யேமனில் டொனால்ட் டிரம்பின் முதற் கோணல்

அமாவாசை வரும்வரை ஒபாமா இருக்கவில்லை.
அமெரிக்காவின் எல்லை தாண்டிய பயங்கரவாதத்தின் தொடர்ச்சியாக யேமனில் ஒரு தாக்குதல் நடந்துள்ளது. முன்னாள் அமெரிக்க அதிபர் பராக ஒபாமா தான் பதவிக்கு வந்தவுடன் ஒசாமா பின்லாடனைக் கொன்று புகழ் பெற்றது போல் தன் பதவிக்காலத்தின் இறுதி நாட்களில் யேமனில் உள்ள அல் கெய்தா தலைவர்கள் தங்கியிருக்கும் தளத்தைத் தாக்கி அழித்துப் புகழ் பெற விரும்பினார், ஆனால் அது நிலாக்காலம் என்றபடியால் அமாவாசை வரை காத்திருக்க வேண்டும் என அமெரிக்கப் படைதுறை நம்பியது. அமாவாசைக்குள் அவரது பதவிக்காலம் முடிவடைந்து விட்டது.

புதிய அதிபர் டொனால்ட் டிரம்ப்பிடம் யேமன் அல் கெய்தாத் தளத்தை அதிரடியாகத் தாக்கும் திட்டம் அங்கீகாரம் பெறக் கொடுக்கப்பட்டது. வெள்ளை மாளிகையில் அவரும் அவரது மகளின் கணவரும் பழமைக்கோட்பாடுசார் யூதருமான ஜரெட் குஷ்னர், பாதுகாப்புச் செயலர் ஜிம் மத்திஸ், படைத்தளபதி ஜோசெப் டன்போர்ட், துணை அதிபர் மைக் பென்ஸ், தேசிய பாதுகாப்பு ஆலோசகர் மைக்கேல் ஃபிலின் ஆகியோர் இரவு உணவின்போது அத்திட்டத்தை ஆராய்ந்து அங்க்கீகாரம் கொடுத்தனர். அங்கீகாரம் கொடுக்க முன்னர் சட்ட ஆலோசனையும் பெறப்பட்டது. பயங்கரவாதத்திற்கு எதிரான செயற்பாட்டில் படையினருக்கு அதிக சுதந்திரம் கொடுக்க வேண்டும் என்பது டிரம்பின் கொள்கையாகும். தாக்குதல் ஜனவரி 31-ம் திகதி சனிக்கிழமை நடைபெற்றது. யேமனின் மையப்பகுதியில் உள்ள Bayda மாகாணத்தில் உள்ள அல் கெய்தா முகாமே தாக்குதலுக்கு உள்ளானது.

பாக்கிஸ்த்தான் அபொட்டாபாத் நகரில் ஒசாமா பின் லாடனின் மாளிகையில் தாக்குதல் செய்த அதே அமெரிக்கச் சிறப்புப் படையணியான சீல்-6 படையைச் சேர்ந்தோரே யேமன் தாக்குதலில் பயன்படுத்தப்பட்டனர். ஐக்கிய அரபு அமீரகத்தின் படையினர் உட்பட பலர் இத்தாக்குதலில் ஈடுபட்டனர். அவர்கள் தாக்குதல் இலக்கில் இருந்து ஐந்து மைல் தொலைவில் உள்ள யக்லா என்னும் கிராமத்தில் விமானத்தின் மூலம் இறக்கப்பட்டனர். அன்று பல ஆளில்லாப் போர்விமானங்கள் அந்தப் பகுதியில் பறந்ததை அவதானித்த மக்கள் அல் கெய்தாப் போராளிகளுக்குத் தகவல் கொடுத்திருக்க வேண்டும் எனக் கருதப்படுகின்றது. இதனால் சீல்-6 படையினரின் தாக்குதலின் முக்கிய உபாயமான “எதிர்பாராத தாக்குதல்” இல்லாமல் போய்விட்டது. அமெரிக்கப் படையினரின் வருகையை அறிந்த போராளிகள் தமது முகாமைச் சுற்றியுள்ள பாடசாலைகள், மருத்துவ நிலையங்கள், வீடுகள் போன்றவற்றில் நிலையெடுத்துக் கொண்டனர்.

 

MV-22 Osprey போர் விமானம்

உதவிக்குச் சென்ற விமானம் அழிக்கப்பட்டது.

சீல்-6 படையணியினரை அல் கெய்தா போராளிகள் சுற்றி வளைத்து பல முனைகளில் இருந்து தாக்குதல் தொடுத்த போது விமானப் படையின் உதவி கோரப்பட்டது. Marine Cobra உலங்கு வானுர்திகளும்  போர்விமானங்களும் சென்று தாக்குதல் நடத்தின. செங்குத்தாக ஏறவும் இறங்கவும் கூடிய MV-22 Osprey போர் விமானம் காயப்பட்டவர்களை மீட்கத் தரையிறங்கிய போது அவசரச் செயற்பாட்டால் நிலத்துடன் மோதல் ஏற்பட்டு அதில் இருந்த மூவர் காயமடைந்தனர். விமானம் சேதமடைந்தது. அந்த 75மில்லியன் டொலர்கள் பெறுமதியான விமானம் எதிரி கைகளில் சிக்காமல் இருக்க இன்னொரு விமானத்தில் இருந்து குண்டு வீசி அழிக்கப்பட்டது.

ஓர் அல் கெய்தா முகாமைத் தாக்குவதாயின் ஆளில்லாப் போர்விமானம்  மூலமாகவோ அல்லது வழிகாட்டல் ஏவுகணை வீச்சின் மூலமாகவோ தாக்கி அழிக்க முடியும். மிகவும் ஆபத்தான படை நடவடிக்கையை அமெரிக்காவின் கடற்படையின் சீல்-6 பிரிவினர் மேற்கொண்டதன் நோக்கம் அங்குள்ள கணினிகளியும் கைத் தொலைபேசிகளையும் கைப்பற்றுவதன் மூலம் அல் கெய்தாவின் செயற்பாடுகள் தொடர்பான விபரங்களை அறிவதே. பின் லாடனின் அபொட்டாபாத் மாளிகையில் இருந்தும் பல கணினிகளை சீல் படையினர் கைப்பற்றிச் சென்றனர். யேமனில் உள்ள அல் கெய்தா முகாமில் இருந்து கணினிகளையும் கைப்பேசிகளையும் கைப்பற்றியதாக அமெரிக்கப் படையினர் சொல்கின்றனர். அந்த வகையில் அவர்கள் நடந்த தாக்குதல் வெற்றி என்கின்றனர்.

எல்லை தாண்டிய பயங்கரவாதம்.

அமெரிக்கப்படையினர் செய்த தாக்குதலால் யேமனின் யக்லா கிராமத்தின் பெரும் பகுதி அழிக்கப்பட்டது. அமெரிக்காவால் கொல்லப்பட்ட அமெரிக்கக் குடிமகனான Anwar al-Awlakiயின் 8வயது மகளும் சில்-6 படையணியின் தாக்குதலால் கொல்லப்பட்டார்.  பத்துக்கு மேற்பட்ட அல் கெய்தாப் போராளிகளும் கொல்லப்பட்டனர். பத்துப் பெண்கள் உட்படப் பல பொதுமக்கள் கொல்லப்பட்டனர். பயேமனின் வெளியுறவுத் துறை அமைச்சர் அப்துல் மலிக் அல் மெக்லஃபி இது ஒரு நீதிக்குப் புறம்பான கொலை என்றார்.

