனாவிடமுள்ளது. இந்தியாவின் வட கிழக்கில் இருக்கும் மாநிலங்களை ஆக்கிரமித்தால் அது இலகுவானதாக அமையும். அதனால் சீனா நீண்டகாலமாக அருணாச்சலப் பிரதேசம் தன்னுடையது என தொடர்ந்து வலியுறுத்தி வருகின்றது. அருணாசலப் பிரதேச எல்லையில் இந்தியாவும் சீனாவும் சொந்தம் கொண்டாடும் சர்ச்சைக்குரிய தவாங் மாவட்டத்தை நோக்கி சீனா பாரிய தெருக்கள் உட்படப் பல  உட்கட்டுமானங்களை உருவாக்கியுள்ளது. சனன் என்னும் நகரில் இருந்து அருணாச்சலபிரதேச் எல்லையை நோக்கி இருநூறு கிலோ மீட்டர் நீளமான எஸ்-202 என்னும் நெடுஞ்சாலை முக்கியமானதாகும். பிரம்மபுத்திரா நதியைத்துருப்புச் சீட்டகப் பாவித்து பங்களாதேசத்தை சீனாவின் பிடிக்குள் கொண்டுவர சீனாவால் முடியும். இந்தியாவின் மூன்றில் ஒரு பகுதி நீர்வளம் சீனாவின் கையில் இருப்பது மிகவும் அச்சமூட்டுவதே என்பதை ஏன் தளபதி சௌத்திரி உணர மறுத்தார்.

இந்தியாவின் வட கிழக்கு மாகாணங்களை சீனா அபகரித்தால் அதன் மூலம் பங்களாதேசத்தையும் சீனாவால் இலகுவாக அபகரிக்க முடியும். பின்னர் வங்காள விரிகுடாவில் இருந்து இந்து மாக்கடலில் தனது ஆதிக்கத்தை நிலை நிறுத்த சீனாவால் முடியும். சிட்டக்கொங், அம்பாந்தோட்ட, குவாடர் ஆகிய மூன்று துறைமுகங்களும் இந்தியாவிற்கான இறப்புச் சுருக்குக் கயிறாக மாறுவதை இந்தியா எந்த வகையிலாவது தடுக்க வேண்டும். அதற்கான அரசுறவியல் நகர்வுகள் நேப்பாளத்தில் ஆரம்பிக்கப்படவேண்டும். அது பின்னர் பூட்டான், பங்களாதேசம், மியன்மார் ஆகிய நாடுகளுடனான நட்பையும் ஒத்துழைப்பையும் உயர்த்துவதை நோக்கமாகக் கொள்ள வேண்டும். சீனாவின் நட்பு இந்த நாடுகளை சீனாவிற்கான கடனாளியாக மாற்றும் என்ற பரப்புரை சிறப்பாக முன்னெடுக்கப்படுவதுடன். இந்தியாவின் நட்பு அந்த நாடுகளுக்கு நன்மையாக முடியக் கூடிய வகையில் இதய சுத்தியுடன் இந்திய வெளியுறவுத் துறை செயற்பட வேண்டும். நேப்பாளத்தில் இவற்றிற்கு நேர் மாறான கொள்கைகளைக் கடைப்பிடித்ததால் இந்திய எதிர்ப்பாளர்கள் அங்கு ஆட்சிக்கு வந்தார்கள் என்பதை இந்தியா உணர வேண்டும்.

கோழிக்கழுத்து

இந்தியாவின் வட கிழக்கு மாநிலங்களான அருணாச்சலப் பிரதேசம், அசாம், மணிப்புரி, மிஸ்ரோம் மேகாலயா, நாகலாந்து. திரிபுரா ஏழும் சீனா, பூட்டான், மியன்மார் பங்களாதேசம் ஆகியவற்றால் நாற்புறமும் சூழ்ந்திருக்கின்றது. 17 கிலோமீட்டர் அகலமுள்ள சில்குரி இணைப்பாதை இந்தியாவின் பிரதான பகுதியுடன் இந்த ஏழு மாநிலங்களையும் இணைக்கின்றது. இந்தப் பாதையை சீனா துண்டித்தால் அது கோழியின் கழுத்தைத் துண்டித்த நிலைதான் என்கின்றனர் இந்தியப் படைத் துறை

சீனா இந்தியாவிற்க் எதிராக மாலை தீவை திருப்பி வைத்திருக்கின்றது. சீனாவிற்கும் இந்தியாவிற்கும் இடையிலான அடுத்த புவிசார் அரசியல் சம்பந்தப்பட்ட ஆட்சி மாற்றப் போட்டி மாலை தீவில் தீவிரமாக நடக்கம் போகின்றது. அமெரிக்காவின் உதவி மாலைதீவிலும் இந்தியாவிற்கு மிக அவசியமாகும்.