ஒன்றாய் இணைவோம் ஓரணி நடப்போம்

சூழ் சதியங்கே வலிமையாகிட வலிமையாகிட - தமிழர்
போரணியதில் மௌனமாகிட விலகி ஒதுங்கிட
பேரழிவு அங்கே அரங்கேறிட பலவும் அழிந்திட
இடர்கள் பெருகிட மானுடர்களோடு மானுடமும் பலியானது
தீர்க்கவெனவந்தவர் அங்கே எமைத் தீர்துக்கட்டினர் - அதைக் கேட்க
ஒன்றாய் இணைவோம் ஓரணி நடப்போம்

மௌனிக்கப்பட்டது படைக்கலன்கள் மட்டுமே
மௌனித்திடுமோ தமிழ் மறவர்தம் மனச்சாட்சி
போரலை ஓயலாம் வேங்கைகள் பதுங்கலாம் - தன்மானப்
பேரலை என்றும் ஒயாது தமிழர் தலை சாயாது - என்றிட
ஒன்றாய் இணைவோம் ஓரணி நடப்போம்

பீனிக்ஸ் பறவையும் சொல்லட்டும் சொல்லட்டும்
தமிழனைப்போல் நானும்  மீண்டெழுவேன் மீண்டெழுவேன் என
நீரலையும் ஆங்கே ஆர்ப்பரிக்கட்டும் ஆர்ப்பரிக்கட்டும்
தமிழரனைப்போல் நான் விழ விழ ஓயாமல் எழுவேன் என - அதற்கு
ஓன்றாய் இணைவோம் ஓரணி நடப்போம்

தாயகத் தமிழரின் போரகப் பரணியை
கருத்தில் எடுப்போம் கைகளைத் தொடுப்போம்
தடைகளை உடைப்போம் சரித்திரம் படைப்போம் - அதற்கு
ஒன்றாய் இணைவோம் ஓரணி நடப்போம்

தாரணி போற்றும் சீரணி இலண்டனில்
ஓன்றாய் இணைவோம் ஓரணி நடப்போம்
பேரணியாய் திரள்வோம் ஊரணியாய் எழுவோம்
பன்னாட்டாரின் மனக்கதைவைத் தட்டுவோம் தகர்ப்போம் - அதற்கு
ஒன்றாய் இணைவோம் ஓரணி நடப்போம்

ஒவ்வோரு நாடும் எம் நிலையறிந்திட
ஒவ்வொரு நாடும் எம்முடன் இணைந்திட
நீதியை உரைப்போம் நியாயத்தை நிலைநிறுத்துவோம்
ஈழவிடுதலையின் அடுத்த படியை இலண்டனில் கடப்போம்- அதற்கு
ஒன்றாய் இணைவோம் ஓரணி நடப்போம்