ஆசிய ஆதிக்கப் போட்டியில் அமெரிக்க ஆட்சிமாற்றம் ஏற்படுத்தவிருக்கும் தாக்கம்

ஆசிய ஆதிக்கப் போட்டியில் சீனாவின் விரிவாக்கம், இந்தியாவிற்கும் சீனாவிற்கும் இடையிலான ஆதிக்கப் போட்டி, வட கொரியாவின் அச்சுறுத்தல், பாக்கிஸ்த்தானுக்கும் இந்தியாவிற்கும் இடையிலான முறுகல் நிலை, ஜப்பானுக்கும் சீனாவிற்கும் இடையிலான கடல் எல்லைப் பிரச்ச்னை, ஆசியான் நாடுகளுடனான வர்த்தகப் போட்டி, மத்திய ஆசியாவில் சீனாவிற்கும் இரசியாவிற்கும் இடையிலான விரிவாக்கப் போட்டி ஆகியவை முக்கிய இடம் வகிக்கின்றன. ஆட்சி மாற்றங்களை செய்வதன் மூலம் உலக கேந்திரோபாய நிலையை தனக்குச் சாதகமாக மாற்ற முயலும் அமெரிக்காவில் உலக அமைதிக்குச் சவால் விடக்கூடிய ஆட்சி மாற்றம் ஏற்பட்டுள்ளது. Foreign Policy என்னும் அமெரிக்க ஊடகம் டிரம்ப்பால் ஆசியாவிற்கு மிரட்டலைத் தவிர வேறு ஒன்றையும் கொடுக்க முடியாது என்ற தலைப்பில் கட்டுரை வெளியிட்டுள்ளது. டிரம்ப் எப்படி ஆசியாவில் ஒரு குழப்ப நிலையை உருவாக்கப் போகின்றார் என்பது தொடர்பான ஒரு ஆசிரியத் தலையங்கத்தை அல் ஜசீரா வரைந்துள்ளது.

மாறிய கேந்திரோபாய நிலை.

2016-ம் ஆண்டு ஓகஸ்ட் மாதம் ஐக்கிய அமெரிக்காவும் இந்தியாவும் LEMOA எனச் சுருக்கமாக அழைக்கப்படும் செயலாதாரப் பரிமாற்ற ஒப்பந்தக் குறிப்பாணை (Logistics Exchange Memorandum of Agreement) ஒன்றில் கையொப்பமிட்ட பின்னர் இந்து மாக்கடலின் கேந்திரோபாயச் சமநிலையில் பெரும் தாக்கம் ஏற்ப்பட்டுள்ளது. வல்லரசுகளுடன் படைத்துறை ஒத்துழைப்பைச் செய்வதில்லை என்ற நிலைப்பாட்டிலும் இந்தியாவின் படை நிலைகளை வல்லரசு நாடுகள் பாவிக்க அனுமதிப்பதில்லை என்ற நிலைப்பாட்டில் இருந்தும் இந்தியா விலகி இந்த உடன்பாட்டைச் செய்தது. இந்தியாவிற்கு படைக்கலன்களை விற்பதில்லை என்ற நிலைப்பாட்டில் இருந்து இந்தியாவிற்கு தனது புதிய தர படைக்கலன்களையும் தொழில்நுட்பங்களையும் விற்பனை செய்வதில்லை என்ற நிலைப்பாட்டில் இருந்து அமெரிக்கா விலகியது. இரு நாடுகளும் தமது நிலைப்பாட்டில் இருந்து விலகியமைக்குக் காரணம் இந்து மாக்கடலில் சீனா தனது ஆதிக்கத்தை நிதானமாகவும் கவனமாகவும் விரிவாக்கி வருவதே.

உண்மையான நண்பனும் பங்காளியும்

ஐக்கிய அமெரிக்காவின் வெளியுறவுக் கொள்கையை தலைகீழாக மாற்றியமைக்க விருக்கும் டொனால்ட் டிரம்ப் பராக் ஒபாமா தொடக்கிய பல திட்டங்களையும் ஒப்பந்தங்களையும் இரத்துச் செய்து கொண்டிருக்கின்றார். ஆனால் ஒபாமா-ஹிலரி கிளிண்டன், ஒபாமா-ஜோன் கெரி ஆகியவர்களின் வெளியுறவுச் செயற்பாட்டில் வளர்த்தெடுத்த இந்தியாவுடனான அமெரிக்காவின் நட்பை யாரும் எதிர்பாராத அளவிற்கு மேம்படுத்த இருக்கின்றார். டிரம்ப் பதவியேற்ற பின்னர் தொடர்பு கொண்ட உலகத் தலைவர்களுள் இந்திய தலைமை அமைச்சர் நரேந்திர மோடி முக்கியமானவர். இருவரும் ஒருவரை மற்றவர் தம் நாட்டுக்குப் பயணம் மேற்கொள்ளும் படி அழைப்பும் விடுத்திருந்தனர். இந்தியா உண்மையான நண்பனும் பங்காளியும் என மோடியிடம் டிரம்ப் தெரிவித்தார். இரு நாடுகளும் பொருளாதாரம், பாதுகாப்பு, பயங்கரவாத எதிர்ப்பு ஆகியவற்றில் ஒத்துழைக்க வேண்டும் என்ற தன் விருப்பத்தையும் டிரம்ப் மோடியிடம் தெரிவித்தார். நரேந்திர மோடியின் பார்திய ஜனதாக் கட்சியின் இந்து சேனையினர் டொனால்ட் டிரம்ப்பின் வெற்றியடைந்ததும் புது டில்லியில் அவரது படத்திற்குகு குங்குமப் பொட்டிட்டு காவி நிற மலர்களடங்கிய மாலைகளைச் சூடினர். அமெரிக்காவுடனான இந்தியாவின் உறவை மேம்படுத்துவதில் இந்திய ஆளும் கட்சியினர் அதிக அக்கறை காட்டுகின்றனர். அமெரிக்க வரலாற்றில் முதற் தடவையாக நான் இந்து மதத்தின் இரசிகன், நான் இந்தியாவின் இரசிகன் என்று தனது தேர்தல் பரப்புரையின்போது சொல்லிய ஒருவர் முதற் தடவையாக அதிபராகியுள்ளார். அமெரிக்க அதிபராக முன்னர் டிரம்ப்பின் நிறுவனம் இந்திய காணி-கட்டிடத்துறையில் ஒன்றரை அமெரிக்க பில்லியன் அமெரிக்க டொலர்களை முதலீடு செய்திருந்தார்.

டிரம்பை இந்தியாவால் நம்ப முடியுமா?

டிரம்ப் அமெரிக்க நிறுவனங்கள் மலிவான மனித உழைப்பிற்காக வெளிநாடுகளில் முதலீடு செய்வதை எதிர்ப்பவர். அமெரிக்க நிறுவனங்கள் தமது பணிகளைக் கையாள இந்தியாவில் அழைப்பு நிலையங்கள் (Call Centres) அமைத்திருப்பதை தனது தேர்தல் பரப்புரையின் போது சாடியிருந்தார். அந்த நிலையங்களில் பணிபுரியும் இந்தியர்களின் ஆங்கிலப் உரையாடல்களையும் கிண்டல் செய்திருந்தார். டிரம்ப் அடிக்கடி மனம் மாறக் கூடியவர் அவரை நம்பி இந்தியாவின் எதிரகாலத்தைப் பணயம் வைக்க முடியாது எனக் கருத்து வெளியிடுவோரும் புது டில்லியில் உள்ளனர்.  இந்திய வெளியுறவுத் துறைச் செயலர் சுப்பிரமணியம் ஜெய்ஷங்கர் இரு நாடுகளுக்கும் இடையிலான உறவு நல்ல நிலையை நோக்கிச் செல்லும் என்றும் அதில் எந்தவிதச் சஞ்சலத்திற்கும் இடமில்லை என்றும் தெரிவித்துள்ளார். ஆனால் டிரம்ப்பின் இந்தியா தொடர்பான நிலைப்பாட்டையும் அதில் அவரது உறுதிப்பாட்டையும் சரியாக அறிந்த பின்னரே இந்தியா அமெரிக்காவினுடனான தனது உறவை அடுத்த கட்டத்திற்கு நகர்த்த முடியும் எனவும் புது டில்லியில் உள்ள சில தரப்பினர் கருதுகின்றனர்.

பாக்கிஸ்த்தான்

அதிபர் டொனால்ட் டிரம்பிற்கும் நரேந்திர மோடிக்கும் இடையிலான உரையாடலில் உலக பயங்கரவாதத்திற்கு எதிராக அமெரிக்காவும் இந்தியாவும் இணைந்து செயற்பட வேண்டும் என டிரம்ப் தெரிவித்ததில் பாக்கிஸ்த்தானும் உள்ளதா என்பது இந்தியாவில் அதிக கரிசனையுடன் அவதானிக்கப் படுகின்றது. இந்தியா தனக்கு எதிரான பயங்கரவாத நடவடிக்கைகளுக்கு பாக்கிஸ்த்தானியப் படையினருக்கும் உளவுத் துறைக்கும் தொடர்பு இருப்பதாக நம்புகின்றது. கடந்த எட்டு ஆண்டுகளாக பாக்கிஸ்த்தானில் உள்ள தீவிரவாதிகளின் நிலைகளில் ஆளில்லாப் போர் விமானங்கள் மூலம் தாக்குதலை நடத்திவந்த அமெரிக்க உளவுத் துறையினர் 2016 ஏப்ரல் மாதம் பாக்கிஸ்த்தானில் செயற்பட்டு வந்த தலிபான் தலைவர் முல்லா அக்தர் மன்சூரைக் கொன்றவுடன் நிறுத்திக் கொண்டது. ஆனால் பராக் ஒபாமா பாக்கிஸ்த்தானை நம்பாத ஒருவராகவே கடைசிவரை இருந்தார். பல அமெரிக்க அதிபர்கள் பாக்கிஸ்த்தானில் படைத்துறை ஆட்சி இருப்பது தமது நாட்டுக்கு உகந்தது எனக் கருதினர். ஆனால் ஒபாமா பாக்கிஸ்த்தானிய ஜெனரல்களைப் பிரச்சனையாகவே கருதினார். அல் கெய்தாவின் தற்போதைய தலைவர் அய்மன் அல் ஜவாகிரி இன்றுவரை பாக்கிஸ்த்தானில்தானில் இருந்து கொண்டு தனது பரப்புரைகளைச் செய்கின்றார். இந்தியாவிற்கு எதிரான தீவிரவாதத் தாக்குதல்களைச் செய்யும் லக்சர் ஈ தொய்பாவின் தலைவர் ஹஃபீஸ் சயித் பாக்கிஸ்த்தானில் பிரபலமான ஒருவர். பாக்கிஸ்த்தானியப் படையினருக்கு வேண்டியவராகக் கருதப்படுபவர். அல் கெய்தா அமைப்பை விரைவில் ஏற்கப் போவதாக நம்பப்படும் ஒசமா பின் லாடனின் மகனும் பாக்கிஸ்த்தானிலேயே இருக்கின்றார். ஆப்கான் பிரச்சனையை அமெரிக்கா முடிவுக்குக் கொண்டு வரும்வரை அல்லது ஆப்கானிஸ்த்தானை அமெரிக்கா கைவிடும் வரை பாக்கிஸ்த்தானை அமெரிக்கா அதிருப்திப் படுத்த முடியாது. ஆனால் இந்திய அரசுறவியலாளர்கள் பாக்கிஸ்த்தான் தொடர்பான அமெரிக்காவின் கொள்கையையும் நிலைப்பாட்டையும் மாற்றுவதற்கு பெரு முயற்ச்சி எடுத்துக் கொண்டிருக்கின்றார்கள். இந்தியாவுடன் டிரம்ப் வைக்கவுருக்கும் நட்புக்கு இந்தியா அதை ஒரு நிபந்தனையாக வைத்து வெற்றிபெறக் கூடும்.

அமெரிக்கா-இந்தியா-இரசியா                                                 அமெரிக்காவிற்கும் இந்தியாவிற்கும் இடையிலான நட்புறவில் இந்தியாவைப் பொறுத்தவரை ஒரு கேந்திரோபாயப் பிரச்சனையாக இருப்பது இந்திய-இரசிய உறவாகும். பங்களாதேசப் பிரிவினைப் போரின் போது உச்சத்தில் இருந்த இந்திய-சோவியத் உறவு சோவியத் ஒன்றியத்தின் வீழ்ச்சியின் பின்னர் இரசிய-இந்திய உறவாகவும் படைத்துறை ஒத்துழைப்பாகவும் தொடர்ந்தது. ஐக்கிய நாடுகள் சபையின் பாதுகாப்புச் சபையில் இந்தியாவிற்க்குத் தேவையான போதெல்லாம் தனது வீட்டோ எனப்படும் இரத்து அதிகாரத்தை அதிக நிபந்தனையின்றி முன்பு சோவியத் ஒன்றியமும் பின்னர் இரசியாவும் இந்தியாவிற்காகப் பாவித்தன. அந்த நட்பை இழக்க விரும்பாத இந்தியா அமெரிக்காவுடன் தனது உறவை வளர்க்கும் போதெல்லாம் இரசியாவை அதிருப்திப்படுத்தாமல் செயற்பட வேண்டிய நிர்ப்பந்தத்தில் இருந்தது. அமெரிக்க இந்திய உறவு மேம்படுவதைச் சமாளிக்க இரசியா பாக்கிஸ்த்தானுடனான தனது உறவை சீரமைத்தது. இப்படிப்பட்ட சிக்கலான சூழ் நிலையில் இரசியாவுடனான அமெரிக்க உறவை புதிய அதிபர் டொனால்ட் டிரம்ப் வளர்த்தெடுப்பது என உறுதி பூண்டுள்ளார். அதற்கு ஏற்ப இரசியாவின் நண்பர் விருதைப் பெற்றவரும் விளாடிமீர் புட்டீனின் நெருங்கிய நண்பருமான ரெக்ஸ் ரில்லர்சனை தனது வெளியுறவுத் துறைச் செயலராக நியமித்துள்ளார். விரைவில் இரசியாமீதான பொருளாதாரத் தடையை டிரம்ப் தனது நிறைவேற்றதிகார உத்தரவின்(executive order) மூலம் இரத்துச் செய்வார். அதற்கான தொலைபேசி உரையாடல் டிரம்ப்பிற்கும் புட்டீனிற்கும் இடையில் 29-01-2017 சனிக்கிழமை நடந்துவிட்டது.

சீனா-அமெரிக்கா-இந்தியா-இரசியா

சீனாவிலிருந்து செய்யப்படும் பொருட்களுக்கு 45 விழுக்காடு வரி விதிப்பேன் எனச் சூளுரைத்த டொனால்ட் டிரம்ப் அதனால் அமெரிக்காவிற்கு ஏற்படப் போகும் உலக வர்த்தக வீழ்ச்சியை சமாளிக்க இந்தியா மிகவும் தேவைப்படுகின்றது. ஆனால் இந்தியாவில் உற்பத்தி செய்ய வேண்டும் என்ற கொள்கையுடைய மோடியும் அமெரிக்க வேலை வாய்ப்புக்களை மற்ற நாடுகள் பறிக்கக் கூடாது என்ற கொள்கையுடைய டிரம்பும் சீனாவைக் கருத்தில் கொண்டு ஓர் இணக்கப்பாட்டிற்கு வரவேண்டும். சீனாவை அமெரிக்கா தனது தேவைகளுக்கு ஏற்பக் கையாளுதல் இலகுவான காரியம் அன்று. ஆனால் இந்தியாவை அப்படிக் கையாள முடியும். இந்தியாவில் நிலவும் ஊழல் அதற்கு வாய்ப்பாக இருக்கின்றது. ஆனால் அமெரிக்க நிறுவனங்கள் சீனாவில் செய்யும் உற்பத்திகளை இந்தியாவில் உற்பத்தி செய்வதற்கான ஊழியர்கள் இந்தியாவில் உண்டு. ஆனால் கட்டுமானத் துறையில் சீனாவிலும் பார்க்க இந்தியா பின் தங்கியுள்ளது. பாதுகாப்புத் துறை என்னும் போது உலகச் சந்தையில் அதிக அளவு படைக்கலனகளை வாங்கும் இந்தியாவும் அதிக அளவு விற்பனை செய்யும் அமெரிக்காவும் ஒரு நேர் கோட்டில் சந்திக்க முடியும். ஆனால் இந்தியாவிற்கு நவீன படைக்கலன்களை விற்பனை செய்ய அமெரிக்கா காட்டும் தயக்கம் இந்தியாவை இரசியா பக்கம் போக வைக்கின்றது. சீனா ஆசிய ஆதிக்கப் போட்டியில் வெற்றியடைவதை தவிக்க அமெரிக்காவும் இந்தியாவும் கைகோர்க்க வேண்டிய நிலையில் உள்ளன. இதற்காக இரு நாடுகளும் ஒன்றுடன் ஒன்று ஒத்துழைக்கவும் சில விட்டுக் கொடுப்புக்களைச் செய்யவும் தயாராக இருக்கின்றன என்பதையே செயலாதாரப் பரிமாற்ற ஒப்பந்தக் குறிப்பாணையில் இரு நாடுகளும் கைச்சாத்திட்டமை சுட்டிக்காட்டுகின்றது. அமெரிக்க இரசிய இடையிலான நெருங்கிய உறவை டொனால்ட் டிரம்ப்பினதும் விளடிமீர் புட்டீனினது வெள்ளைத் தேசியவாதம் உருவாக்கினால் அது சீனாவிற்கு பெரும் பாதகமாக அமையும். அமெரிக்க அச்சுறுத்தலைச் சமாளிக்கவே இரசியா சீனாவுடன் தனது உறவை மேம்படுத்திக் கொண்டிருக்கின்றது. அமெரிக்க அச்சுறுத்தல் இரசியாவிற்கு இல்லை என்பதை டிரம்ப் முழுமையாக புட்டீனை நம்பவைத்தால் இரு நாடுகளுக்கும் இடையிலான உறவுக்குத் தடையில்லை.பிரித்தானியத் தலைமை அமைச்சரைச் சந்தித்த டிரம்ப் நேட்டோவிற்கான அமெரிக்க அர்ப்பணிப்பை உறுதி செய்தார். ஆனால் இரசியாமீதான பொருளாதாரத் தடை நீக்கப் பட மாட்டாது என உத்திரவாதம் அளிக்க மறுத்துவிட்டார். இது இரசிய உறவிற்கு டிரம்ப் கொடுக்கும் முக்கியத்துவத்தை உணர்த்துகின்றது. போல்ரிக் நாடுகளில் அமெரிக்கப் படை இருக்காது என அமெரிக்காவும் போல்ரிக் நாடுகளுக்கு இரசியாவின் அச்சுறுத்தல் இருக்காது என இரசியாவும் ஒத்துக் கொள்வது புட்டீனையும் டிரம்ப்பையும் இணைக்கும். கிறிமியா விவகாரம் பற்றி இப்போது யாரும் பெரிதாக அலட்டிக் கொள்ளவில்லை. இதனால் இரசிய அமெரிக்க உறவு நெருக்கமடைவதற்கான சாத்தியங்கள் அதிகம். மேலும் சீனாவின் ஆதிக்கம் மத்திய ஆசியாவில் விரிவடைவது தனக்கு அச்சுறுத்தல் என்பதையும் இரசியா அறியும். சீன உறவால் இரசியாவிற்கு பெரும் பொருளாதார இலாபங்கள் கிடைக்கப் போவதில்லை. படைக்கல ஏற்றுமதியால் வருமானம் கிடைக்கலாம் அது இரசியாவிற்கே அச்சுறுத்தலாக எதிர் காலத்தில் அமையும் என்பதையும் புட்டீன அறிவார். இதனால் சீனா சுற்றி வளைக்கப்பட்டு தனிமைப் படுத்தப் படும் வாய்ப்புக்கள் அதிகம். 

இரசிய எல்லையில் சீனா தனது Dongfeng-41என்னும் புதிய தர கண்டம் விட்டுக் கண்டம் பாயும் ஏவுகணைகளை நிறுத்தியிருப்பதை இரசியா நிச்சயம் தனது கரிசனைக்கு எடுத்துக் கொண்டிருக்கும். 

ஜப்பான் – தென் கொரியா

ஆசிய ஆதிக்கப் போட்டியில் அடுத்த பங்காளி ஜப்பான். ஜப்பான் டிரம்ப்பின் வெளியுறவுக் கொள்கையின் அலைவரிசையைச் சரியாகப் புரிந்து கொண்டுள்ளது.அமெரிக்கப் பாதுகாப்புத் துறைச் செயலர் ஜேம்ஸ் மத்திஸின் முதற் பயணம் ஜப்பானிற்கும் தென் கொரியாவிற்குமாகவே இருக்கப் போகின்றது. இதைஒரு மன்னிப்புக் கோரும் பயணமாக பார்க்கப்படுகின்றது. தேர்தல் பரப்புரையின் போது டிரம்ப் இரு நாடுகளும் தமது பாதுகாப்பை தாமே பார்த்துக் கொள்ள வேண்டும் என்று சொன்னது போன ஆண்டு இது இந்த ஆண்டு என வடிவேலுவின் பாணியில் ஜேம்ஸ் இரு நாட்டுத் தலைவர்களுக்கும் சொல்லவிருக்கின்றார்.
தென் கொரியாவும் ஜப்பானும் சீனாவின் அச்சுறுத்தலையிட்டு அதிக கரிசனை கொண்ட நாடுகள் இரு நாடுகளும் இந்தியாவுடன் பல ஒத்துழைப்புக்களை மேற்கொண்டுள்ளன. ஜப்பானியத் தலைமை அமைச்சர் சீனாவிற்கு எதிராக இந்தியா-அமெரிக்கா-ஜப்பான் கூட்டணி அமைக்க வேண்டும் என்பதில் அதிக விருப்பம் கொண்டவர். இதில் இரசியாவும் இணைவது ஜப்பானுக்கு இரட்டை வெற்றி.

டிரம்ப்பின் இரசியாவிற்கும் இந்தியாவிற்கும் அதிக முக்கியத்துவம் கொடுக்கும் புதிய வெளிநாட்டுக் கொள்கையால் உலக கேந்திரோபாயச் சமநிலையில் ஏற்படப்போகும் பாரிய மாற்றம் ஆசிய ஆதிக்கப் போட்டியில் சீனாவை பின் தள்ளக் கூடியது. 

டிரம்பின் அமைச்சரவையும் உலக அரசியலும்

பராக் ஒபாமா உலக மக்களிடை அமெரிக்காவின் பழுதடைந்திருந்த விம்பத்தை திருத்த முயன்றார். முக்கியமாக உலகெங்கும் வாழும் இஸ்லாமிய மக்களின் அமெரிக்கா தொடர்பான அபிப்பிராயத்தை மாற்ற முயன்றார். புதிய அதிபர் டொனால்ட் டிரம்ப் உலக அரங்கில் அமெரிக்காவின் விம்பத்தைப் பற்றிக் கவலைப்படுபவராகத் தெரியவில்லை. அவர் பெரும்பாலான அமெரிக்கர்கள் எதை விரும்புகின்றார்கள் என்பதிலேயே அதிக கவனம் செலுத்துகின்றார். ஆனால் அவர் தனது விம்பத்தையே கெடுத்துக் கொண்டிருக்கின்றார். சந்தேக நபர்களை விசாரிக்கும் போது சித்திரவதை செய்வது தொடர்பான அமெரிக்காவின் நிலைப்பாட்டை மாற்றியமைத்த டிரம்ப் Water Boarding என்ற சித்திரவதையை மீள நடைமுறைப்படுத்த டிரம்ப் உத்தரவிட்டுள்ளார். ஆனால் அது தொடர்பாக தேவையேற்படின் மாற்றம் செய்ய தனது பாதுகாப்புச் செயலாளர் ஜேம்ஸ் மத்திஸுக்கு அதிகாரமளிப்பதாக டிரம்ப் தெரிவித்துள்ளார். மத்திஸ் Water Boarding சித்திரவதைக்கு எதிரானவர். இது டிரம்ப்பின் அமைச்சர்களுக்கும் அவருக்கும் இருக்கும் முரண்பாடுகளை டிரம்ப் எப்படிக் கையாளப் போகின்றார் என்பதற்கு உதாரணமாகக் காட்டுகின்றது. டிரம்ப் அரச விவகாரங்களில் தனது அனுபவமின்மையை நன்கு அறிந்துள்ளார். 

அமெரிக்க வெளியுறவுக் கொள்கையின் முக்கிய அம்சங்கள்

அமெரிக்காவின் வெளியுறவுக் கொள்கை எப்படி அமெரிக்க முதலாளிகள் உலகத்தைச் சுரண்டுவது என்பதையே கரிசனையாகக் கொண்டுள்ளது எனப் பரவலாக நம்பப்படுகின்றது. பல அரசியல்வாதிகள் தமது கொள்கைகளை அடுத்த தேர்தலில் வெற்றி பெறுவதை அடிப்படையாகக் கொண்டே வகுப்பார்கள். முன்னாள் அமெரிக்க அதிபர் ஹரி ரூமன் புதிய பேரம் என்ற கொள்கையை முன்வைத்தார். அது நிவாரணம், மீட்சி, சீர்திருத்தம் என்பவற்றை முக்கிய பாகங்களாகக் கொண்டது. அதை உலக மக்கள் வெறுக்கவில்லை.

சுதந்திரத்தின் வெற்றிக்காக எந்த எதிரியையும் எதிர்ப்பேன் என்றார் ஜோன் F கெனடி. பொதுவுடமைவாதத்தை விரும்பாதவர்கள் மட்டுமே அதை விரும்பினர். டொனால்ட் ரீகன் வியட்னாம் போருக்குப் பின்னரான அமெரிக்காவின் உலக ஆதிக்கத்தை நிலைநிறுத்துவதை கொள்கையாகக் கொண்டார். அதற்கு உலகில் பரவலான வரவேற்பிருக்கவில்லை. அமெரிக்காவை மீண்டும் உயர்ந்ததாக ஆக்குவது தன் கொள்கை என்கின்றார் டிரம்ப். இதை உலக மக்கள் எப்படி ஏற்றுக்கொள்வார்கள் என்பதிலேயே அதன் வெற்றி தங்கியிருக்கின்றது. அதனால் உலகிற்கு என்ன நன்மை கிடைக்கப் போகின்றது?

டொனால்ட் டிரம்பின் வர்த்தக, பாதுகாப்பு, வெளியுறவுத் துறை போன்றவை தொடர்பான கொள்கை தற்போது உள்ள உலக நிலைப்பாட்டில் பல மாற்றங்களையும் தாக்குதல்களையும் கொண்டுவரவுள்ளது. அமெரிக்காவின் உலக ஆதிக்கத்தை நிலைநாட்ட அமெரிக்கப் படையினர் இரண்டு இலட்சத்திற்கு மேற்பட்டோர் உலகெங்கும் நிலைகொண்டுள்ளனர். அமெரிக்கா ஐரோப்பிய நாடுகளுடன் பெருமளவு வர்த்தகத்தைச் செய்கின்றது. அங்கு அமைதி நிலவது அமெரிக்காவின் பொருளாதாரத்திற்கு மிகவும் அவசியமாகும். ஐரோப்பிய ஒன்றிய நாடுகளுடன் ஆண்டு தோறும் அமெரிக்கா செய்யும் வர்த்தகம் 699பில்லியன் டொலர்களாகும். ஆனால் மேற்கு ஐரோப்பிய நாடுகளில் அமெரிக்கப் படைத்தளங்களை வைத்திருக்க அமெரிக்காவிற்கு 2.5பில்லியன் டொலர்கள் மட்டுமே. இது உலகெங்கும் அமெரிக்கா தளங்கள் வைத்திருப்பதற்கான செலவில் 34 விழுக்காடாகும்.

அமைச்சரவை நியமனம்

புதிய அதிபர் டிரம்பின் வெளியுறவுக் கொள்கை அமெரிக்காவை முதன்மைப் படுத்தும் வெளியுறவுக் கொள்கை (“America First” foreign policy) என அவர் பல தடவைகள் சொல்லியுள்ளார். புதிய அதிபரின் கொள்கைகளை அவரது அமைச்சர்களில் இருந்து அறிந்துகொள்ளலாம். அவரது அமைச்சரவை பருந்துகளால் நிறைந்திருக்கின்றது. அமெரிக்க அரசியலில் பருந்துகள் என்போர் போரையும் அடுத்த நாடுகளில் தலையிடுவதையும் விரும்புபவர்கள். மாறாகப் புறாக்கள் எனப்படுவோர். சண்டையைத் தவிர்த்து வேறு வழிகள் மூலம் மற்ற நாடுகளை தமது வழிக்குக் கொண்டு வர முயல்வார்கள். அமெரிக்க அரசியலமைப்பு ஓர் அமைச்சருக்கான தகமைகள் எதையும் வரையறுக்கவில்லை. அமெரிக்காவில் அமைச்சரை செயலர் எனவே அழைப்பர். அதிபர் தான் விரும்பியவரை பாராளமன்றத்தின் மூதவையின் ஆலோசனையுடனும் அங்கீகாரத்துடனும் அமைச்சராக நியமிக்கலாம். ஆனால் தனது உறவினரை நியமிக்க முடியாது. நியமிக்கப் படுபவரை மூதவை உறுப்பினர்கள் தமது கேள்விகளால் துளைத்தெடுப்பர். டொனால்ட் டிரம்ப்பின் செய்கைகள் எல்லாம் வழமைக்கு மாறானதாகவும் சர்ச்சைக்கு உரியனவாகவே இருப்பது வழக்கம். அவரது அமைச்சரவை நியமனங்களும் அப்படியே இருக்கின்றன. என்றுமில்லாத அளவு அதிக படைத்துறையைச் சேர்ந்தவர்களை டிரம்ப் தனது அமைச்சரவையில் இணைத்துள்ளார். அமெரிக்காவின் வெளியுறவுத் துறை பெண்டகன் எனப்படும் பாதுகாப்புத்துறை சிஐஏ எனப்படும் முதன்மை உளவுத்துறை ஆகிய மூன்றும் அமெரிக்காவின் முக்கிய அதிகார மையங்களாகும். இந்த மூன்றும் வெள்ளை மாளிகை எனப்படும் அமெரிக்க அதிபரின் பணிமனையை இயக்குபவர்களாக இருப்பார்கள். அந்த மூன்று அதிகார மையங்களும் முக்கிய ஊழியர்கள் பெரும்பாலும் புதிய-பழமைவாதிகளாக (neoconservative) இருக்கின்றனர்.

பாதுகாப்புத் துறைச் செயலர் ஜேம்ஸ் மத்திஸ்

டொனால்ட் டிரம்ப் தனது பாதுகாப்புத் துறைச் செயலராக முன்னாள் அமெரிக்கப் படைத்தளபதி ஜேம்ஸ் மத்திஸ்சை நியமித்திருப்பது பலரை வியப்பில் ஆழ்த்தியது. 1950-ம் ஆண்டிற்குப் பிறகு முதற்தடவையாக முன்னாள் படைத்தளபதி பாதுகாப்புத் துறைச் செயலராக நியமிக்கப்பட்டுள்ளார். 1950-இல் இருந்து குடிசார் அதிகாரிகளே பாதுகாப்புத் துறைக்குப் பொறுப்பாக இருந்தனர். 1950-ம் ஆண்டு கொரியப் போர் நடந்த படியால் ஜெனரல் ஜோர்ஜ் ஜீ மார்ஷல் பாதுகாப்புத் துறைக்கு நியமிக்கப்பட்டார். ஆனால் இப்போது அரசை நடத்துவது தொடர்பாக எந்த அனுபவமும் இல்லாத டிரம்ப்பிற்கு ஒரு படைத்துறையைச் சேர்ந்தவரின் ஆலோசனை வழங்க படைத்துறை நிபுணத்துவம் மிக்க ஜேம்ஸ் மத்திஸ் அவசியமான ஒருவராகும். நேட்டோ படைத்துறக் கூட்டமைப்பிலும் மத்திஸ் அனுபவம் கொண்டவர். இவரது தலைமையிலேயே அமெரிக்கப் படைகள் அதிரடியாக ஈராகியத் தலைநகர் பாக்தாத்தைக் கைப்பற்றின. பேட்டியொன்றில் எதிரிகளைக் கொல்வதில் நான் மகிழ்ச்சியடைகின்றேன் எனத் தெரிவித்தமைக்காக இவரை விசர் நாய் என்கின்ற பட்டப்பெயரால் அழைப்பர். மேற்காசியாவின் அமைதிக்கு ஈரான் மிகவும் ஆபத்தானது என்ற கொள்கையுடையவர் மத்திஸ். எழுத்தாளரும் பேச்சாளரும் கட்டைப் பிரமச்சாரியுமான மத்திஸ் 2016-ம் ஆண்டு ஏப்ரல் மாதம் ஐ எஸ் எனப்படும் இஸ்லாமிய அரசு அமைப்பிற்கும் ஈரானிற்கும் தொடர்பு உண்டு என உரையாற்றியிருந்தார். மத்திஸ் ஈரானின் கழுகு என விபரிக்கப்படுபவர். ஈரானுடன் பராக் ஒபாமா செய்த யூரேனியம் பதப்படுத்துவது தொடர்பாக செய்து கொண்ட ஒப்பந்தத்தை டிரம்ப் கடுமையாக எதிர்த்தவர். டிரம்பின் வெளியுறவுக் கொள்கையால் பல சிக்கல்களைச் சந்திக்கவிருக்கும் நாடாக ஈரான் இருக்கப் போகின்றது.  ஈரானைத் தனிமைப்படுத்தி அடக்கி  தண்டிக்க வேண்டும் என்ற கொள்கை எந்த அளவு நிறைவேற்றப்படும்? இரசியாவின் இரசிகர் அல்லர். புதிய வெளியுறவுத் துறை அமைச்சர் இரசியாவின் நண்பராகவும் பாதுகாப்புத் துறைச் செயலர் இரசியாவை விரும்பாதவராகவும் டிரம்ப் நியமித்துள்ளார். ஜேம்ஸ் மத்திஸ் விளடிமீர் புட்டீன் நேட்டோவைச் சிதைக்க முயற்ச்சிக்கின்றார் என தனது நியமனம் தொடர்பாக அமெரிக்கப் பாராளமன்றத்தின் மூதவை உறுப்பினருடனான நேர்முக உரையாடலின் போது தெரிவித்திருந்தார். உலகின் பல முனைகளில் இரசியா அமெரிக்காவிற்குப் போட்டியாகவும் எதிரியாகவும் செயற்படுகின்றது எனவும் மத்திஸ் தெரிவித்திருந்தார். லித்துவேனியா, லத்வியா, எஸ்த்தோனியா ஆகிய போல்ரிக் நாடுகளின் அமெரிக்க படைகள் இருக்க வேண்டும் என்பதில் மத்திஸ் தீவிரமாக இருக்கின்றார்.

வெளியுறவுத் துறைச் செயலர்

டிரம்ப் தனது வெளியுறவுத் துறைச் செயலராக நியமித்திருப்பது எக்ஸன்மொபில் என்னும் பன்னாட்டு எரிபொருள் நிறுவனத்தின் அதிபர் ரெக்ஸ் ரில்லர்சனை. இவருக்கு இரசியாவின் நண்பர் என்ற விருது இரசிய அதிபரால் வழங்கப்பட்டது. இவர் ஓர் எரிபொருள் வியாபாரியாகப் பல உலக நாட்டுத் தலைவர்களுடன் பழகியிருக்கின்றார். அவர்களை எப்படி வழிக்குக் கொண்டுவருவது என்பதை நன்கு அறிந்தவர். விளடிமீர் புட்டீனுக்கு நெருக்கமானவரை நியமித்தமைக்கு பலத்ஹ்ட எதிர்ப்புக் கிளம்பியது. இவரை மூதவை உறுப்பினர்கள் கேள்விகளால் துளைத்துக் கொண்டிருக்க வெளியே பலர் கூடி ஆர்ப்பாட்டம் செய்தனர். அமெரிக்கப் பாராளமன்றத்தின் இரு கட்சியிலும் கணிசமான அளவினர் இவரது நியமனத்தை இட்டு அதிருப்தியடைந்துள்ளனர். விளடிமீர் புட்டீன் சிரியாவில் போர்க்குற்றம் இழைத்தார் என்பதை இவர் ஏற்றுக் கொள்ளவில்லை. இரசியாவின் நண்பராகக் கருதப்படும் இவர் சீனாவின் விரோதியாகக் கருதப் படுகின்றார். வியட்னாமின் தென்சீனக் கடல் எல்லையில் சீனாவின் மிரட்டலால் எல்லா நிறுவனங்களும் எரிபொருள் அகழ்வு செய்ய மறுத்தபோது அந்த மிரட்டலைப் பொருட்படுத்தாமல் இவரது நிறுவனமான எக்ஸன்மொபில் துணிந்து செய்தது. சீனா தென் சீனக் கடலில் செய்யும் விரிவாக்கங்கள் தடுக்கப்பட வேண்டும் என்பதில் இவர் உறுதியாக உள்ளார். இரசியா உக்ரேனில் செய்த ஆக்கிரமிப்பைப் போன்றதே சீனா தென்சீனக் கடலில்ச் செய்வது என்பது இவரது கருத்தாகும். சீனா செய்யும் தீவு நிர்மாணங்கள் நிறுத்தப்படவேண்டும் அந்தத் தீவுகளுக்கான சீனாவின் பயன்கள் தடுக்கப் படவேண்டும் என ரில்லர்சன் கருத்து வெளியிட்டது சீன ஊடகங்களின் கடுமையான விமர்சனத்துக்கு உள்ளானது.

சிஐஏயின் அதிபர் மைக் பொம்பியோ

டொனால்ட் டிரம்ப் அமெரிக்காவின் முக்கிய உளவுத் துறையான சிஐஏயின் அதிபராக நியமித்த மைக் பொம்பியோ இரசியா தொடர்பாக கடுமையான நிலைப்பாடு கொண்டவர். இரசியா தனது உலக ஆதிக்கத்தை அதிகரித்து வருவதாக பொம்பியோ முதவை உறுப்பினர்களிடம் தெரிவித்திருந்தார். டிரம்ப் அமெரிக்க உளவுத் துறையை கடுமையாக விமர்சித்த போதிலும் மைக் பொம்பியோ தனக்கு உளவுத் துறையின் மீது அசைக்க முடியாத நம்பிக்கை இருக்கின்றது என்றார்.  இணையவெளி ஊடுருவல் அமெரிக்காவிற்குப் பெரும் பிரச்சனையாக நீண்டகாலமாக இருக்கின்றது. அது இப்போது அமெரிக்காவின் கட்சிப் பிரச்சனையாக மாறிவிட்டது. அமெரிக்கத் தேர்தல் இரசிய ஊடுருவிகளால் திசை திருப்பப்பட்டது என்பது கடும் வாதங்களைக் கிளப்பி விட்ட நிலையில் சிஐஏஇற்குப் பொறுப்பாக நியமிக்கப்பட்ட மைக் பொம்பியோ இரசியாவும் சீனாவும் இணையவெளி ஊடுருவலைப் பொறுத்தவரை அமெரிக்காவின் மிக மோசமான எதிரிகள் என்றார். இரசியா ஐ எஸ் அமைப்பிற்கு எதிரான போரில் உதவவில்லை எனவும் ஐரோப்பாவிற்கு அச்சுறுத்தலாக இருக்கின்றது எனவும் மூதவை உறுப்பினர்களிடம் தெரிவித்திருந்தார்.

நிதித்துறைக்குப் பொறுப்பான திறைசேரிச் செயலர்-Steven Mnuchin

அமெரிக்க டொலர் வலிமை மிக்கதாக இருக்க வேண்டும் என்பது டொனால்ட் டிரம்ப்பின் கொள்கை. அமெரிக்கத் திறைசேரிக்குப் பொறுப்பாக நியமிக்கப்பட்ட செயலர் Steven Mnuchinனும் டொலரின் பெறுமதி வலிமை மிக்கதாக இருப்பதையே விரும்புகின்றார். இதுவரைகாலமும் அமெரிக்கத் திறைசேரியின் கொள்கை டொலரின் பெறுமதி குறைந்திருந்தால்தால் அமெரிக்கப் பொருடக்ள் உலகச் சந்தையில் குறைந்த விலையில் விற்க முடியும் என்பதாக இருந்தது. அதிலும் முக்கியமாக சீனப் பொருட்களுடன் போட்டி போட்டு விற்பனை செய்ய முடியும் என்ற விவாதம் பரவலாக முன்வைக்கப்பட்டது.

நேட்டோ

நேட்டோ காலாவதியாகிப் போன ஒன்று என்பது டிரம்பின் கொள்கை. ஆனால் துறை அதிபர் மைக் பென்ஸ் எழுபது ஆண்டு கால வரலாறு கொண்டா நேட்டோ என்பது தொடரும் எனத்தெரிவித்துள்ளார். டிரம்ப்பின் கொள்கையால் குழப்பமடைந்த நேட்டோவில் உள்ள ஐரோப்பிய நாடுகள் தமது படைவலுவையும் படைத்துறை ஒத்துழைப்பையும் அதிகரிக்கத் திட்டமிட்டுள்ளனர். டிரம்ப்பின் வெளியுறவுத் துறைச் செயலர் ஜேம்ஸ் மத்திஸ் ஐக்கிய அமெரிக்காவிற்கும் நேட்டோவிற்கும் இடையிலான உறவு அசைக்க முடியாதது என்றார். நேட்டோவில் அதிக ஆர்வமுள்ளவரான மத்திஸ் கனடியப் பாதுகாப்புத் துறையுடன் லத்வியாவில் கனடியப் படைகளை அதிகரிப்பது தொடர்பாகக் கலந்துரையாடியுள்ளார். ஜேர்மனியில் உள்ள இடதுசாரிகள் நேட்டோப் படைத்துறைக் கூட்டமைப்பைக் கலைத்துவிட்டு இரசியாவுடனான ஒத்துழைப்பை அதிகரிக்கவும் எனத்தெரிவிக்கின்றனர். நேட்டோவிற்கு எதிரான டிரம்ப்பின் முக்கிய குற்றச் சாட்டு பல நேட்டோ உறுப்பு நாடுகள் தமது மொத்தத் தேசிய உற்பத்தியின் குறைந்த அளவான இரண்டு விழுக்காட்டைக் கூட பாதுகாப்புச் செலவுக்கு ஒதுக்குவதில்லை என்பதாகும். மொத்தம் 23 நேட்டோ உறுப்பு நாடுகள் இந்த இரண்டு விழுக்காடு நிபந்தனைக்கு ஏற்ப செலவு செய்வதில்லை. டிரம்ப் அமெரிக்க அதிபராகத் தெரிவு செய்யப்பட்ட பின்னர் பல நாடுகள் தமது பாதுகாப்புச் செலவை அதிகரிக்க முன்வந்துள்ளன.

அயல் நாடுகளும்  குடிவரவும்

டிரம்பின் வெளியுறவுக் கொளையால் பெரிதும் பாதிக்கப் படப் போவது மெக்சிக்கோ நாடாகும். மெக்சிக்கோ தனது தேசிய வருமானத்தின் மூன்றில் இரு பங்கை ஐக்கிய அமெரிக்காவில் இருந்தே பெறுகின்றது. பல இலட்சக் கணக்கான மெக்சிக்கர்கள் அமெரிக்காவில் பணிபுரிந்து கொண்டு தமது நாட்டுக்கு பல பில்லியன் டொலர்களை அனுப்புகின்றனர். கடந்த நூறு ஆண்டுகளாக அமெரிக்கக் கண்டத்தில் உள்ள மற்ற நாடுகள் மீது வெளிநாடுகளின் ஆதிக்கம் இருக்கக் கூடாது என்பது அமெரிக்காவின் கொள்கையாகும். மன்றோ கோட்பாடு என இந்தக் கொளைக அழைக்கப் படும். பல தென் அமெரிக்க நாடுகள் பொருளாதாரப் பிரச்சனைகளில் இருக்கும் போது சீனா தனது கடனுதவி மூலம் தென் அமெரிக்காவில் தனது ஆதிக்கத்தை விரிவாக்க முயல்கையில் டொனால்ட் டிரம்ப் அந்த நாடுகளுடன் கடுமையான நிலைப்பாட்டை எடுப்பது அமெரிக்காவின் வெளியுறவுக் கொள்கைக்கு பெரும் சவாலாக அமையும்.

பிரித்தானியா

டொனால்ட் டிரம்ப் ஐரோப்பிய ஒன்றியத்தில் இருந்து வெளியேறுவதற்கு ஆதரவு தெரிவித்தவர். பிரித்தானியாவுடன் அமெரிக்காவின் வர்த்தகத்தை தான் அதிகரிக்கவிருப்பதாக அவர் கருத்து வெளியிட்டுள்ளார். ஆனால் இரண்டு நாடுகளும் இஸ்ரேல் தொடர்பாக முரண்பட்டுள்ளன. பிரித்தானியா தனது இஸ்ரேல் தொடர்பான கொள்கையில் சில மாற்றங்களைச் செய்ய வாய்ப்புண்டு.

ஐரோப்பா

ஐரோப்பிய ஒன்றியம் பிளவு படுவதை டொனால்ட் டிரம்ப் இரகசியமாக விரும்புகின்றார். அவரது நேட்டோ தொடர்பான கொள்கையும் கடுமையானதே. நேட்டோ உறுப்பு நாடுகள் தமது பாதுகாப்புச் செலவை அதிகரிக்க வேண்டும் என டொனால்ட் டிரம்ப் நிர்ப்பந்திப்பார். ஆனால் நேட்டோப் படைகத் துறைக் கூட்டமைப்பை டிரம்ப் சிதைக்க மாட்டார். கிழக்கு ஐரோப்பிய நாடுகளில் உள்ள அமெரிக்கப் படைகளை டிரம்ப் விலக்க மாட்டார். இரசியாவுடனான முரண்பாடு மோசமாகுவதை டிரம்ப் தடுப்பார். இரசியாவின் அச்சுறுத்தலுக்கு உள்ளாகியிருக்கும் கிழக்கு ஐரோப்பிய நாடுகளை டிரம்ப் கைவிட முடியாது. இரசியாவுடன் அமெரிக்கா டிரம்ப் தலைமையில் ஏற்ப்படுத்தவிருக்கும் உறவு போல்ரிக் நாடுகள் தடையாக இருக்கும்.

மேற்காசியா

அமெரிக்கா எரிபொருள் உற்பத்தியில் தன்னிறைவு அடைந்துள்ள நிலையில் மேற்காசியாவின் எரிபொருள் விநியோகத்தில் டிரம்ப் தலைமையிலான அமெரிக்கா தனது கடப்பாடுகளைக் குறைத்துக் கொள்ளும். ஆனால் ஐ எஸ் அமைப்பினருக்கு எதிராக டிரம்ப் கடுமையான நிலைப்பாட்டில் உள்ளார். இரசியாவுடன் அமெரிக்கா நல்லுறவை ஏற்படுத்தினால் மட்டுமே ஈரானை அடக்கும் டிரம்ப்பின் கொள்கை வெற்றியளிக்கும்.

உலக வர்த்தகம்

அமெரிக்காவின் உலக வர்த்தகக் கொள்கையில் டிரம்ப் பல மாற்றங்களைச் செய்யவிருக்கின்றார். அது ஏற்கனவே உள்ளகக் கடனால் பிரச்சனைக்கு உள்ளாகியிருக்கும் சீனாவை பெரிதும் பாதிக்கும். சீனாவில் இருந்து இறக்குமதிக்கு வரியை அதிகரிப்பேன் என டிரம்ப் சூழுரைத்திருந்தார். இது சீனா செய்து கொண்டிருக்கும் பொருளாதார சீர்திருத்தங்களுக்கும் தடையாக அமையும். ஆனால் சீனா டிரம்ப்பின் அமெரிக்காவுடன் ஒரு வர்த்தகப் போருக்கு தன்னை தயார்படுத்திக் கொண்டிருக்கின்றது.

2008இல் குழம்பிப் போன உலகம் தெளிவு பெற முன்னர் டிரம்ப் மேலும் குழப்பப் போகின்றார்.